ក្រុងប៉ោយប៉ែត ៖ មន្ត្រីក្រសួងពាណិជ្ជកម្មថៃចំនួន៣៣រូបមកពីខេត្តកំផែងផិត ប្រទេសថៃ នៅវេលាម៉ោង៨ និង៤០នាទីព្រឹកថ្ងៃទី៥ កញ្ញា បានចូលមកកម្ពុជាតាមច្រទ្វារអន្តរជាតិប៉ោយប៉ែតឆ្ពោះទៅខេត្តបាត់ដំបង និងខេត្តប៉ៃលិន ដើម្បីសិក្សាការងារជាមួយអាជ្ញាធរនៃខេត្តទាំង២របស់កម្ពុជា ។ប្រតិភូរបស់ក្រសួងពាណិជ្ជកម្មថៃនេះ ត្រូវបានភាគីកម្ពុជាយករថយន្តក្រុង៤៥កៅអីម៉ាកហ៊ីយ៉ាន់ដាយ ពណ៌ស ពាក់ស្លាកលេខ 3B 3122 ទៅទទួលដល់សណ្ឋាគារអារញ្ញមើមែត ក្នុងស្រុកអារញ្ញ ខេត្តស្រះកែវ ប្រទេសថៃ ។
តាមការឱ្យដឹងតាមទូរស័ព្ទនៅព្រឹកថ្ងៃទី៥ កញ្ញា លោកនេត សំអាត អនុប្រធានការិយាល័យទំនាក់ទំនងព្រំដែនកម្ពុជា-ថៃ ប្រាប់ថា ប្រតិភូថៃខាងលើនឹងធ្វើដំណើរទៅខេត្តបាត់ដំបង និងប៉ៃលិន ដើម្បីសិក្សាការងារ ហើយលោកថា ប្រតិភូក្រុមនេះជាមន្ត្រីក្រសួងពាណិជ្ជកម្មមកពីខេត្តកំផែងផិត ប្រទេសថៃ ។ ប្រតិភូក្រុមនេះក្រោយចប់ការងារក្នុងខេត្ត២ខាងលើ នឹងធ្វើដំណើរត្រឡប់ទៅប្រទេសថៃវិញនៅល្ងាចថ្ងៃដដែល តាមច្រកទ្វារអន្តរជាតិព្រំនៃខេត្តប៉ៃលិន ឈមនឹងច្រកទ្វារបានផាកាត ខេត្តចាន់បូរី ប្រទេសថៃ។
កាលពីថ្ងៃទី៣ កញ្ញា កន្លងទៅនេះដែរ ប្រតិភូមន្ទីរសុខាភិបាលខេត្តបាត់ដំបង និងខេត្តបន្ទាយមានជ័យ សរុប១៧រូប ក៏បានធ្វើដំណើរចេញពីកម្ពុជាតាមច្រកទ្វារអន្តរជាតិប៉ោយប៉ែតឆ្លងទៅប្រទេសថៃ ដើម្បីចូលរួមប្រជុំ និងធ្វើទស្សនកិច្ចសិក្សារួមគ្នាជាមួយមន្ទីរសុខាភិបាលខេត្តស្រះកែវ ប្រទេសថៃ ។ ប្រតិភូកម្ពុជា ត្រូវបានភាគីថៃយករថយន្តមកទទួលដល់ច្រកទ្វារអន្តរជាតិប៉ោយប៉ែត។
លោកហេង ចន្ថា អនុប្រធានការិយាល័យគណនេយ្យ ហិរញ្ញវត្ថុនៃមន្ទីរសុខាភិបាលខេត្តបន្ទាយមានជ័យ ទទួលបន្ទុកទំនាក់ទំនងរវាងមន្ទីរសុខាភិបាលខេត្តបន្ទាយមានជ័យ និងមន្ទីរសុខាភិបាលខេត្តស្រះកែវ ប្រទេសថៃ បានប្រាប់កោះសន្តិភាពមុនពេលចេញដំណើរថា ប្រតិភូរបស់លោកមកពីមន្ទីរសុខាភិបាលខេត្តបន្ទាយមានជ័យចំនួន៩រូប និងមកពីមន្ទីរសុខាភិបាលខេត្តបាត់ដំបង៨រូប ។ ការចេញទៅប្រទេសថៃនេះគឺដើម្បីចូលរួមកិច្ចប្រជុំផង និងធ្វើទស្សនកិច្ចសិក្សាផង មានរយៈពេល៣ថ្ងៃចាប់ពីថ្ងៃទី៣ កញ្ញា ដល់ថ្ងៃទី៥ កញ្ញា ទើបត្រឡប់មកវិញ ។ លោកហេង ចន្ថា ប្រាប់ថា កិច្ចប្រជុំរវាងភាគីទាំង២ ទាក់ទងទៅនឹងផ្នែកគាំពារមាតា និងទារក ៕
ចែករំលែកព័តមាននេះ