ក្រុងប៉ោយប៉ែត ៖ ជនសង្ស័យ២នាក់ឪពុកនិងកូន ត្រូវប៉េអឹមក្រុងប៉ោយប៉ែតឃាត់ខ្លួនក្រោយពីទទួលពាក្យបណ្តឹងចោទថា ឪពុកនិងកូននេះបានទៅកាប់បំផ្លាញផ្ទះនិងជណ្តើររបស់គេ ។ ការឃាត់ខ្លួននេះបានធ្វើឡើងកាលពីវេលាម៉ោង១២និង៣០នាទីរសៀលថ្ងៃទី៣ កញ្ញា នៅភូមិអូរជ្រៅ សង្កាត់ប៉ោយប៉ែត ដែលបុរសជាឪពុកឈ្មោះ ចាន់ សុខុម អាយុ៤៤ឆ្នាំ ឯកូនប្រុសឈ្មោះវ័រ ក្រឹង ហៅចាន់ ចំរើន អាយុ១៨ឆ្នាំ ។
តាមមន្ត្រីប៉េអឹមក្រុងប៉ោយប៉ែតប្រាប់ថា ម្ចាស់ផ្ទះឈ្មោះម៉ៅ វិចិត្រ ភេទស្រី អាយុ៤៥ឆ្នាំ រស់នៅក្នុងភូមិខាងលើបានមកប្តឹងថា ជនសង្ស័យទាំង២នាក់ឪពុក និងកូន កាលពីវេលាម៉ោង៨យប់ថ្ងៃទី២ កញ្ញា បាននាំគ្នាទៅរករឿងគ្រួសារគាត់ដល់ផ្ទះដោយឈ្មោះចាន់ សុខុម ជាឪពុកលីផ្គាក់ផង ។ នៅពេលនោះក្រុមគ្រួសារគាត់បាននាំគ្នារត់ចូលផ្ទះហើយចាក់សោរពីខាងក្នុង ឯជនសង្ស័យដោយខឹងកាប់មនុស្សមិនបានក៏កាប់បំផ្លាញជញ្ជាំង និងជណ្តើរផ្ទះរបស់គាត់ជាច្រើនកាំបិត ។ ស្ត្រីជាដើមបណ្តឹងរៀបរាប់ទៀតថា ហេតុការណ៍នេះបានកើតឡើងម្តងទៀតនៅវេលាម៉ោង៣រំលងអធ្រាត្រឈានចូលថ្ងៃទី៣ កញ្ញា ដោយជនសង្ស័យឈ្មោះចាន់ សុខុម បានមកជាមួយកូនប្រុសកាប់បំផ្លាញផ្ទះ និងជណ្តើរម្តងទៀត ខណៈក្រុមគ្រួសារពួកគាត់កំពុងដេក និងបានស្រែកឡូឡាទាំងស្រវឹងស្រាឱ្យពួកគាត់ចេញ ប៉ុន្តែពួកគាត់មិនហ៊ានចេញទេ ។ លុះព្រឹកថ្ងៃទី៣ កញ្ញា ទើបមកដាក់ពាក្យបណ្តឹងនៅបញ្ជាការដ្ឋានប៉េអឹមក្រុងឱ្យជួយរកយុត្តិធម៌ហើយកម្លាំងប៉េអឹមក្រុងក៏ចុះឃាត់ខ្លួនជនសង្ស័យទាំង២នាក់ឪពុក និងកូនមកសាកសួរ ។
លោកហម ម៉ុត មេបញ្ជាការប៉េអឹមក្រុងប៉ោយប៉ែត បានប្រាប់ថា យោងតាមការសួរនាំជនសង្ស័យឈ្មោះចាន់ សុខុម អះអាងថា ខ្លួនដើររកប្រពន្ធដែលបាត់ពីផ្ទះទៅបុកនឹងជណ្តើរផ្ទះរបស់ស្ត្រីដើមបណ្តឹងខាងលើធ្វើឱ្យខ្លួនដួលទើបខឹងកាប់ជណ្តើរនោះបន្ថយកំហឹងបែបនេះទៅ ។
ទោះបីជាជនសង្ស័យអះអាងយ៉ាងនេះក្តីប៉ុន្តែលោកមេបញ្ជាការប៉េអឹមក្រុងប្រាប់ថា យោងតាមការចុះស្រាវជ្រាវជនសង្ស័យមានគំនុំជាមួយគ្រួសារដើមបណ្តឹងរឿងបញ្ចាំប្លង់ដីពីអតីតកាល ប៉ុន្តែលោកមិនបានលំអិតពីការដាក់បញ្ចាំប្លង់ដីនោះយ៉ាងណាទេ ។ លោកហម ម៉ុត បន្តថា ចំណែកជនសង្ស័យជាកូនពុំបានប្រព្រឹត្តទេគ្រាន់តែរួមដំណើរជាមួយឪពុក ។ លោកថា ក្រោយការសួរនាំ និងធ្វើកំណត់ហេតុរួច នឹងបញ្ជូនជនទាំង២នាក់ទៅបញ្ជាការដ្ឋានប៉េអឹមខេត្តដើម្បីចាត់ការបន្តតាមនីតិវិធី ៕
ចែករំលែកព័តមាននេះ