ខេត្ដបាត់ដំបង ៖ ចោរម្នាក់ក្នុងចំណោម២នាក់ ដែលគេស្គាល់ថាសុទ្ធតែពួកញៀនថ្នាំបានចូលទៅលួចយកកុំព្យូទ័រក្នុងកុដិព្រះសង្ឃមួយកន្លែងកាលពីយប់មិញ (ម៉ោង៩និង៣០ នាទីថ្ងៃទី២៥ មីនា ២០១០) ស្ថិតនៅក្នុងវត្ដលៀប ភូមិវត្ដលៀប សង្កាត់ចំការសំរោង ក្រុងបាត់ដំបង ។ព្រះសង្ឃព្រះនាមសុខ ព្រះជន្ម២៦ឆ្នាំ ដែលជាម្ចាស់ទ្រព្យបានប្រាប់ថា ចោរបានលបចូលលួចយកកុំព្យូទ័រឡែបថបមួយគ្រឿងខណៈដែលព្រះអង្គបើកទ្វារចេញទៅដោះទុក្ខសត្វមួយភ្លែតនាយប់នោះ ប៉ុន្ដែព្រះអង្គបានត្រឡប់មកវិញទាន់ ហើយបានប្រយុទ្ធគ្នាមួយប្រាវជាមួយចោរ និងដណ្ដើមយកបានកុំព្យូទ័រឡែបថបមកវិញចំណែកចោរបានរំដោះខ្លួនចាកចេញទៅបាត់ ។ លុះពេលព្រះអង្គចូលទៅពិនិត្យមើលក្នុងកុដិក៏ឃើញបាត់ទូរស័ព្ទកញ្ចាស់មួយគ្រឿង ។សាក្សីនិយាយថា ពួកចោរមានគ្នា២នាក់ គឺម្នាក់ចូលលួច និងម្នាក់ទៀតឈប់ចាំលើម៉ូតូនៅខាងក្រៅវត្ដរង់ចាំដឹកគ្នារបស់គេ… ដូចការគ្រោងទុករបស់ពួកចោរមែន គឺនៅពេលបែកការណ៍ចោរម្នាក់ដែលចូលទៅក្នុងកុដិនោះបានស្ទុះចេញមកក្រៅហើយត្រូវគ្នារបស់គេដែលចាំនៅខាងក្រៅដឹកចេញទៅទាំងតក់ក្រហល់ ។ សមត្ថកិច្ចវិញមានការយឺតយ៉ាវក្នុងការមកជួយអន្ដរាគមន៍ចាប់ចោរ បន្ទាប់ពីមានការស្រែកសុំជំនួយតាម វិទ្យុទាក់ទងពោលគឺចោរទៅបាត់ហើយ លុះមួយសន្ទុះទើបសមត្ថកិច្ចមកដល់ ។
ចែករំលែកព័តមាននេះ