រាជធានីភ្នំពេញ​​​​ ៖ ប្រធានសហជីពសេរី​កម្មករនៃព្រះរាជាណាចក្រកម្ពុជា លោក​ជា មុនី បានស្នើអោយអភិបាលរាជធានីភ្នំពេញ លោក កែប ជុតិមា ​ជំរុញ​ការរៀបចំសាងសង់រូប​សំណាកលោក​ជា វិជ្ជា អតីតប្រធានសហជីព​សេរី​កម្មករនៃព្រះរាជាណាចក្រកម្ពុជា​ឲ្យបាន​ទាន់​ពេល​វេលា ។

អភិបាលរាជធានីភ្នំពេញ​លោក​កែប ជុតិមា វិទ្យុសម្លេងកោះសន្តិភាពមិនទាន់អាចរកការសុំអត្ថាធិប្បាយតាមទូរស័ព្ទបាននៅឡើយទេនារសៀលថ្ងៃទី១៣ មីនានេះ ។
យោងតាមលិខិតស្នើសុំរបស់លោក​ជា មុនី ចុះថ្ងៃទី១៣ មីនា ​២០១២ បានឱ្យ​ដឹងថា កាល​ពី​ថ្ងៃទី១៤ កុម្ភៈ ​២០១២ សហជីពសេរីកម្មករ​នៃព្រះរាជាណាចក្រកម្ពុជា ធ្លាប់បានធ្វើលិខិត​ជូន​លោក​អភិបាលរាជធានីភ្នំពេញម្តងរួចមកហើយ ដោយបានស្នើសុំលោក​អភិបាលរាជធានីភ្នំពេញ កំណត់កាលបរិច្ឆេទជួបពិភាក្សាការងារគ្នាឲ្យបានល្អិតល្អន់សា​ជាថ្មីម្តងទៀតជាមួយសហជីព ក្នុងន័យជំរុញការរៀបចំសាងសង់រូបសំណាក លោក​ជា វិជ្ជា ឱ្យ​មានប្រសិទ្ធភាព និង​បានទាន់​ពេល​វេលា។ ប៉ុន្តែគិតរហូតដល់ពេលនេះ សហ​ជីពសេរីកម្មករនៃព្រះរាជាណាចក្រកម្ពុជា មិន​ទាន់បានទទួលការឆ្លើយតបជាផ្លូវការពីសាលារាជធានីភ្នំពេញនៅឡើយទេ ។

គួរបញ្ជាក់ថា ការស្នើអោយពន្លឿនការ​សាង​សង់រូបសំណាក លោក​ជា វិជ្ជា នាពេលនេះធ្វើ​ឡើងបន្ទាប់ពីសម្តេចនាយករដ្ឋមន្រ្តី​ហ៊ុន សែន កាលពីថ្ងៃទី៣១ ធ្នូ ២០១១ បានឯកភាពយល់​ព្រម​តាមសំណើលោកជា មុនី ប្រធានសហជីព​សេរីកម្មករនៃព្រះរាជាណាចក្រកម្ពុជា ដែល​សុំ​ទីតាំងសមរម្យមួយកន្លែងស្ថិតនៅសួនច្បារខាង លិចវិមានឯករាជ្យ ដើម្បីសាងសង់រូបសំណាក លោក​ជា វិជ្ជា អតីតប្រធានសហជីពសេរីកម្ម​ករ​នៃព្រះរាជាណាចក្រកម្ពុជា ដែលត្រូវជនមិន​ស្គាល់​​អត្តសញ្ញាណបាញ់សម្លាប់ ខណៈពេល​លោកកំពុងអង្គុយអានកាសែត នៅតូបលក់​កាសែត​ខាងក្រោយវត្តលង្កា​ ស្ថិតក្នុងសង្កាត់​បឹង​កេងកង ខណ្ឌចំការមន កាលពីព្រឹកថ្ងៃទី២២ មករា ២០០៤ កន្លងមក ៕