រាជធានីភ្នំពេញ ៖ ការប្រកួតប្រដាល់ដណ្តើមខ្សែក្រវាត់ខារ៉ាបាវ ទម្ងន់៥៧គីឡូក្រាម នៅលើសង្វៀនទូរទស្សន៍ CTN នាថ្ងៃសុក្រទី៧ កញ្ញា ខាងមុខនេះ ទាំងពូល A និងពូល B បានបញ្ចប់វគ្គប្រកួតជម្រុះវិលជុំអស់ហើយ ។ ពូល A សុខ សុវណ្ណ មកពីក្លិបកងពលតូចលេខ៣១ ដែលត្រូវជួបយស់ សំអាល់ មកពីក្លិបឃ្លាំងមឿងកីឡាខេត្តពោធិ៍សាត់ ប្រសិនជាគេវាយសំអាល់ឱ្យសន្លប់ទើបអាចឈរនៅលំដាប់ថ្នាក់លេខ១ក្នុងពូលបាន ប៉ុន្តែបើឈ្នះពិន្ទុបានត្រឹមលេខ២ក្នុងពូលប៉ុណ្ណោះ ។
ចំណែកការជួបគ្នារវាង គួន ប៊ុនហ៊ីម មកពីក្លិបពន្លឺសាមគ្គីខេត្តបាត់ដំបង និងអ៊ុង ស៊ីណា មកពីក្លិបសិង្ហកីឡា ធ្វើឡើងគ្រាន់តែបង្គ្រប់កិច្ចប៉ុណ្ណោះ ។ សុខ សុវណ្ណ ប្រកួតបាន៤លើកឈ្នះ៣លើក ចាញ់១លើក មាន១០ពិន្ទុ ។ ដូច្នេះបើគេរកបាន៣ពិន្ទុបន្ថែមមានន័យថា គេអាចប្រជែងរកតំណែងលេខ១ក្នុងពូល ខណៈទេស សំខាន់ មកពីក្លិបកងពលតូចលេខ៧០ ដែលស្ថិតនៅក្នុងពូល A ដូចគ្នានោះមានកន្លែងនៅវគ្គប្រកួតពាក់កណ្តាលផ្តាច់ព្រ័ត្រ និងផ្តាច់ព្រ័ត្ររួចទៅហើយ ។
ប៉ុន្តែសំខាន់ កំពុងតែរង់ចាំអ៊ុតមើលលើការប្រកួតរបស់សុវណ្ណ លើកនេះដែរ ព្រោះការប្រកួតរបស់គេបានបញ្ចប់អស់ហើយ ក្នុងនោះ៥ ប្រកួតគេគឺឈ្នះ៤ប្រកួត ចាញ់១ប្រកួត និងមាន១៣ពិន្ទុ ។ ដោយឡែក សម្រាប់យស់ សំអាល់ ការមកប៉ះសុខ សុវណ្ណ លើកនេះបើចាញ់ក៏ហាលអាវ ឈ្នះក៏ហាលអាវដែរ ។ ពូល B វិញ គួន ប៊ុនហ៊ីម និងអ៊ុង ស៊ីណា ការប្រកួតរបស់គេពេលនេះ គឺធ្វើឡើងដើម្បីបង្គ្រប់កិច្ចតែប៉ុណ្ណោះ ព្រោះពិន្ទុរបស់ពួកគេទាំង២នាក់មិនអាចឡើងទៅដល់វគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រជាបន្តទៀតបានឡើយ។ ម្យ៉ាងវិញទៀត ពូល B គេបានរកឃើញអ្នកដែលត្រូវឡើងទៅប្រកួតនៅវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រហើយគឺកីឡាករសំរិទ្ធ សុភាព មកពីក្លិបអប្សរាក្បាច់គុនខ្មែរ លេខ១ក្នុងពូល និងកីឡាករសេក គឹមផាន មកពីក្លិបសឹករងខេត្តសៀមរាប លេខ២ ក្នុងពូល ។
រីឯគូប្រកួតមិត្តភាពវិញ ថុល មករា មកពីក្លិបឃ្លាំងមឿងកីឡាខេត្តពោធិ៍សាត់ ជួបប្រកួតជាមួយសួង សុវណ្ណថា មកពីសមាគមកីឡាប្រដាល់ក្រសួងការពារជាតិ ។ ពុទ្ធ ឆាយកុសល មកពីក្លិបពុទ្ធសេរីវង្សកីឡា ជួបប្រកួតជាមួយសាន រាជសីហ៍ មកពីក្លិបខ្លារខិនមានឫទ្ធិ ៕
ចែករំលែកព័តមាននេះ