រាជធានីភ្នំពេញ ៖ បន្ទាប់ពីមានអំពើប្លន់អាជីវករលក់មាស-ប្តូរប្រាក់នៅមុខផ្សារធំទួលសង្កែ ហៅផ្សារសាំហាន់ ក្នុងសង្កាត់ទួលសង្កែ ខណ្ឌឫស្សីកែវ ក្នុងទីប្រជុំជន និងក្បែរប៉ុស្តិ៍គោលដៅរបស់ប៉ូលិស២៤ម៉ោងមក លោកឧត្តមសេនីយ៍ត្រី ទូច ណារ៉ុថ ស្នងការនគរបាលរាជធានីភ្នំពេញ មុខមាំឡើងក្រហម បានមានប្រតិកម្មយ៉ាងខ្លាំង និងធ្វើការគំរាមលោកអធិការ លោកមេប៉ុស្តិ៍ ឱ្យធ្វើលិខិតលាលែងពីតំណែង បើស្រាវជ្រាវចាប់ក្រុមចោរប្លន់មិនបាន ។
ការមានប្រតិកម្មនេះ ត្រូវគេដឹងថា បន្ទាប់ពីមានអំពើប្លន់កាលពីវេលាម៉ោង៧ និង១០នាទីយប់ថ្ងៃទី៣ កញ្ញា ដែលក្រុមចោរប្លន់មានបក្សពួកចំនួន៤នាក់ ប្រដាប់អាវុធខ្លី២ដើម និងពូថៅបានធ្វើសកម្មភាពវាយបំបែកទូដាក់តាំងលក់គ្រឿងអលង្ការពីអាជីវករលក់គ្រឿងអលង្ការយីហោជាងខេង យកអស់ប្រមាណជាង២០តម្លឹង ប្លាទីន ។ លោកស្នងការបានធ្វើការគំរាម និងស្តីបន្ទោសជាចំហតាមវិទ្យុទាក់ទង ខណៈពេលកម្លាំងចម្រុះបានចុះត្រៀបត្រានៅមុខផ្ទះកើតហេតុដើម្បីសួរនាំ និងក្នុងចំណោមប្រជាពលរដ្ឋដែលភាគច្រើនជាអាជីវករដែលឈរជុំជិតក្បែរមន្ត្រីសមត្ថកិច្ចនោះ ។ លោកឧត្តមសេនីយ៍ត្រី បានចោទសួរថា តើអស់លោករវល់ទៅណា ដែលបណ្តោយឱ្យចោរធ្វើសកម្មភាពប្លន់បាននៅក្បែរគោលដៅប៉ូលិសបែបនេះ ។
គេចាត់ទុកថា នេះជាសំណាងហើយដែលក្រុមចោរប្លន់មិនមានការប៉ះទង្គិចគ្នាជាមួយសមត្ថកិច្ចបើសិនជាមានអន្តរាគមន៍ និងបានបាញ់តដៃគ្នាច្បាស់ជាមានមនុស្សគ្រោះថ្នាក់មិនតិចនាក់នោះទេ ព្រោះអំពើប្លន់ចំទីប្រជុំជន អ៊ូអរព្រោះកម្មករចេញពីធ្វើការចេញចូលផ្សាររកទិញអីវ៉ាន់ ។
តាមព័ត៌មានឱ្យដឹងថា អំពើប្លន់បានកើតឡើងកាលពីវេលាម៉ោង៧ និង១០នាទីយប់ថ្ងៃទី៣ កញ្ញា ឆ្នាំ២០១២ នៅមុខផ្សារធំទួលសង្កែ ហៅផ្សារសាំហាន់ នៅផ្ទះលក់-ទិញមាស និងប្តូរប្រាក់ យីហោជាងខេង ស្ថិតនៅផ្ទះលេខ០៥១ហ្សេ ក្រុមទី១២ ភូមិទួលសង្កែ សង្កាត់ទួលសង្កែ ខណ្ឌឫស្សីកែវ ដែលម្ចាស់ឈ្មោះប៉េង សុខខេង ភេទប្រុស អាយុ៣៨ឆ្នាំ និងប្រពន្ធឈ្មោះវ៉ន វិសិដ្ឋ អាយុ៤៣ឆ្នាំ ។
តាមសមត្ថកិច្ចឱ្យដឹងថា ក្រុមចោរប្លន់មានបក្សពួកចំនួន៤នាក់ ជិះម៉ូតូម៉ាកឌ្រីមសេ១២៥ ចំនួន២គ្រឿង ប្រដាប់អាវុធខ្លី២ដើម និងពូថៅ ដែល៣នាក់បានចុះមកធ្វើសកម្មភាពវាយបំបែកទូដាក់តាំងគ្រឿងអលង្ការ ហើយប្រមូលយកប្លាទីនគ្រឿង ដាក់ក្នុងថង់ក្រណាត់ ហើយគេចខ្លួនបាត់ ។ នៅក្នុងសកម្មភាពនោះក្រុមចោរបានវាយបាក់ដងពូថៅ ហើយបានបន្សល់ទុកកាបូប១ និងដងពូថៅនៅកន្លែងកើតហេតុ ។
តាមសម្តីឈ្មោះប៉េង សុខខេង ដែលជាអាជីវករលក់គ្រឿងអលង្ការនោះបានឱ្យដឹងថា គ្រឿងអលង្ការដែលត្រូវចោរប្លន់យកនោះមានចំនួនជាង២០តម្លឹងក្នុងចំណោមគ្រឿងអលង្ការប្រមាណ៩០តម្លឹង ដែលដាក់តាំងលក់ក្នុងទូចំនួន២ ។
អាជីវកររូបនោះបានឱ្យដឹងថា នៅមុនពេលកើតហេតុ គាត់រួមទាំងប្រពន្ធបានអង្គុយលក់ និងបម្រុងជញ្ជូនអីវ៉ាន់ចូលផ្ទះទៅហើយ ស្រាប់តែមានជនមិនស្គាល់មុខចំនួន២នាក់មកដល់ដោយម្នាក់បានយកពូថៅវាយបំបែកទូដាក់តាំង១ក្នុងចំណោមទូ២ និងម្នាក់បានដកកាំភ្លើងខ្លីពណ៌សភ្ជង់ និងវាយបំបែកទូដែរ ។ ដោយឃើញបែបនេះប្រពន្ធគាត់បានរត់ចូលក្នុងផ្ទះ ហើយគាត់បានរត់គេចទៅចំហៀងផ្ទះស្រែកចោរៗ ។ ខណៈនោះគាត់ឃើញជនម្នាក់ទៀតចូលមកប្រមូលគ្រឿងអលង្ការប្លាទីនដាក់ក្នុងថង់ក្រណាត់ជាមួយជន២នាក់ដែលចូលធ្វើសកម្មភាព ។ បន្ទាប់ពីប្រមូលបាន ក្រុមចោរមានគ្នា៣នាក់នោះបានរត់ឡើងជិះម៉ូតូ២គ្រឿងមានគ្នា៤នាក់គេចទៅទិសខាងកើតបាត់ទៅ ។ ទោះបីជាយ៉ាងណា គេសង្ស័យថា ក្រុមចោរអាចមានបក្សពួកលើសពីនេះ ដែលចាំបិទគូទ ។
នៅយប់នោះមានការភ្ញាក់ផ្អើលយ៉ាងខ្លាំង ប៉ូលិស និងប៉េអឹម បានចុះទៅដល់កន្លែងកើតហេតុ ពេលចោរប្លន់ចេញផុត និងឃើញកាបូបមួយ និងដងពូថៅដែលក្រុមចោរបន្សល់ទុក ។ សមត្ថកិច្ចត្រូវបានទទួលចុះបញ្ជាទៅកន្លែងកើតហេតុរុករកក្រុមជនសង្ស័យ ហើយរកឃើញអាវមួយប្រឡាក់សុទ្ធឈាម ព្រមទាំងស្រោមដៃដែលគេអះអាងថាជារបស់ក្រុមចោរបន្សល់ទុកនៅម្តុំវត្តទួលសន្តិវ័ន ហៅវត្តទួលអស់លោក ក្នុងសង្កាត់គីឡូម៉ែត្រលេខ៦ ។
គួរបញ្ជាក់ថា ផ្សារធំទួលសង្កែហៅផ្សារសាំហាន់ ជាទីប្រជុំជនអូ៊អររបស់កម្មករដែលអាជីវករបានលក់ដូររហូតដល់ម៉ោង៩យប់ ។ ផ្សារនេះត្រូវបានក្រុមចោរធ្វើសកម្មភាពជាច្រើនលើកមកហើយ ពេលដែលអាជីវកររើគ្រឿងអលង្ការវិលធ្វើដំណើរទៅផ្ទះ ទោះបីប៉ូលិសបានបង្កើតប៉ុស្តិ៍មួយ និងគោលដៅ២៤ម៉ោងក្បែរនោះក៏ដេោយ ។ ម្យ៉ាងទៀតសន្តិសុខផ្សារសុទ្ធតែមានកាំភ្លើងអាកា តែពុំអាចទប់ស្កាត់ និងបង្ក្រាបក្រុមចោរបានឡើយ ។
តាមព័ត៌មានឱ្យដឹងថា បន្ទាប់ពីលោកស្នងការធ្វើការគំរាម និងស្តីបន្ទោសនៅព្រឹកថ្ងៃទី៤ កញ្ញា លោកអធិការ អធិការរង២នាក់ និងលោកនាយប៉ុស្តិ៍ទួលសង្កែ ព្រមទាំងមន្ត្រី២នាក់ដែលប្រចាំការគោលដៅ២៤ម៉ោងត្រូវលោកស្នងការហៅ ឬអញ្ជើញទៅណែនាំផងដែរ ទំនងប្រហែលដុះក្អែលមិនតិចទេមើលទៅ ៕
ចែករំលែកព័តមាននេះ