រាជធានីភ្នំពេញ ៖ កាលពីព្រឹកថ្ងៃទី១១ មេសា សមត្ថកិច្ចនគរបាលមន្ទីរប្រឆាំងគ្រឿងញៀនក្រសួងមហាផ្ទៃបានបញ្ជូនខ្លួនជន២នាក់បងប្អូនពាក់ព័ន្ធគ្រឿងញៀនដែលកាលពីថ្ងៃព្រហស្បតិ៍ ទី៧ មេសា កន្លងទៅត្រូវសមត្ថកិច្ចដេញចាប់យ៉ាងកក្រើកអស់មួយចំហៀងរាជធានី។
ជន២នាក់បងប្អូននោះ ម្នាក់បងឈ្មោះហ៊ុយ បរមី អាយុ៣២ឆ្នាំ និងម្នាក់ជាប្អូនឈ្មោះហ៊ុយ ពុទ្ធារ៉ា អាយុ២៣ឆ្នាំ ជានិស្សិតឆ្នាំទី៤ ផ្នែកព័ត៌មានវិទ្យា។ ពួកគេស្នាក់នៅផ្ទះជួលលេខ១១ហ្ស៊ីពិភពថ្មី សង្កាត់ទឹកថ្លា ខណ្ឌសែនសុខ។ ជាមួយនឹងការនាំខ្លួនជន២នាក់បងប្អូនទៅកាន់សាលាដំបូងរាជធានីភ្នំពេញត្រូវបានប្រភពព័ត៌មានឱ្យដឹងថា នគរបាលមន្ទីរប្រឆាំងគ្រឿងញៀនបានធ្វើរបាយការណ៍ចោទប្រកាន់ទៅលើឈ្មោះហ៊ុយ បរមី ពីបទជួញដូរគ្រឿងញៀនក្នុងនោះវត្ថុតាងមានថ្នាំញៀនប្រភេទម៉ាទឹកកកចំនួន៩៩,៧៥ក្រាម ជញ្ជីងថ្លឹងថ្នាំញៀន១គ្រឿង ម៉ាស៊ីនរាប់លុយ១គ្រឿង រថយន្តទំនើបម៉ាករ៉ង់រ៉ូវែ ពណ៌ទឹកប្រាក់១គ្រឿង ពាក់ស្លាកលេខបណ្តោះអាសន្ន និងសំភារ ព្រមទាំងឯកសារមួយចំនួនទៀត។ វត្ថុតាង និងសម្ភារទាំងអស់ខាងលើនេះ គឺពិតជារបស់ជនជាប់សង្ស័យឈ្មោះហ៊ុយ បរមី ដោយឡែកប្អូនឈ្មោះហ៊ុយ ពុទ្ធារ៉ា ពុំមានពាក់ព័ន្ធក្នុងករណីខាងលើនេះទេ ព្រោះគេគ្រាន់តែបានមកស្នាក់នៅរៀនសូត្រជាមួយបង ប៉ុន្តែក្នុងកិច្ចប្រតិបត្តិការរបស់សមត្ថកិច្ចត្រូវបានឃាត់ខ្លួនផងដែរ។
កាលពីរសៀលថ្ងៃទី៧ មេសា កិច្ចប្រតិបត្តិការបង្ក្រាបក្រុមអ្នកជួញដូរគ្រឿងញៀនមួយបានធ្វើឱ្យមានភាពភ្ញាក់ផ្អើលអស់មួយចំហៀងរាជធានី ដោយមានការផ្ទុះអាវុធជាច្រើនគ្រាប់ផងពីសំណាក់សមត្ថកិច្ចចាប់ពីចំណុចរង្វង់មូលនាងគង្ហីង ខណ្ឌ៧មករា ទៅដល់សួនវឌ្ឍនៈ ភូមិត្រពាំងថ្លឹង សង្កាត់ចោមចៅ ខណ្ឌដង្កោ។ កិច្ចប្រតិបត្តិការនោះជនសង្ស័យជិះរថយន្តធុនទំនើបម៉ាករ៉ង់រ៉ូវែដែលសមត្ថកិច្ចតាមដានដឹងថា មានដឹកជញ្ជូនគ្រឿងញៀនមកពីខេត្តស្ទឹងត្រែងគោលបំណងយកមកជួញដូរនៅក្នុងរាជធានីភ្នំពេញ។ ការសង្ស័យនោះត្រូវបានតាមដានរយៈពេល២ថ្ងៃ។ ដោយសារការតាមដានរបស់សមត្ថកិច្ចធ្វើឱ្យជនសង្ស័យដឹងខ្លួន និងមិនព្រមឈប់រថយន្តឱ្យចាប់ខ្លួនតាមសំរួលទេ មិនតែប៉ុណ្ណោះគេបើករថយន្តបំបុកម៉ូតូ និងកិនសមត្ថកិច្ចបណ្តាលឱ្យរងរបួសយ៉ាងធ្ងន់ម្នាក់ទៀតផង។
ហេតុការណ៍នេះសមត្ថកិច្ចបានសម្រេចចិត្តបាញ់បំបែកកង់រថយន្តជាច្រើនគ្រាប់ដើម្បីចាប់ខ្លួន តែគេព្យាយាមបើករត់បានរាប់គីឡូម៉ែត្រទើបត្រូវអស់លក្ខណ៍។ សមត្ថកិច្ចបានបាញ់ស្រោចលើរថយន្តជនសង្ស័យដែលក្នុងរថយន្តនោះមានហ៊ុយ បរមី តែ ម្នាក់គត់ ។ ចាត់ទុកជាសំណាងដែរដែលគ្រាប់កាំភ្លើងបាញ់បែកកញ្ចក់រថយន្តខ្ទេចតែអ្នកបើកបរមិនគ្រោះថ្នាក់។ ទោះជាយ៉ាងណាក្តី ជនសង្ស័យហ៊ុយ បរមី នឹងត្រូវប្រឈមមុខឃុំខ្លួនដាក់ពន្ធនាគារជាបណ្តោះអាសន្ន ចំណែកប្អូនឈ្មោះហ៊ុយ ពុទ្ធារ៉ា ស្ថិតក្នុងការស៊ើបអង្កេតបន្ត៕
ចែករំលែកព័តមាននេះ