រាជធានីភ្នំពេញ ៖ កម្មករចំនួន៥នាក់ ដែលត្រូវសមត្ថកិច្ចឃាត់ខ្លួនកាលពីរសៀលថ្ងៃទី៣០ ខែសីហា ឆ្នាំ២០១២ ដើម្បីយកមកសាកសួរករណីយកគ្រឿងចក្រមកឈូសពង្រាបដី នៅចំណុច ដែលអនុក្រឹត្យបានកំណត់ថាជាសម្បត្តិសាធារណៈរបស់រដ្ឋនោះ បានត្រូវតុលាការសម្រេចដោះលែងឱ្យមានសេរីភាពវិញកាលពីព្រឹកថ្ងៃទី៤ ខែកញ្ញា ឆ្នាំ២០១២ ។ ចំណែកលោកស្រីឈិន សុគន្ធា
រាជធានីភ្នំពេញ ៖ កម្មករចំនួន៥នាក់ ដែលត្រូវសមត្ថកិច្ចឃាត់ខ្លួនកាលពីរសៀលថ្ងៃទី៣០ ខែសីហា ឆ្នាំ២០១២ ដើម្បីយកមកសាកសួរករណីយកគ្រឿងចក្រមកឈូសពង្រាបដី នៅចំណុច ដែលអនុក្រឹត្យបានកំណត់ថាជាសម្បត្តិសាធារណៈរបស់រដ្ឋនោះ បានត្រូវតុលាការសម្រេចដោះលែងឱ្យមានសេរីភាពវិញកាលពីព្រឹកថ្ងៃទី៤ ខែកញ្ញា ឆ្នាំ២០១២ ។ ចំណែកលោកស្រីឈិន សុគន្ធារី ប្រធានក្រុមប្រឹក្សាភិបាលក្រុមហ៊ុនឡាយីម៉ិចហូលឌីងគ្រុប ជាអ្នកជួលកម្មករទាំងនោះពុំទាន់ដឹងថាតុលាការសម្រេចយ៉ាងណានៅឡើយទេ ។
ក្នុងបណ្តឹងតវ៉ាទៅរដ្ឋមន្ត្រីក្រសួងធនធានទឹក និងឧតុនិយម និងជាប្រធានគណៈកម្មការកំណត់ទីតាំងបឹងបួរ ចុះថ្ងៃទី២៤ ខែសីហា ឆ្នាំ២០១២ លោកស្រីឈិន សុគន្ធារី បានបញ្ជាក់ថាក្រុមហ៊ុនឡាយីម៉ិចហូលឌីងគ្រុប បានប្រមូលទិញដីទំហំ៣៤២.២៣៦,៨៩ម²ពីប្រជាពលរដ្ឋដែលបានកាន់កាប់ គ្រប់គ្រង ប្រើប្រាស់ និងអាស្រ័យផលតាំងពីឆ្នាំ១៩៧៩ មក ម៉្លេះហើយដីនេះភាគខ្លះជាដីលំនៅឋាន ដីស្រែប្រាំង និងដីចម្ការឈូក ហើយប្រជាពលរដ្ឋទាំងនោះបានផ្ទេរសិទិ្ឋមកឱ្យក្រុមហ៊ុនកាន់កាប់គ្រប់គ្រងបន្តតាំងពីឆ្នាំ១៩៩៩ រហូតមកដល់បច្ចុប្បន្ន ។ នៅចន្លោះពេលនោះក្រុមហ៊ុនបានចាក់ដី និងបានបង់ពន្ធលើអចលនទ្រព្យជូនរដ្ឋរួចជាស្រេចនៅឆ្នាំ២០១១ ហើយក្នុងនោះក្រុមហ៊ុនក៏មានគម្រោងប្លង់អភិវឌ្ឍន៍រួចស្រេចផងដែរ ។
នៅថ្ងៃទី៤ ខែឧសភា ឆ្នាំ២០០៥ ក្រុមហ៊ុនបានធ្វើសំណើរសុំធ្វើប័ណ្ណកាន់កាប់ដីធ្លីទៅមន្ទីររៀបចំដែនដី នគរូបនីយកម្ម សំណង់ និង សុរិយោដី រាជធានីភ្នំពេញម្តងរួចមកហើយ និងក្រុមហ៊ុនបានដាក់ពាក្យស្នើសុំជាបន្តបន្ទាប់រហូតមកដល់សព្វថ្ងៃនេះ ។ ចំពោះការស្នើសុំនេះ សាលារាជធានីភ្នំពេញបានចេញលិខិតឆ្លើយតបលេខ១៣៨ឆត.សម ចុះថ្ងៃទី១ ខែមិថុនា ឆ្នាំ២០០៥ ឱ្យក្រុមហ៊ុនរង់ចាំការធ្វើប្រឡាយមេខាងជើង និងស្ថានីយបូមទឹកកប់ស្រូវហើយសិន តែឥឡូវនះបានសាងសង់រួចរាល់ជាស្ថាពរអស់ហើយ ។
យោងតាមលិខិតលេខ៦២៨ ស.ជ.ណ ចុះថ្ងៃទី២០ ខែមេសា ឆ្នាំ២០០៥ ដែលកំណត់ផ្ទៃបឹងទំហំ១៥៧ហិកតា ឥឡូវនេះរក្សាទុកតែ២០ហិកតា ហើយ២០ហិកតានេះទៀតសោត រក្សាទុកតែតំបន់ជ្រៅ និងលិចទឹកជាប្រចាំតែប៉ុណ្ណោះ ឃើញថាខុសពីដីក្រុមហ៊ុនដែលជាដីគោកជាប់ផ្លូវកៅស៊ូ លេខ១៩២៨ ស្ថិតក្នុងភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ។លិខិតលេខ៦៩៩ ធ.ទ.ឧ ចុះថ្ងៃទី៣ ខែមេសា ឆ្នាំ២០១២ របស់ក្រសួងធនធានទឹក និង ឧតុនិយម ត្រង់ចំណុច III-ក- ការរក្សាទុកផ្ទៃបឹងដោយមានចំណារឯកភាពពីសម្តេចនាយករដ្ឋមន្ត្រីចុះថ្ងៃទី៩ ខែមេសា ឆ្នាំ២០១២ បានកំណត់យ៉ាងច្បាស់ថា ជាសរុបមកតំបន់បឹង ពោងពោយនៅសល់ផ្ទៃអាងស្តុកទឹកសរុបចំនួន៥៣,៥១ហិកតា ដែលក្នុងនោះមាន ៖
១- ផ្ទៃបឹងពោងពាយខាងត្បូងទំហំ៧,៥១ហិកតា
២-ប្រឡាយមេនាំទឹកដែលមានស្រាប់មានទំហំ២៦ហិកតា
និង ទី-៣ បឹងពោងពាយខាងជើងដែលត្រូវរក្សាទុក២០ហិកតា (ជាចំណុចដូច សម្តេចនាយករដ្ឋមន្ត្រីបានលើកឡើងកន្លងមកថាជាតំបន់ជ្រៅនិងលិចទឹកជាប្រចាំ) ។
ដូច្នេះយោងតាមលិខិតនេះ និងការកំណត់ព្រំបឹង ព្រមទាំងធ្វើប្រឡាយបានបញ្ចប់ជាផ្លូវការហើយនោះបញ្ជាក់ឱ្យឃើញថា ដីក្រុមហ៊ុនពុំមានពាក់ព័ន្ធនឹងដីបឹងទេ ហើយក្រុមហ៊ុនបានសំណូមពរឱ្យអាជ្ញាធរកាត់ដីដែលមានទំហំជាង៣៤ហិកតា ដែលមានទីតាំងនៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ជាកម្មសិទិ្ធរបស់ក្រុមហ៊ុនឡាយីម៉ិចហូលឌីងគ្រុប ចេញពីអនុក្រឹត្យលេខ១០១ អនក្រ.បក ចុះថ្ងៃទី១០ ខែកក្កដា ឆ្នាំ២០១២ស្តីពីការកំណត់ផ្ទៃបឹងពោងពាយខាងជើង និងពោងពាយខាងត្បូង ស្ថិតក្នុងសង្កាត់ភ្នំពេញថ្មី សង្កាត់ឃ្មួញ ខណ្ឌសែនសុខ និងសង្កាត់ទួលសង្កែ ខណ្ឌប្ញស្សីកែវ រាជធានីភ្នំពេញ ជាសម្បត្តិសាធារណៈរបស់រដ្ឋ ដើម្បីក្រុមហ៊ុនមានលទ្ធភាពក្នុងការអភិវឌ្ឍន៍យ៉ាងឆាប់នាពេលខាងមុខនេះ ។
នៅថ្ងៃទី៩ ខែកក្កដា ឆ្នាំ២០១២ ក្រុមហ៊ុនបានដាក់លិខិតស្នើជូនទៅ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីសុំអភិវឌ្ឍន៍និងសុំការចេញប័ណ្ណសម្គាល់កម្មសិទ្ធិរឹងចំពោះដីរបស់ខ្លួនឱ្យបានស្មើមុខ នឹងម្ចាស់ដី ឬក្រុមហ៊ុនដទៃទាំងនោះ ហើយសម្តេចបានធ្វើចំណារណែនាំឱ្យលោករដ្ឋមន្ត្រីក្រសួងធនធានទឹកនិងឧតុនិយមពិភាក្សាជាមួយលោកអភិបាលនៃគណៈអភិបាលរាជធានីភ្នំពេញ ដើម្បីផ្តល់មតិ ។
នៅចន្លោះពេលដែលការរង់ចាំផ្តល់មតិជូនសម្តេចតេជោ ហ៊ុន សែននោះ ស្រាប់តែនៅថ្ងៃទី២៩ ខែសីហា ឆ្នាំ២០១២ មានមន្ត្រីជំនាញចុះវាស់វែងកំណត់ផ្ទៃដីបឹងពោងពាយខាងជើង ដោយវាស់ចូលដីរបស់ក្រុមហ៊ុនធ្វើឱ្យបាត់ផ្ទៃដីប្រមាណ៣៣ហិកតា និងនៅថ្ងៃបន្ទាប់ទី៣០ ខែសីហា ឆ្នាំ២០១២ មានបញ្ជាឱ្យរឹបអូសគ្រឿងចក្រចំនួន២គ្រឿង និងចាប់ខ្លួនមនុស្សចំនួន៥នាក់ ដែលធាតុពិតក្រុមហ៊ុនបានជួលឱ្យឈូសពង្រាបដីនោះ ក្រោយពីមានលិខិតអនុញ្ញាតត្រឹមត្រូវពីអាជ្ញាធរមូលដ្ឋាន ។
ជុំវិញបញ្ហាខាងលើនេះក្រុមហ៊ុនយល់ឃើញថា ករណីនេះមិនគួរកើតឡើងនៅមុនពេលដែលលោករដ្ឋមន្ត្រីក្រសួងធនធានទឹក និងឧតុនិយម និង លោកអភិបាលនៃគណៈអភិបាលរាជធានីភ្នំពេញបានផ្តល់មតិជូនសម្តេច តាមចំណារណែនាំដ៏ខ្ពង់ខ្ពស់នោះឡើយ ពោលគឺត្រូវរង់ចាំសេចក្តីសម្រេចដ៏ខ្ពង់ខ្ពស់ពីសំណាក់សម្តេចតេជោ ហ៊ុន សែន ជាមុនសិន សឹមអនុវត្តជាក្រោយ ។
ក្រុមហ៊ុនរង់ចាំទទួលនិងអនុវត្តជានិច្ចតាមសេចក្តីសម្រេចដ៏ខ្ពង់ខ្ពស់របស់ សម្តេចតេជោហ៊ុន សែន លើលិខិតស្នើសុំអភិវឌ្ឍន៍ និងសុំប័ណ្ណសម្គាល់សិទ្ធិកាន់កាប់ដី ដែលបានស្នើឡើង ហើយតំណាងក្រុមហ៊ុនក៏ត្រៀមខ្លួនជានិច្ចដើម្បីបំភ្លឺជូនតុលាការ កាលបើមានដីកាកោះតាមនីតិវិធីធម្មតា ។ ប៉ុន្តែនៅពេលចំពោះមុខនេះតំណាងក្រុមហ៊ុនសូមជម្រាបជូនសម្តេចតេជោ ហ៊ុន សែន ជាទីគោរពថា ប្រធានក្រុមប្រឹក្សាភិបាលក្រុមហ៊ុនបានបង្ខំចិត្តលាក់ខ្លួនជាបណ្តោះអាសន្ន ដើម្បីជៀសវាងគ្រោះថ្នាក់ដោយការចេញដីកាចាប់ខ្លួនជាយថាហេតុ ៕
ចែករំលែកព័តមាននេះ