ខេត្តក្រចេះ ៖ លោក សរ ចំរ៉ុង អភិបាលខេត្ត កាលពីព្រឹកថ្ងៃទី៣ កញ្ញា បានអញ្ជើញជាអធិបតីក្នុងពិធីបើកយុទ្ធនាការផ្សព្វផ្សាយការិយាល័យច្រកចេញចូលតែមួយនៅសាលាក្រុងក្រចេះ ។ក្នុងពិធីបើកយុទ្ធនាការផ្សព្វផ្សាយការិយាល័យច្រកចេញចូលតែមួយ ដែលបានដំណើរការពេញមួយព្រឹកនោះ មានការចូលរួមពីសំណាក់លោក-លោកស្រីអភិបាលរង ស្នងការរងនគរបាលខេត្ត បញ្ជាការរងកងកម្លាំងប្រដាប់អាវុធ អភិបាលក្រុង លោក-លោកស្រីប្រធានមន្ទីរអង្គភាពជំុវិញខេត្ត ដោយរៀបចំជាក្បួនដង្ហែដើម្បីផ្សព្វផ្សាយនៅតាមដងផ្លូវសាធារណៈមួយចំនួនក្នុងក្រុងក្រចេះ ។
លោក កាន់ វិទ្ធី អភិបាលស្តីទីក្រុងក្រចេះ បានឱ្យដឹងថា ការរៀបចំបើកយុទ្ធនាការផ្សព្វផ្សាយនេះ ធ្វើឡើងក្នុងគោលបំណងផ្តល់ព័ត៌មានឱ្យបានទូលំទូលាយ ស្តីពីការផ្តល់សេវាជូនប្រជាពលរដ្ឋតាមនីតិវិធីសាមញ្ញ មានតម្លាភាព និងមានការកំណត់ពេលវេលាច្បាស់លាស់នៅកន្លែងតែមួយតាមរយៈការប្រមូលផ្តុំសេវាកម្មដែលក្រសួងជំនាញធ្វើប្រតិភូកម្មដល់រដ្ឋបាលក្រុងក្រចេះ សំដៅធ្វើឱ្យសម្រេចជោគជ័យនូវសេចក្តីសម្រេចលេខ ១២ ស.ស.រ របស់រាជរដ្ឋាភិបាល និងសេចក្តីប្រកាសលេខ ៩២៧៩២៨ របស់ក្រសួងមហាផ្ទៃ ដែលការផ្សព្វផ្សាយនេះធ្លាប់បានធ្វើក្នុងឆ្នាំកន្លងទៅជាបន្តបន្ទាប់រួចមកហើយដែរ ។
លោក សរ ចំរ៉ុង អភិបាលខេត្តក្រចេះ មានប្រសាសន៍សំណេះសំណាល និងអបអរសាទរចំពោះមន្ត្រីរាជការទាំងអស់ដែលបម្រើការងារនៅការិយាល័យច្រកចេញចូលតែមួយ និងការិយាល័យប្រជាពលរដ្ឋ ដែលជាទីកន្លែងផ្តល់សេវាសាធារណៈជូនប្រជាពលរដ្ឋប្រកបដោយសុក្រឹតភាព និងភាពមិនលំអៀង មិនមានអំពើពុករលួយ ។ ជាពិសេស ថ្ងៃនេះការិយាល័យច្រកចេញចូលតែមួយបានរៀបចំយុទ្ធនាការផ្សព្វផ្សាយព័ត៌មានច្រកចេញចូលតែមួយ ដើម្បីឱ្យប្រជាពលរដ្ឋយល់ដឹងបន្ថែមទៀត ទាក់ទិនទៅនឹងការមកទទួលសេវាសាធារណៈ និងដាក់បណ្តឹងតវ៉ាផ្សេងៗដែលយល់ថាមិនសមស្រប ។លោកអភិបាលខេត្តបានថ្លែងថា ក្នុងនាមមន្ត្រីបម្រើការជូនរាជរដ្ឋាភិបាល ជូនប្រជាពលរដ្ឋ ត្រូវប្រកាន់ឱ្យបាននូវក្រមសីលធម៌ សុជីវធម៌ ហើយកុំប្រព្រឹត្តជាដាច់ខាតនូវអំពើសីុសំណូកសូកប៉ាន់ដែលអាចធ្វើឱ្យប៉ះពាល់ដល់កិត្តិយស និងការងារ ៕
ចែករំលែកព័តមាននេះ