ខេត្តក្រចេះ៖ ជនល្មោភកាមម្នាក់ដែលធ្លាប់ចាប់រំលោភក្មេងស្រីអនីតិជនបានសម្រេចម្តង តែមិនស៊ីជម្រៅខ្លាំង ត្រូវបានសមត្ថកិច្ចស្រុកសំបូរ ចាប់ខ្លួន បន្ទាប់ពីរូបគេបម្រុងធ្វើសកម្មភាពចាប់រំលោភក្មេងស្រីរងគ្រោះនោះម្តងទៀតកាលពីថ្ងៃទី១៩ មីនា ។
មន្ត្រីប៉ូលិសព្រហ្មទណ្ឌកម្រិតធ្ងន់បានឱ្យដឹងថា ជនសង្ស័យរូបនេះឈ្មោះ យ៉យ សុខៃ ហៅ កយ អាយុ២២ឆ្នាំ មានទីលំនៅក្នុងឃុំសំបូរ ស្រុកសំបូរ រីឯក្មេងស្រីរងគ្រោះ អាយុ៩ឆ្នាំ រស់នៅជាមួយជីដូនចាស់ផ្ទះក្បែរគ្នា ។ កាលពីថ្ងៃទី២៥ កុម្ភៈ កន្លងទៅ ខណៈដែលជីដូនរបស់ក្មេងស្រីរងគ្រោះភ្ញាក់ពីយប់ទៅទិញបន្លែនៅផ្សារក្រចេះ គាត់ក៏ពឹងឱ្យជនជាប់ចោទឈ្មោះ យ៉យ សុខៃ ហៅ កយ មកជួយដេកលើផ្ទះមើលចៅស្រីរបស់គាត់ដែលមិនទាន់ភ្ញាក់ពីដំណេក ។ នៅថ្ងៃនោះជននេះ បានធ្វើសកម្មភាពចាប់រំលោភក្មេងស្រីរងគ្រោះដោយបានបៀតបៀនកេរ្តិ៍ខ្មាស់ នាងរហូតបានសម្រេចបំណងខ្លួនឯង ។
ប្រភពដដែលបានឱ្យដឹងទៀតថា លុះដល់ថ្ងៃទី១៩ មីនា ជននេះបានឱ្យក្មេងស្រីយកសាច់ជ្រូកឡើងមកលើផ្ទះឱ្យរូបគេ និងបានបង្គាប់ឱ្យយកទៅទុកនៅចង្ក្រានបាយ។ ភ្លាមនោះជនសង្ស័យបានចាប់ឱបក្មេងស្រីរងគ្រោះពីក្រោយបម្រុងធ្វើសកម្មភាពចាប់រំលោភម្តងទៀត តែត្រូវនាងរើបំរះរួច និងស្រែកយំខ្លាំងៗរត់ចុះមកក្រោម រួចយករឿងនេះប្រាប់ជីដូនទើបត្រូវបែកការណ៍ ។
លោកអនុសេនីយ៍ឯក ហ៊ត លឹមហ៊ាង នាយរងការិយាល័យព្រហ្មទណ្ឌកម្រិតធ្ងន់ខេត្ត បានឱ្យដឹងថា ក្រោយពីទទួលពាក្យបណ្តឹងពីគ្រួសារក្មេងស្រីរងគ្រោះរួចមក នគរបាលជំនាញបានចុះទៅចាប់ខ្លួនជនសង្ស័យរូបនេះនាំមកកាន់ការិយាល័យដើម្បីធ្វើការសាកសួរតាមនីតិវិធី។ នៅមុខសមត្ថកិច្ច ជនរូបនេះបានសារភាពថា ខ្លួនពិតជាបានធ្វើសកម្មភាពចាប់រំលោភសេពសន្ថវៈក្មេងស្រីនេះប្រាកដមែន ខណៈដែលជីដូននាងមិននៅផ្ទះ ។
លោកនាយរងការិយាល័យបានបន្តថា ជននេះត្រូវបានកម្លាំងជំនាញកសាងសំណុំរឿងបញ្ជូនទៅកាន់តុលាការខេត្ត កាលពីរសៀលថ្ងៃទី២៣ មីនា ដើម្បីមានវិធានការបន្ត៕
ចែករំលែកព័តមាននេះ