ខេត្តបាត់ដំបង ៖ អគ្គិភ័យបានឆាបឆេះលំនៅឋានមួយខ្នងអស់ទាំងស្រុងកាលពីវេលាម៉ោង៨ និង៣០នាទីព្រឹកថ្ងៃទី១៤ ឧសភា នៅក្នុងភូមិដំណាក់ហ្លួង សង្កាត់វត្តគរ ក្រុងបាត់ដំបង ខណៈម្ចាស់ផ្ទះរវល់ទៅលក់បបរ ។ មូលហេតុនៃការឆេះត្រូវម្ចាស់ផ្ទះអះអាងថា បណ្ដាលមកពី«ភ្លើងធូប» ។
ខេត្តបាត់ដំបង ៖ អគ្គិភ័យបានឆាបឆេះលំនៅឋានមួយខ្នងអស់ទាំងស្រុងកាលពីវេលាម៉ោង៨ និង៣០នាទីព្រឹកថ្ងៃទី១៤ ឧសភា នៅក្នុងភូមិដំណាក់ហ្លួង សង្កាត់វត្តគរ ក្រុងបាត់ដំបង ខណៈម្ចាស់ផ្ទះរវល់ទៅលក់បបរ ។ មូលហេតុនៃការឆេះត្រូវម្ចាស់ផ្ទះអះអាងថា បណ្ដាលមកពី«ភ្លើងធូប» ។
ក្នុងហេតុការណ៍នេះមានមនុស្សជាច្រើនបាននាំគ្នាជួយដងទឹកជះពន្លត់មុនពេលរថយន្តពន្លត់អគ្គិភ័យទៅដល់ ។ មន្រ្តីនគរបាលមូលដ្ឋាននិយាយថា លំនៅឋាននោះធ្វើផ្ទាល់ដី ជញ្ជាំងនិងដំបូលធ្វើពីស័ង្កសី មានទំហំ៤ម៉ែត្រគុណ៥ម៉ែត្រ ដែលមានម្ចាស់ឈ្មោះស្រេង សោភ័ណ្ឌ ភេទស្រីអាយុ២៦ឆ្នាំ ។ សមត្ថកិច្ចនិយាយថា ម្ចាស់ផ្ទះបានចាក់សោទ្វារ រួចទៅលក់បបរ ដែលនៅចម្ងាយពីផ្ទះប្រហែល៥០ម៉ែត្រ ប៉ុន្តែមិនបានដឹងថា ភ្លើងឆេះផ្ទះទេ លុះអ្នកភូមិស្រែកប្រាប់ ទើបដឹង តែហួសពេលទៅហើយ ។
សាក្សីដែលបានជួយពន្លត់ភ្លើងនិយាយថា ដំបូងគេមិនឃើញមានអណ្ដាតភ្លើងទេ មានតែផ្សែងខ្មួលខ្មាញ់ចេញពីលំនៅឋាននោះ។ប្រភពនេះបន្តថា គ្រានោះអ្នកភូមិបាននាំគ្នាទម្លុះបង្អួចនិងជញ្ជាំងដើម្បីជះទឹកពន្លត់ ប៉ុន្តែភ្លើងបានឆាបឆេះលឿនបំផុត ព្រោះនៅក្នុងនោះមានសុទ្ធតែសម្ភារដែលងាយភ្លើងឆេះ បើទោះជាម្ចាស់ផ្ទះមកដល់ក៏មិនអាចចូលសង្គ្រោះអីវ៉ាន់បានដែរ គឺមានតែប្រាក់បន្តិចបន្តូចប៉ុណ្ណោះ ដែលម្ចាស់ផ្ទះរំដោះបាន ហើយភ្លាមនោះរថយន្តពន្លត់អគ្គិភ័យក៏មកដល់ ។
ស្រ្តីជាម្ចាស់ផ្ទះឈ្មោះស្រេង សោភ័ណ្ឌ បានប្រាប់សមត្ថកិច្ចថា គាត់បានចាក់សោផ្ទះរួចទៅលក់បបរដោយមិនបានដឹងថា ភ្លើងឆេះផ្ទះទេ លុះមានគេស្រែកប្រាប់ទើបដឹងថា ភ្លើងឆេះផ្ទះគាត់។ ស្រ្តីរូបនេះបានបញ្ជាក់ថា គាត់សន្និដ្ឋានថា ការឆេះនេះអាចបណ្ដាលមកពី«ភ្លើងធូប»ដែលគាត់ដុតទុកចោលលើហុឹង។គាត់បន្ថែមថា ភ្លាមៗនោះគាត់រំដោះបានប្រាក់ប្រហែល៥០ម៉ឺនរៀលតែប៉ុណ្ណោះ ឯទ្រព្យសម្បត្តិក្រៅពីនេះត្រូវក្លាយជាចំណីព្រះអគ្គីទាំងអស់ ពោលគឺគ្រួសារគាត់សល់តែមួយចង្កេះម្នាក់ប៉ុណ្ណោះ។ គាត់បញ្ជាក់បន្ថែមថា ក្រៅពីសម្លៀកបំពាក់ នៅមានសម្ភារដូចជាទូរទស្សន៍២គ្រឿង កង់១គ្រឿង និងប្រាក់មួយចំនួន រួមជាមួយទ្រព្យសម្បត្តិទាំងប៉ុន្មាននៅក្នុងផ្ទះត្រូវក្លាយជាផេះទាំងអស់ ។
មន្រ្តីនគរបាលពន្លត់អគ្គិភ័យដែលចុះអន្តរាគមន៍បានឲ្យដឹងដែរថា ភ្លើងឆេះលឿនបំផុត ប៉ុន្តែគេបានជួយបាញ់ទឹកពន្លត់អស់ទឹក១រថយន្តដែរ ខណៈភ្លើងនៅតែឆាបឆេះនៅឡើយ។ មន្រ្តីដដែលបានបន្តថា បើតាមការបំភ្លឺពីម្ចាស់ផ្ទះថា អគ្គិភ័យនេះបានឡើងដោយ«ភ្លើងធូប»ដែលគាត់ដុតទុកចោលលើហឹុង ហើយម្ចាស់ផ្ទះនេះចេញទៅលក់ដូរបាត់ លុះភ្លើងឆេះផ្ទះ ទើបដឹងតែហួសពេលទៅហើយ ព្រោះភ្លើងបានលេបត្របាក់ផ្ទះគាត់ទាំងស្រុងតែម្ដង ៕
ចែករំលែកព័តមាននេះ