រាជធានីភ្នំពេញ ៖ បុរសម្នាក់ដែលគេអះអាងថា ជាអនុរក្ស ឬឆ្មាំពន្ធនាគារព្រៃស(ម១) ហើយក៏ជាមនុស្សញៀនថ្នាំផងនោះ បានដណ្តើមកាំភ្លើងអាកាស្វ័យបត់១ដើម ពីមន្ត្រីនគរបាលខណ្ឌចំការមនម្នាក់ដែលកំពុងយាមល្បាតនៅភូមិសាស្រ្តតាមផ្លូវលេខ១៩៩ ស្ថិតក្នុងសង្កាត់ទំនប់ទឹក ខណ្ឌចំការមន កាលពីវេលាម៉ោង១០និង២០នាទីព្រឹក ថ្ងៃទី១៨ កក្កដា ហើយយកកាំភ្លើងនោះទៅបាញ់រះលើមនុស្សពីរគ្រួសារបណ្តាលឱ្យស្លាប់ម្នាក់ និងរបួស៥នាក់ រួចបាញ់សម្លាប់ខ្លួនឯងនៅមុខផ្ទះលេខ៤១៨ ផ្លូវលេខ២៧១ សង្កាត់ទំនប់ទឹក ខណ្ឌចំការមន នៅទល់មុខមន្ទីរពេទ្យមិត្តភាពខ្មែរ-សូវៀត ។ ហេតុការណ៍នេះ បានធ្វើឱ្យមានការភ្ញាក់ផ្អើលជាខ្លាំងនៅលើកំណាត់ផ្លូវលេខ២៧១ ។
មន្ត្រីប៉ូលិសយាមពន្ធនាគារដែលប្រព្រឹត្តសកម្មភាពដូចខាងលើនេះ ឈ្មោះសូ វុទ្ធី ហៅពុំ អាយុជាង៣០ឆ្នាំ មានទីលំនៅភូមិចំរើនផល សង្កាត់បឹងទំពុន ខណ្ឌមានជ័យ ។ តាមប្រភពព័ត៌មាន មុនពេលកើតហេតុ សូ វុទ្ធី បានដណ្តើមកាំភ្លើងពីឈ្មោះប៊ិន ធី អាយុ៤០ឆ្នាំ ជាមន្ត្រីនគរបាលប៉ុស្តិ៍ទំនប់ទឹក ខណ្ឌចំការមន ដែលទទួលភារកិច្ចដើរយាមល្បាតនៅតាមផ្លូវលេខ១៩៩ ក្នុងប្លុកផ្សារសុវណ្ណា ហើយតែងឈប់សម្រាកនៅមុខផ្ទះលេខ៣៤ ជាហាងលក់មាស យីហោ៥មករា តាមបណ្តោយផ្លូវលេខ១៩៩ ។
តាមប្រភពព័ត៌មានទាក់ទងនឹងហេតុការណ៍ខាងលើនេះ បានឱ្យដឹងទៀតថា ក្រោយពេលឈ្មោះសូ វុទ្ធី ដណ្តើមកាំភ្លើងបានពីឈ្មោះ ប៊ិន ធី ហើយឈ្មោះ សូ វុទ្ធី បានរត់តាមបណ្តោយផ្លូវលេខ១៩៩ ក្នុងទិសដៅពីជើងទៅត្បូង លុះមកដល់លើផ្លូវលេខ២៧១ ក៏រត់តម្រង់មកមុខមន្ទីរពេទ្យមិត្តភាពខ្មែរ-សូវៀត ។ ពេលមកដល់ផ្លូវបំបែកមុខមន្ទីរពេទ្យមិត្តភាពខ្មែរ-សូវៀតក៏រត់ចុះតាមផ្លូវច្រកស្ពានទីមួយ ដោយកាន់កាំភ្លើងអាកាជាប់នឹងដៃ ហើយរត់តាមមាត់ប្រឡាយលូបង្ហូរទឹកសំអុយបឹងទំពុនចូលទៅក្នុងផ្ទះជួលមួយនៅប្របមាត់ប្រឡាយ ក៏ធ្វើសកម្មភាពបាញ់រះលើមនុស្សមួយគ្រួសារដែលកំពុងស្នាក់នៅក្នុងបន្ទប់ បណ្តាលឱ្យរងរបួសមនុស្ស៤នាក់ ។ ក្រោយពេលបាញ់មួយប្រាវហើយ ឈ្មោះសូ វុទ្ធី បានរត់តាមច្រកឌឿងហែម (ផ្លូវតូច) មួយឡើងតម្រង់មកលើផ្លូវលេខ២៧១ ក៏បន្តបាញ់រះលើស្ត្រី២នាក់នៅផ្ទះលក់គ្រឿងទេស យីហោម៉ូវ ហេង បណ្តាលឱ្យរងរបួសយ៉ាងធ្ងន់ធ្ងរ ហើយឈ្មោះសូ វទ្ធី បានបាញ់សម្លាប់ខ្លួនឯងត្រង់ក្រោមចង្កាធ្លាយឡើងទៅក្បាលស្លាប់ផ្កាប់មុខក្នុងថ្លុកឈាម ។
តាមប្រភពព័ត៌មានពីក្រុមសមត្ថកិច្ចដែលចុះទៅពិនិត្យកន្លែងកើតហេតុខាងលើនេះបានឱ្យដឹងថា អ្នកស្លាប់ក្នុងហេតុការណ៍ខាងលើនេះឈ្មោះហេង ស៊ីនី ភេទស្រី អាយុ៣៤ឆ្នាំ ស្នាក់នៅផ្ទះលេខ៤១៦ ផ្លូវលេខ២៧១ សង្កាត់ទំនប់ទឹក ខណ្ឌចំការមន បានរងរបួសដោយគ្រាប់កាំភ្លើងអាកា ដែលឈ្មោះសូ វុទ្ធី បាញ់រះចំលើដោះខាងឆ្វេងធ្លាយទៅពោះខាងស្តាំ បណ្តាលឱ្យស្លាប់ក្រោយពេលបញ្ជូនទៅដល់មន្ទីរពេទ្យមិត្តភាពខ្មែរ-សូវៀតដែលនៅក្បែរនោះ។ ចំណែកឯអ្នករងរបួស៥នាក់ផ្សេងទៀតទី១- ឈ្មោះងួន ហេង ភេទស្រី អាយុ៥៨ឆ្នាំ រងរបួសចំស្មាខាងឆ្វេង និងស្មាខាងស្តាំ ទី២-ឈ្មោះអ៊ុក ឧត្តម ភេទប្រុស អាយុ២៧ឆ្នាំ ទី៣-ឈ្មោះពិសី ភេទស្រី អាយុ២៥ឆ្នាំ ត្រូវរបួសចង្កេះខាងឆ្វេងធ្លាយទៅខាងស្តាំ ទី៤-ឈ្មោះម៉ៅ ស្រីទីន អាយុ១៦ឆ្នាំ ត្រូវថ្ពាល់ខាងស្តាំ និងទី៥-ឈ្មោះម៉េង ឈុន ភេទប្រុស ត្រូវដោះខាងឆ្វេង ។
ប្រភពពីសមត្ថកិច្ចបញ្ជាក់ថា មូលហេតុដែលបណ្តាលឱ្យមានមនុស្សរងរបួសធ្ងន់ធ្ងរច្រើននាក់បែបនេះ ដោយសារតែនៅកន្លែងកើតហេតុមានបន្ទប់ផ្ទះជួលច្រើន ហើយពេលដែលឈ្មោះសូ វុទ្ធី ធ្វើការបាញ់រះនៅកន្លែងកើតហេតុមានមនុស្សស្នាក់នៅជុំគ្នាច្រើននាក់ ។
លោកទូច ណារ៉ុថ ស្នងការរាជធានីភ្នំពេញមានប្រសាសន៍នៅកន្លែងកើតហេតុថា អំពើបាញ់ប្រហារខាងលើនេះ គឺជនល្មើសបានធ្វើសកម្មភាពដោយការលបធាក់មន្ត្រីនគរបាលម្នាក់ដែលកំពុងដើរល្បាតនៅលើដងផ្លូវលេខ១៩៩ពីក្រោយ បណ្តាលឱ្យមន្ត្រីនគរបាលរូបនោះដួល ហើយជនល្មើសក៏ឆក់យកកាំភ្លើងមកបាញ់រះនៅកន្លែងកើតហេតុ បណ្តាលឱ្យមានអ្នកស្លាប់ និងរបួស រួចជនល្មើសបាញ់សម្លាប់ខ្លួនឯង ។ លោកស្នងការបាននិយាយថា ជនល្មើសធ្វើសកម្មភាព គឺផ្តើមឡើងពីរឿងមានគំនុំអ្វីមួយ តែលោកស្នងការមិនបានធ្លាយឱ្យដឹងពីគំនុំអ្វីទេ។
តាមការរៀបរាប់របស់ លោកប៊ិន ធី ដែលជាម្ចាស់កាំភ្លើងអាកា និយាយថា ជនល្មើសពិតជាបានធាក់និងវាយលើរូបលោកដណ្តើមយកអាវុធពិតប្រាកដមែន ។ មន្ត្រីរូបនេះនិយាយបន្តថា ពេលដែលជនល្មើសដណ្តើមយកកាំភ្លើងពីខ្លួនបានហើយ គឺរូបគាត់ខំប្រឹងរត់តាមដើម្បីយកកាំភ្លើងវិញដែរ តែត្រូវជនល្មើសអាម៉េកាំភ្លើងតម្រង់ដាក់ ទើបអត់ហ៊ានប្រថុយជីវិតចូលទៅជិតជាហេតុធ្វើឱ្យជនល្មើសយកកាំភ្លើងទៅបាញ់រះបង្កជាគ្រោះថ្នាក់បង្ហូរឈាមធ្ងន់ធ្ងរកើតឡើង ។ លោកធី ត្រូវបានសមត្ថកិច្ចនគរបាលខណ្ឌចំការមន ជាមេកើយឃាត់ខ្លួនបញ្ជូនទៅអធិការដ្ឋាននគរបាលខណ្ឌផងដែរ ព្រោះតែជាម្ចាស់កាំភ្លើងដែលគ្មានការប្រុងប្រយ័ត្នខ្ពស់ ។
ក្រុមអ្នកស្គាល់ឈ្មោះ សូ វុទ្ធី ជាជនបង្កហេតុខាងលើនេះនិយាយថា ឈ្មោះសូ វុទ្ធី ជាមនុស្សញៀនថ្នាំម្នាក់ ហើយនៅចំណុចកើតហេតុមានអំពើបាញ់ប្រហារខាងលើនេះ ក៏ជាតំបន់ចែកចាយថ្នាំញៀនផងដែរ ។ ដូច្នេះការប្រព្រឹត្តពីសំណាក់ឈ្មោះសូ វុទ្ធី គឺបណ្តាលមកពីរូបគេញៀនថ្នាំខ្លាំង និងមានគំនុំអ្វីមួយជាមួយក្រុមអ្នកលក់ថ្នាំហើយមើលទៅ ៕
ចែករំលែកព័តមាននេះ