ជ័យ វណ្ណៈ ឈ្នះពិន្ទុសម ចន្ថា នៅរេញ CTN ខណៈការជួបគ្នារវាងឡេះ តើក និងលួន សុខខេង ស្មើគ្មា
រាជធានីភ្នំពេញ ៖ ជ័យ វណ្ណៈ មកពីក្លឹបឃ្លាំងមឿងកីឡា ប្រកួតឈ្នះពិន្ទុ សម ចន្ថា មកពីក្លឹបសាលវ័ន្តកីឡា នៅលើសង្វៀន CTN កាលពីរសៀលថ្ងៃអាទិត្យ ទី១១ មីនា ខណៈការជួបគ្នារវាង លួន សុខខេង មកពីក្លឹបសិង្ហកីឡា និងឡេះ តើក មកពីក្លឹបពុធសេរីវង្សព្រែកតាទែន បានត្រឹមតែស្មើពិន្ទុគ្នាប៉ុណ្ណោះ ។
ការបរាជ័យរបស់ ចន្ថា លើកនេះមិនមែនមានន័យថា ចន្ថា បន្ធូរដៃឱ្យនោះទេ ប៉ុន្តែចន្ថា បានបាត់បង់ភាពម្ចាស់ការរបស់ខ្លួនតាំងពីទឹកទី១មកម៉្លេះ ។ ចន្ថា ព្យាយាមដើរចូលទាំងកំរោលតែត្រូវវណ្ណៈ ទាត់ចូលកណ្តៀតក្អមពេញៗ និងម៉ាត់ចូលមុខជាច្រើនដៃទៀតផង ។ ចន្ថា ចង់ប្តូរស្នៀតកែងដើម្បីផ្តួលវណ្ណៈ តែចលនាវាយលុករបស់វណ្ណៈ ល្អជាង ជាពិសេសនៅទឹកទី៣និងទី៤ វណ្ណៈបានប្រើស្នៀតជើងទាត់ចន្ថា ឱ្យដកថយរហូត ។ សំអាងលើចិត្តសឿងតែខ្វះល្បិចប្រយុទ្ធរបស់ចន្ថា មិនអាចធ្វើអ្វីវណ្ណៈកើតឡើយ ចូលទឹកទី៥ ចន្ថា កាន់តែដុនដាបឡើងៗ ធ្វើឱ្យវណ្ណៈ សម្រុកចូលកៀកវាយតាមអំពើចិត្ត ។
សុខខេង បើទោះជាគេមានប្រៀបខាងកម្លាំងជាង ឡេះ តើក បន្តិចក្តី តែទីបំផុតគេនៅតែមិនអាចសម្រេចបំណងរបស់គេបានឡើយ ។ ទឹកទី១ និងទឹកទី២មើលទៅសុខខេង ហាក់បីដូចជាមានប្រៀបជាងឡេះ តើក ខ្លាំងណាស់ ប៉ុន្តែបើពិនិត្យពីស្ថានភាពប្រកួតវិញ ឡេះ តើក មិនទាន់បានប្រុងប្រៀបទុកជាមុននៅឡើយ ហេតុនេះហើយបានជាគេឃើញឡេះ តើក ដួលទាំងជំហរជាញឹកញាប់បំផុត ។ ចូលដល់ទឹកទី៣ និងទី៤ ឡេះ តើក មិនបានបន្ធូរដៃឱ្យសុខខេង ទៀតឡើយ ស្នៀតកណ្តាប់ដៃ និងស្នៀតជើងរបស់គេបានវាយសម្រុកព្រមគ្នា ដើម្បីទប់ទល់នឹងការវាយលុករបស់សុខខេង ។ ទោះបីជាយ៉ាងណា ការប្រកួត៥ទឹក ទាំងសងខាងនៅតែមានប្រៀបប្រហែលគ្នាធើ្វឱ្យចៅក្រមពិបាកកាត់ក្តីសម្រេចពីការចាញ់-ឈ្នះបំផុត ។
លោកមាស សុខគ្រី អាជ្ញាកណ្តាលគូនេះ បានឱ្យដឹងថា ការផ្តល់ពិន្ទុឱ្យគូនេះស្មើគ្នា គឺជារឿងត្រឹមត្រូវបំផុត ។ ពេជ្រ សម្បតិ្ត មកពីក្លឹបក្រសួងការពារជាតិទីបំផុតអាចយកឈ្នះ ប៊ី សុភាព មកពីក្លឹបព្រះខ័នរាជ ដោយពិន្ទុទាល់តែបាន ។ បើទោះជាការប្រកួតរវាងពួកគេទាំងពីរលើកនេះ អ្នកមើលភាគច្រើនមិនសូវមានជំនឿចិត្តលើសម្បត្តិ យ៉ាងណាក៏ដោយ ប៉ុន្តែផ្ទុយទៅវិញសម្បតិ្ត បានធ្វើឱ្យអ្នកមើលភាគច្រើនមានការភ្ញាក់ផ្អើលយ៉ាងខ្លាំងជាមួយនឹងការបញ្ចេញក្បាច់វាយលុកប្លែកៗនិងពោរពេញទៅដោយបច្ចេកទេសខ្ពស់បំផុត ។
សុភាពបញ្ចេញស្នៀតជើងទាត់មកលើសម្បតិ្ត យ៉ាងសាហាវបំផុតក្នុងទឹកទី១និងទី២ តែត្រូវសម្បតិ្ត វាយបកសងវិញយ៉ាងចាស់ដៃនៅទឹកទី៤និងទី៥ ធើ្វឱ្យសុភាព បង្ខំចិត្តការពារខ្លួនច្រើនជាងវាយលុក ។ អាន សុផល មកពីក្លឹបមិត្តប៉ូលិស ប្រកួតឈ្នះ សុខ វាសនា មកពីក្លឹបឃ្លាំងមឿងកីឡានៅត្រឹមទឹកទី៤ ។
ពេជ្រ សីហា យកឈ្នះ អ៊ុង វីរៈ ទាំងលំបាក ខណៈយឹម ឌៀប ឈ្នះ ផាវ ភឿត ដោយពិន្ទុនៅរេញ TV3
ពេជ្រ សីហា មកពីក្លឹបក្រសួងការពារជាតិយកឈ្នះពិន្ទុ អ៊ុង វីរៈ មកពីក្លឹបកងទ័ពឆត្រយោងលេខ៩១១ទាំងវេទនាបំផុតនៅលើសង្វៀនស្ថានីយទូរទស្សន៍ប៉ុស្តិ៍លេខ៣ កាលពីរសៀលថ្ងៃសៅរ៍ ទី១០ មីនា ។ ចំណែកយឹម ឌៀប មកពីក្លឹបក្រសួងការពារជាតិ ដែលធ្លាប់តែស្គាល់ការបរាជ័យញយដងមកហើយនោះ លើកនេះមានសំណាងបានឈ្នះផាវ ភឿត មកពីក្លឹបកងពលធំអន្តរាគមន៍លេខ៣ព្រះវិហារដោយពិន្ទុទាំងព្រលឹងចុងសក់ ។
សីហា បានបញ្ចេញស្នៀតកណ្តាប់ដៃវាយលុកអ៊ុង វីរៈ ស្ទើរតែគេចមិនទាន់ម្តងៗទៅហើយ ជាពិសេសនៅក្នុងទឹកទី២តែម្តង ។ សីហាបានវាយវីរៈ ចង់វង្វេងវង្វាន់ តែត្រូវវីរៈទាត់ត្រូវកញ្ចឹងក២-៣ជើង ធ្វើឱ្យសីហា ដួលទ្រេតទៅលើរេញ ហើយត្រូវអាជ្ញាកណ្តាលរាប់៨ម្តងទៀតផង ។ ទឹកទី៤និងទឹកទី៥សីហា លែងហ៊ានសម្រុកចូលកៀកផ្តេសផ្តាសទៀតហើយ ព្រោះខ្លាចស្នៀតជើងរបស់វីរៈ ទើបគេបានត្រឹមតែវាយចេញពីចម្ងាយថ្នមៗដើម្បីសន្សំពិន្ទុប៉ុណ្ណោះ។
យឹម ឌៀប ធ្នាប់តែស្គាល់រសជាតិនៃការបរាជ័យច្រើនដងមកហើយនោះ ពេលនេះគេមានសំណាងបានឈ្នះពិន្ទុផាវ ភឿត ជាលើកទី១ ។ ផាវ ភឿត បានបញ្ចេញស្នៀតជើងទាត់យឹម ឌៀប ទាំងពីទឹកទី១និងទឹកទី២ ប៉ុន្តែស្នៀតកណ្តាប់ដៃឆ្វេងរបស់យឹម ឌៀបក៏មិនធម្មតាប៉ុន្មានដែរ គឺគេបានវាយបកសងវិញយ៉ាងរហ័សបំផុត ។ ទឹកទី៤ផាវ ភឿត សម្រុកចូលកៀកប្តូរស្នៀតកែងធ្វើឱ្យយឹម ឌៀប មានរបួសបែកលើចិញ្ចើមស្តាំបន្តិច តែមិនមានបញ្ហាអ្វីឡើយ ។ ទឹកទី៥យឹម ឌៀប នៅតែបង្កើនការវាយលុកឥតដកថយឡើយ តែទោះជាយ៉ាងណាជ័យជម្នះរបស់យឹម ឌៀប នៅពេលនេះក៏មិនសូវជាល្អប៉ុន្មានដែរ ។
ឡុង សុវណ្ណឌឿន មកពីក្លឹបសាលវ័ន្តកីឡា ប្រកួតឈ្នះពិន្ទុ ពៅ ស័ក្តិសិទ្ធិ មកពីក្លឹបក្រសួងមហាផ្ទៃ និងផន ប៊ុនម៉ៅ មកពីក្លឹបបុរីរាជសីហ៍មានប្ញទ្ធិ ប្រកួតឈ្នះពិន្ទុ សុខ ចិន្តា មកពីក្លឹបឃ្លាំងមឿងកីឡា ៕
ចែករំលែកព័តមាននេះ