ខេត្តកណ្ដាល ៖ រថយន្ដដឹកត្រីឆ្ដោខុសច្បាប់២គ្រឿងរបស់ឈ្មួញដុះស្លែដែលពីមុនមន្រ្ដីជល ផលគ្រប់ថា្នក់មិនដែលបង្រ្កាបសោះនោះត្រូវបានកងរាជអាវុធហត្ថស្រុកស្អាង ស្ទាក់ចាប់បានកាលពីម៉ោង៩យប់ថ្ងៃទី១៥ កុម្ភៈ នៅភូមិព្រែករុន ឃុំព្រែកគយ ស្រុកស្អាង ខណៈដែលរថយន្ដដឹកត្រីនោះបើកសំដៅចូលមករាជធានីភ្នំពេញ ។
ខេត្តកណ្ដាល ៖ រថយន្ដដឹកត្រីឆ្ដោខុសច្បាប់២គ្រឿងរបស់ឈ្មួញដុះស្លែដែលពីមុនមន្រ្ដីជលផលគ្រប់ថា្នក់មិនដែលបង្រ្កាបសោះនោះត្រូវបានកងរាជអាវុធហត្ថស្រុកស្អាង ស្ទាក់ចាប់បានកាលពីម៉ោង៩យប់ថ្ងៃទី១៥ កុម្ភៈ នៅភូមិព្រែករុន ឃុំព្រែកគយ ស្រុកស្អាង ខណៈដែលរថយន្ដដឹកត្រីនោះបើកសំដៅចូលមករាជធានីភ្នំពេញ ។
ក្រោយពីស្ទាក់ចាប់បានត្រីឆ្ដោទាំង២រថយន្ដត្រូវបានប្រគល់ឱ្យខាងសមត្ថកិច្ចជំនាញផ្នែកជលផលបាសាក់ ដើម្បីធ្វើការផាកពិន័យតាមផ្លូវច្បាប់ ប៉ុន្ដែខាងសមត្ថកិច្ចជំនាញហាក់ដូចជា មានការរារែកក្នុងការទទួលយកទៅធ្វើការផាកពិន័យ ទំនងជាធ្លាប់ទទួលលាភសកា្ករៈពីឈ្មួញដឹកត្រីខុសច្បាប់នេះផងក៏មិនដឹង ។
លោកអូ ផល្លី មេបញ្ជាការកងរាជអាវុធហត្ថស្រុកស្អាង បានឱ្យដឹងថា រថយន្ដដឹកត្រីខុសច្បាប់ទាំង២គ្រឿងនោះ ១គ្រឿងម៉ាកហ៊ីយ៉ាន់ដាយ ពណ៌ខៀវ ជារបស់ឈ្មោះសាត ថុល ភេទប្រុស អាយុ៣០ឆ្នាំ មានទីលំនៅភូមិព្រែកខ្សេវ ឃុំរកាខ្ពស់ ស្រុកស្អាង មានមុខរបរទិញ-លក់ត្រីនិងមួយគ្រឿងទៀតម៉ាកនីហ្សាន់ ពណ៌ប្រផះជារបស់ឈ្មោះហង្ស ចំរើន ភេទប្រុស អាយុ៣១ឆ្នាំ មានទីលំនៅភូមិព្រែកសំរោង ឃុំរកាខ្ពស់ ស្រុកស្អាង មុខរបរទិញ-លក់ត្រី ។ នៅក្នុងរថយន្ដទាំង២គ្រឿងនោះមានឡាំងដែកដាក់ត្រីឆ្ដោចំនួន៣៤ឡាំងដែលក្នុង១ឡាំងៗមានទម្ងន់មិនតិចជាង៣០គីឡូក្រាមឡើយសរុបទាំងអស់១.០២០គីឡូក្រាម ។ លោកអូ ផល្លី បានឱ្យដឹងបន្ដថា បន្ទាប់ពីកម្លាំងរបស់លោកស្ទាក់ចាប់រថយន្ដដឹកត្រីឆ្ដោខុសច្បាប់បានហើយលោកបានរាយការណ៍ប្រាប់សមត្ថកិច្ចជំនាញផ្នែករដ្ឋបាលជលផលបាសាក់ និងសង្កាត់រដ្ឋបាលជលផលស្អាងចូលរួមផងដែរ ។ នៅពេលប្រគល់ទទួលនោះសម្រេចឯកភាពគ្នាត្រីឆ្ដោទាំងអស់នោះសរុបមានទម្ងន់៧៥៧គីឡូក្រាម ហើយបានធ្វើឯកសារទទួលចប់សព្វគ្រប់ ។ លុះព្រឹកឡើងថ្ងៃទី១៦ កុម្ភៈ មន្ដ្រីផ្នែករដ្ឋបាលជលផលបាសាក់បានមកប្រាប់លោកឱ្យធ្វើកំណត់ហេតុថ្មីឡើងវិញគឺត្រីទាំងអស់មានតែ៣៥០គីឡូក្រាមទេ ។ លោកមេបញ្ជាការបានប្រាប់ទៀតថា លោកមិនឯកភាពកែរបាយការណ៍ទេគឺលោកបានរាយការណ៍ប្រាប់ទៅថ្នាក់លើរួចហើយ បើខាងជលផលកែរបាយការណ៍យ៉ាងណាស្រេចតែជំនាញរបស់លោកចុះព្រោះបានឯកភាពគ្នា៧៥៧គីឡូក្រាមរួចហើយ ។
លោកសេង ធីម នាយផ្នែករដ្ឋបាលជលផលបាសាក់បានប្រាប់កោះសន្ដិភាពតាមទូរស័ព្ទថា ត្រីឆ្ដោទាំងអស់កងរាជអាវុធហត្ថស្រុកស្អាងប្រគល់ឱ្យសរុបទម្ងន់៣៥០គីឡូក្រាមហើយសមត្ថកិច្ចជំនាញបានឯកភាពគា្នធ្វើការផាកពិន័យចំនួន៣៥០ម៉ឺនរៀល យកចូលជាថវិការដ្ឋ ។
លោកឃឹម ពេញ នាយសង្កាត់រដ្ឋបាលជលផលស្អាង បានប្រាប់ឱ្យដឹងថា ត្រីទាំងអស់៧៥៧គីឡូក្រាមប៉ុន្ដែត្រីនោះមានងាប់ខ្លះ និងតូចខ្លះទើបសម្រេចកាត់ចោលយកតែ៣៥០គីឡូក្រាមមកធ្វើការផាកពិន័យចំនួន៣៥០ម៉ឺនរៀលចូលជាថវិការដ្ឋ ។
មន្ដ្រីអាវុធហត្ថស្រុកស្អាង លួចខ្សឹបប្រាប់ថា ក្រោយពីស្ទាក់ចាប់ត្រីឆ្ដោអត់ច្បាប់ទាំង២រថយន្ដបានភ្លាម មានមន្ដ្រីផ្នែករដ្ឋបាលជលផលមកសម្របសម្រួលឱ្យដោះលែងវិញដោយ គេហ៊ានឱ្យ១លានរៀលជាថ្នូរប៉ុន្តែខាងអាវុធហត្ថមិនព្រម ។ មន្ដ្រីដដែលបានប្រាប់ឱ្យដឹងទៀតថា មន្ដ្រីជលផលហាក់ដូចជាមិនចង់ទទួលត្រីឆ្ដោខុសច្បាប់នេះទៅធ្វើការផាកពិន័យទេ សង្ស័យត្រូវរ៉ូវគ្នារួចមកហើយ ។ ម្យ៉ាងទៀតត្រីឆ្ដោ៣៤ឡាំងដឹក២រថយន្ដថាមានត្រីទម្ងន់តែ៣៥០គីឡូក្រាមគឺដូចមិនសមសោះទោះបីនិយាយប្រាប់កូនក្មេងក៏មិនជឿដែរ ៕
ចែករំលែកព័តមាននេះ