រាជធានីភ្នំពេញ ៖ អាជីវករជួសជុល និងលក់គ្រឿងម៉ូតូនៅក្នុងផ្សារហេង លី ប្រមាណ៤០នាក់ បាននាំគ្នាសរសេរបដាលើកព្រោងព្រាតតវ៉ានៅមុខផ្សារ ដើម្បីទាមទារសុំឱ្យសម្តេចអគ្គមហាសេនាបតីតេជោ ហ៊ុន សែន ជួយនិងលោកជំទាវបណ្ឌិតប៊ុន រ៉ានី ហ៊ុន សែន អន្តរាគមន៍ ដោះស្រាយបញ្ចុះតំលៃតូបឱ្យបានសមរម្យ ។ ការលើកបដាទាមទារបញ្ចុះតំលៃតូបនេះបានធ្វើឡើងកាលពីវេលាម៉ោង៧ព្រឹកថ្ងៃទី២ មករា បន្ទាប់ពីថៅកែផ្សារហេងលីបានបិទតូបមិនឱ្យអាជីវករដែលប្រកបរបរជួសជុល និងលក់គ្រឿងម៉ូតូធ្វើការលក់ដូរ ដោយសារតែមិនបានបង់ប្រាក់តាមការកំណត់ ។
ទោះបីជាយ៉ាងណា ការលើកបដានេះបានតែប្រមាណ១ម៉ោងប៉ុណ្ណោះ ក៏ត្រូវកំលាំងសណ្តាប់ធ្នាប់សាលាខណ្ឌទួលគោកប្រមូលយកអស់ ព្រមទាំងសំណូមពរដល់អាជីវករឱ្យមានការស្ងប់ស្ងាត់ ធ្វើអ្វីៗទៅតាមច្បាប់ និងដោះស្រាយគ្នាដោយសន្តិវិធី ។ ផ្សារហេង លី ស្ថិតនៅក្នុងដីឡូត៍ លេខ៣២-៣៤ ផ្លូវលេខ២៧១ សង្កាត់ទឹកល្អក់ទី៣ ខណ្ឌទួលគោក មានអាជីវករលក់ដូរម៉ូតូ ខោអាវជជុះ បន្លែ និងជួសជុលម៉ូតូប្រមាណជិត១០០តូប ។ ដោយឡែកការផ្ទុះចេញនូវការតវ៉ានេះ គឺមានតែអាជីវករជួសជុល និងលក់គ្រឿងម៉ូតូដែលនៅជាប់ផ្លូវលេខ២៧១ ប៉ុណ្ណោះ ។
តាមអាជីវករដែលធ្វើការតវ៉ាបានឱ្យដឹងថា អាជីវករជួសជុល និងលក់គ្រឿងម៉ូតូចំនួន៤០នាក់ បាននាំគ្នាសរសេរបដាលើកព្រោងព្រាតនៅមុខផ្សារដើម្បីទាមទារឱ្យថៅកែផ្សារហេងលី បញ្ចុះតំលៃឈ្នួលតូបឱ្យបានសមរម្យ ។ ការតវ៉ានេះដោយសារតែថៅកែផ្សារបានបិទតូបមិនឱ្យពួកគាត់លក់ដូរ ។ ក្រុមអាជីវករបានបន្តទៀតថា នៅក្នុងឆ្នាំ២០១១នេះតូបនៅក្នុងផ្សារហេង លី បានឡើងថ្លៃហួសហេតុ ។ ដោយឡែកគ្រាន់តែតូបរបស់ពួកគាត់ជួសជុលម៉ូតូ និងលក់គ្រឿងបន្លាស់ម៉ូតូនៅតាមផ្លូវលេខ២៧១ ឆ្នាំ២០១០ថ្លៃ ជួលតូប១ឆ្នាំ តែ២.៨០០ដុល្លារ ស្រាប់តែឆ្នាំ២០១១ ឡើងរហូតទៅដល់៤.៣២០ដុល្លារ ដែលជាហេតុធ្វើឱ្យពួកគាត់ពុំមានលទ្ធភាពបង់បាន ។
ក្រុមអាជីវករបានឱ្យដឹងទៀតថា អាជីវករនៅក្នុងផ្សារហេង លីទាំងអស់បាននាំគ្នាផ្តិតមេដៃទាមទារបញ្ចុះតំលៃតូបតាំងពីថ្ងៃទី២៦ វិច្ឆិកា ឆ្នាំ២០១០ មកម្ល៉េះ ដែលការទាមទារដោះស្រាយត្រឹមសង្កាត់ប៉ុណ្ណោះ ។ លុះនៅថ្ងៃទី២៩ ធ្នូ ឆ្នាំ ២០១០ បាននាំគ្នាទៅដល់សាលាខណ្ឌទួលគោកដោះស្រាយទៀតតែពុំមានលទ្ធផល ស្រាប់តែនៅព្រឹកថ្ងៃទី២ មករា ថៅកែផ្សារបានបិទតូបមិនឱ្យពួកគាត់លក់ដូរទើបនាំគ្នាលើកបដាតវ៉ាតែម្តង ។ ក្រុមអាជីវករក៏បានសំណូមពរដល់សម្តេចតេជោ ហ៊ុន សែន និងលោកជំទាវ ក៏ដូចអាជ្ញាធរសូមជួយអន្តរាគមន៍ដោះស្រាយឱ្យពួកគាត់បានលក់ដូរវិញនិងបង់ថ្លៃតូបសមរម្យអាចឱ្យពួកគាត់ទទួលយកបាន ។
នៅព្រឹកនោះដែរ គេឃើញលោកសាំង សុភៈវិចិត្រ អភិបាលរងខណ្ឌទួលគោក បានចុះទៅដល់កន្លែងកើតហេតុធ្វើការណែនាំដល់អាជីវករកុំឱ្យលើកបដា ជាហេតុបង្កឱ្យបាត់បង់សណ្តាប់ធ្នាប់ រង់ចាំការដោះស្រាយដោយសន្តិវិធី តែអាជីវករមិនស្តាប់អាជ្ញាធរក៏បានប្រមូលយកបដាទាំងអស់ ។លោកហេង លី ថៅកែផ្សារហេង លី បានឱ្យដឹងតាមទូរស័ព្ទថា មូលហេតុដែលគាត់បិទតូបនោះគឺដោយសារតែអាជីវករនៅសល់តែ១៣តូបទេ មិនបានបង់ថ្លៃតូប ដោយខុសគ្នាតែ១ខែចំនួន៣៨ដុល្លារប៉ុណ្ណោះ ។ លោក ហេង លី បានឱ្យដឹងថា តូបនៅតាមផ្លូវលេខ២៧១ ជាតូបធំប្រៀបបាននឹងផ្ទះលែ្វងដែលមានទទឹង៤ម៉ែត្រ និងបែងចែកជាតូបតូចៗបានចំនួន២ទៀត ហើយក្នុង១ឆ្នាំតូបធំបង់៤.០០០ដុល្លារ និងតូបតូចបង់២.០០០ដុល្លារ គឺ១ខែបង់តែ១៦៦ដុល្លារ ។ ចំណែកអាជីវករទាមទារបង់១ខែ ១២៨ដុល្លារ គឺខុសត្រូវគ្នាតែ៣៨ដុល្លារដែលអាជីវករមួយចំនួនបានឯកភាពទៅហើយនៅសល់តែ១៣តូបមិនព្រម ក៏នាំគ្នាធ្វើការ ទាមទារបែបនេះ។ការតវ៉ាជាសិទ្ធិសេរីភាព តែក៏សូមឱ្យការប្រើសិទ្ធិបានត្រឹមត្រូវផងដែរ ៕
ចែករំលែកព័តមាននេះ