រាជធានីភ្នំពេញ ៖ ក្រោយពីមានការផ្សាយព័ត៌មានជាបន្តបន្ទាប់ទាក់ទងការបាត់មុខរបស់តារាចម្រៀងសុខ ពិសី មក ផលិតកម្មសាន់ដេបានអះអាងថា ក្រុមហ៊ុនគ្រោងនឹងចេញមុខបកស្រាយជុំវិញបញ្ហានេះ ។លោក ឡាយ សុខចំរើន អ្នកគ្រប់គ្រងទូទៅរបស់ផលិតកម្មសាន់ដេ កាលពីថ្ងៃទី៤ កញ្ញា អះអាងថា ក្រុមហ៊ុនរបស់លោកត្រៀមវិធានការមួយចំនួនក្នុងការបកស្រាយជុំវិញការចុះផ្សាយពីការបាត់មុខរបស់កញ្ញា សុខ ពិសី ដោយមិនមានមូលដ្ឋានច្បាស់លាស់ ។
ក្រុមហ៊ុនគ្រោងនឹងធ្វើជាវីដេអូឃ្លីបមួយ ដើម្បីឱ្យសុខ ពិសី មានឱកាសបកស្រាយបញ្ហាទាំងឡាយទាក់ទងរូបនាងប្រាប់អ្នកសារព័ត៌មាន ។ តាមរយៈវីដេអូឃ្លីបនេះ សុខ ពិសី អាចមានឱកាសបកស្រាយពីការបាត់មុខរបស់នាងឱ្យទស្សនិកជន និងអ្នកសារព័ត៌មានបានដឹង ។
អ្នកគ្រប់គ្រងផលិតកម្មរូបនេះ អះអាងពីការបាត់មុខ សុខ ពិសី ថា នាងកំពុងតែបន្តការហាត់រៀនលើមុខជំនាញកែសម្ផស្សនៅក្នុងប្រទេសសិង្ហបុរី ហើយនាងគ្រោងនឹងបញ្ចប់ការសិក្សារបស់នាងនាពេលឆាប់ៗនេះ ។ ក្រុមហ៊ុនសាន់ដេបើកទ្វារ២៤មោ៉ោងសម្រាប់តារាចម្រៀងរូបនេះ បន្ទាប់ពីនាងបញ្ចប់វគ្គសិក្សា វិលមកកាន់អាជីពចម្រៀងជាថ្មីវិញ ហើយក្រុមហ៊ុនក៏ត្រៀមរៀបចំអាល់ប៊ុមថ្មីសម្រាប់រូបនាងផងដែរ ។
ទាក់ទងការចុះផ្សាយព័ត៌មាន លោក ឡាយ សុខចំរើន សូមឱ្យអ្នកសារព័ត៌មានទាំងអស់ទាក់ទងជាមួយក្រុមហ៊ុនដើម្បីមានឱកាសបកស្រាយបំភ្លឺចំពោះព័ត៌មានរបស់ សុខ ពិសី ។ លោកអះអាងថា សារព័ត៌មានខ្លះចុះថា នាងបោះបង់ចោលសិល្បៈ និងនិយាយខុសពីនាងច្រើន បណ្តាលឱ្យមានការប៉ះពាល់ដល់សតិអារម្មណ៍នាងយ៉ាងខ្លាំង បន្ទាប់ពីនាងធ្លាប់ប៉ះពាល់អារម្មណ៍ម្តងរួចមកហើយ រឿងបាត់បង់ម្តាយជាទីស្រឡាញ់របស់នាង ។
លោកនិយាយថា ជាធម្មតាតារាចម្រៀងមួយរូបដែលកំពុងតែល្បីនិងមានការគាំទ្រច្រើននោះគឺមិនដែលឈប់នៅពាក់កណ្តាលទីទេ គឺពួកគេចង់ដើរទៅមុខបន្តទៀត ។ សម្រាប់សុខ ពិសី ដោយសារតែនាងយល់ថា អាជីពសិល្បៈមិនអាចជួយយឹតយោងនាងជារៀងរហូតបានឡើយ ហេតុនេះនាងបានសុំការអនុញ្ញាតពីក្រុមហ៊ុនដើម្បីទៅរៀនមុខជំនាញកែសម្ផស្សបន្ថែមទៀត ហើយក្រុមហ៊ុនក៏បានអនុញ្ញាតផងដែរ ។
លោក ឡាយ សុខចំរើន យល់ថា ជាធម្មតាតារាមួយដួងល្បីល្បាញទៅបាន គឺអាស្រ័យលើការគាំទ្ររបស់ទស្សនិជន ដោយរួមទាំងផ្នែកផ្សព្វផ្សាយផងដែរ ក៏ប៉ុន្តែបើខាងប្រព័ន្ធព័ត៌មានចេះតែផ្សព្វផ្សាយរឿងអាក្រក់ផ្សេងៗនោះ គឺអាចធ្វើឱ្យតារាម្នាក់នោះបាត់ឱកាសដែលខ្លួនបានប្រឹងប្រែងកន្លងមក ។
អ្នកយកព័ត៌មានជាច្រើនបញ្ចេញប្រតិកម្មថា អ្នកយកព័ត៌មានតែងតែចង់ឱ្យអត្ថបទរបស់ខ្លួនច្បាស់លាស់ មានប្រភពអះអាងត្រឹមត្រូវ ប៉ុន្តែមានប្រភពខ្លះបដិសេធការសុំសម្ភាសន៍ ខ្លះគេចវេះ ខ្លះឆ្មើងឆ្មៃ… ដូច្នេះតើអាចដឹងព័ត៌មានច្បាស់លាស់ដោយវិធីណា ។ ជាក់ស្តែងគឺកញ្ញា សុខ ពិសី កន្លងមកពេលអ្នកយកព័ត៌មានទាក់ទងតាមទូរស័ព្ទសុំសម្ភាសន៍ គឺមិនបានឆ្លើយតបទេ។
ក្រោយពីការបាត់មុខរបស់តារាចម្រៀងសាច់សដូចបណ្តូលចេក សុខ ពិសី នោះ មានព័ត៌មានជាច្រើនចុះផ្សាយពីមូលហេតុនៃការបាត់មុខ របស់នាងដោយមួយចំនួនអះអាងថា នាងអាចនឹងចាកចេញពីសិល្បៈ ខណៈរស់នៅសោយសុខជាមួយបុរសអ្នកជំនួញម្នាក់ដែលមានទ្រព្យសម្បត្តិស្តុកស្តម្ភ ។ ខ្លះទៀតថែមទាំងបានបញ្ជាក់ថា ដោយសារតែនាងមានផ្ទៃពោះ ទើបនាងសម្រេចចិត្តបោះបង់ចោលសិល្បៈនៅពាក់កណ្តាលទី ។
ក្រោយពីមានការចុះផ្សាយព័ត៌មានទាំងនោះមកនាពេលថ្មីៗនេះ តារាចម្រៀង សុខ ពិសី ចេញមុខបកស្រាយតាមវីដេអូឃ្លីបដែលមានរយៈេពល២នាទី ថានាងគ្មានផ្ទៃពោះ និងគ្មានអ្នកជួយទំនុកបម្រុងដូចការលេចឮនោះទេ ពោល គឺនាងកំពុងតែរៀនជំនាញផ្នែកកែសម្ផស្សនៅប្រទេសសិង្ហបុរី ។
តាមរយៈវីដេអូឃ្លីបនោះ សុខ ពិសី បានបង្ហាញពីរាងកាយរបស់នាង ដើម្បីបញ្ជាក់ថា នាងពុំមានផ្ទៃពោះដូចការចុះផ្សាយរបស់សារព័ត៌មានមួយចំនួនទេ ។ នាងបញ្ជាក់ថា «នាងខ្ញុំមានការភ្ញាក់ផ្អើលណាស់ បន្ទាប់ពីបានឮដំណឹងថា មានសារព័ត៌មានក្នុងស្រុកមួយបានចុះព័ត៌មានមិនពិតពីខ្ញុំថា ខ្ញុំមានផ្ទៃពោះ តាមពិតខ្ញុំអត់មានផ្ទៃពោះអីទេ ដូចបងឃើញរាងកាយខ្ញុំស្រាប់ហើយ» ។
សុខ ពិសីបានសំណូមពរដល់អ្នកសារព័ត៌មានឈប់យល់ច្រឡំមកលើរូបនាង ជាពិសេសសម្រាប់ទស្សនិកជនក៏ដូចជាក្រុមអ្នកគាំទ្ររបស់នាងត្រូវតែជឿជាក់មកលើនាងថា នាងពិតជាមិនមានផ្ទៃពោះទេ គឺបេះដូងរបស់នាងនៅទទេ ស្អាត ។
តាមរយៈការបកស្រាយតាមវីដេអូឃ្លីបរបស់ សុខ ពិសី នាពេលនេះ គឺជាការចេញមុខជាលើកដំបូងបកស្រាយចំពោះសារព័ត៌មានដែលបានចុះផ្សាយពីនាងនាពេលថ្មីៗនេះ ។ កន្លងមកនាងហាក់មិនសូវខ្វល់ជាមួយការចុះផ្សាយពីនាងឡើយ ដោយនាងបានទុកឱ្យព័ត៌មានទាំងនោះជះឥទ្ធិពលអាក្រក់មកលើអាជីពរបស់នាង ។យុវវ័យមួយចំនួនដែលនិយមគាំទ្រទឹកដមសំនៀងរបស់ សុខ ពិសី នឹងរង់ចាំមើលថា តារាចម្រៀងរូបនេះ អាចចេញបទចម្រៀងថ្មីៗបន្តទៀតនាពេលណា ហើយការចុះផ្សាយពីនាងនាពេលកន្លងមកនោះ អាចពិតឬយ៉ាងណា ៕
ចែករំលែកព័តមាននេះ