រាជធានីភ្នំពេញ ៖ តាមរបាយការណ៍របស់ប៉ូលិសចរាចរណ៍រាជធានីភ្នំពេញបានឱ្យដឹងថា សម្រាប់ករណីគ្រោះថ្នាក់ចរាចរណ៍រយៈពេល៧ខែ គិតពីខែមករា ដល់ខែកក្កដា ២០១២ មានគ្រោះថ្នាក់ចរាចរណ៍សរុបចំនួន២៨៨លើក បើប្រៀបធៀបរយៈពេលដូចគ្នាឆ្នាំ២០១១ កើនឡើង១លើក មានមនុស្សរងគ្រោះចំនួន៥៩០នាក់ កើនឡើង២១នាក់ ក្នុងនោះមនុស្សស្លាប់ចំនួន១៥២នាក់ កើន២៨នាក់ របួសធ្ងន់ចំនួន២៩១នាក់ កើន៣នាក់ និងរបួសស្រាលចំនួន១៤៧នាក់ ថយចុះ១០នាក់ ។
ចំណែកមធ្យោបាយខូចខាតមានរថយន្តចំនួន១៩៩គ្រឿង កើន៣៣គ្រឿង រឺុម៉កម៉ូតូចំនួន២០គ្រឿង កើន១១គ្រឿង ម៉ូតូចំនួន៣០៧គ្រឿង កើន១៩គ្រឿង និងកង់ចំនួន១១គ្រឿង កើន៦គ្រឿន ។ ក្នុងចំនួនម៉ូតូ៣០៧គ្រឿង មានពាក់មួកសុវត្ថិភាពចំនួន៥១នាក់ មនុស្សជិះចំនួន៤៩៨នាក់។ ចំពោះភាគីពាក់ព័ន្ធករណីគ្រោះថ្នាក់ចរាចរណ៍ គឺរថយន្តនិងអ្នកថ្មើរជើងចំនួន១០លើក រថយន្តនិងម៉ូតូចំនួន១៥៩លើក រថយន្តនិងរថយន្តចំនួន៧លើក រថយន្តបង្កដោយខ្លួនឯងចំនួន៦លើក រថយន្តនិងកង់ចំនួន៦លើក រថយន្តនិងបង្កាន់ដៃស្ពានចំនួន១លើក រថយន្តនិងរ៉ឺម៉កម៉ូតូចំនួន២លើក រ៉ឺម៉កម៉ូតូនិងកង់ចំនួន១លើក ម៉ូតូនិងអ្នកថ្មើរជើងចំនួន៦លើក ម៉ូតូនិងបង្គោលភ្លើងចំនួន១លើក ម៉ូតូនិងម៉ូតូចំនួន៥៦លើក ម៉ូតូនិងរឺុម៉កម៉ូតូចំនួន២០លើក ម៉ូតូដួលខ្លួនឯងចំនួន៧លើក ម៉ូូតូនិងកង់ចំនួន៥លើក រឺុម៉កម៉ូតូនិងអ្នកថ្មើរជើងចំនួន១លើក ។
ក្នុងចំនួនគ្រោះថ្នាក់ទាំង២៨៨ករណី ក្នុងនោះ គ្រោះថ្នាក់តាមបណ្តាខណ្ឌ រួមមានខណ្ឌចំការមនចំនួន៤៤លើក, ខណ្ឌដង្កោចំនួន៤៤លើក, ខណ្ឌមានជ័យចំនួន៣២លើក, ខណ្ឌដូនពេញចំនួន ៣៧លើក, ខណ្ឌ៧មករាចំនួន ៦លើក, ខណ្ឌឫស្សីកែវចំនួន៦៣លើក, ខណ្ឌសែនសុខចំនួន២៦លើក, ខណ្ឌទួលគោកចំនួន១២លើក និងខណ្ឌពោធិ៍សែនជ័យចំនួន២៤លើក ។ បុកបំផ្លាញទ្រព្យសម្បត្តិសាធារណៈចំនួន១១៨គ្រឿង រក្សាទុកនៅការិយាល័យនគរបាលចរាចរណ៍៨គ្រឿង បញ្ជូនសំណុំរឿងទៅសាលាដំបូងរាជធានីភ្នំពេញចំនួន២០៨ករណី ជនល្មើស៤០នាក់ ។ ចំនួននៃគ្រោះថ្នាក់ចរាចរណ៍បើប្រៀបធៀបនឹងរយៈពេលដូចគ្នាឆ្នាំ២០១១ ឃើញថា កើនឡើងតែ១លើកប៉ុណ្ណោះ តែចំនួនអ្នកស្លាប់កើនដល់ទៅ២៨នាក់ ដែលតួលេខនេះបង្ហាញពីក្តីបារម្ភពីការកើនឡើងនៃចំនួនអ្នកស្លាប់ដោយសារគ្រោះថ្នាក់ចារាចរណ៍ ៕
ចែករំលែកព័តមាននេះ