រាជធានីភ្នំពេញ ៖ ខ្សែភាពយន្តខ្នាតធំមានចំណងជើងថា «កុមារី២៥ឆ្នាំ» ដែលជារឿងកំប្លែងមួយ ត្រូវបានរៀបចំដាក់សម្ពោធកាលពីថ្ងៃទី១ មករា នៅមហោស្រពចេនឡា ក្រោមអធិបតីភាពលោកស៊ិន ចន្ទសាយ៉ា ប្រធាននាយកដ្ឋានសិល្បៈភាពយន្ត ។
រាជធានីភ្នំពេញ ៖ ខ្សែភាពយន្តខ្នាតធំមានចំណងជើងថា «កុមារី២៥ឆ្នាំ» ដែលជារឿងកំប្លែងមួយ ត្រូវបានរៀបចំដាក់សម្ពោធកាលពីថ្ងៃទី១ មករា នៅមហោស្រពចេនឡា ក្រោមអធិបតីភាពលោកស៊ិន ចន្ទសាយ៉ា ប្រធាននាយកដ្ឋានសិល្បៈភាពយន្ត ។ អ្នកស្រីពាន់ ភួងបុប្ផា អ្នកដឹកនាំរឿង និងជាចាងហ្វាងផលិតកម្មផ្កាប្រាំនិយាយថា រឿង«កុមារី២៥ឆ្នាំ» គឺជារឿងកំប្លែងទីបីរបស់អ្នកស្រី តែវាជាចំណងដៃថ្មីសម្រាប់ឆ្នាំ២០១២នេះ ។
លោកស៊ិន ចន្ទសាយ៉ា បានថ្លែងកោតសរសើរចំពោះកិច្ចខិតខំប្រឹងប្រែងបង្កើតស្នាដៃថ្មីៗរបស់អ្នកស្រីពាន់ ភួងបុប្ផា ដើម្បីបម្រើអារម្មណ៍ទស្សនិកជន ហើយផលិតកម្មផ្កាប្រាំភាពយន្ត គឺជាផលិតកម្មដែលបង្កើតស្នាដៃថ្មីៗមានគុណភាព និងថតយកសំឡេងពិតៗមិនប្រើសំឡេងបញ្ចូលនោះទេ ។ លោកស៊ិន ចន្ទសាយ៉ា បញ្ជាក់ថា វិស័យភាពយន្តនៅកម្ពុជារយៈពេល១៣ឆ្នាំចុងក្រោយនេះគឺមានលំនឹង ។ ក្នុងឆ្នាំ២០១១មានការផលិតខ្សែភាពយន្តបានចំនួន២០រឿង តែទោះបីជាយ៉ាងនេះក្តី វិស័យភាពយន្តនៅកម្ពុជាមិនទាន់ទទួលបានជោគជ័យនៅឡើយទេ ទាំងនៅក្នុងទីផ្សារជាតិ និងអន្តរជាតិ ។ លោកស៊ិន ចន្ទសាយ៉ា បានថ្លែងទៀតថា វិស័យភាពយន្ត គឺជាវិស័យមួយដែលមានសារសំខាន់ខ្លាំងណាស់ពីព្រោះវាបានបង្ហាញអំពីវប្បធម៌ អរិយធម៌របស់ប្រទេសនីមួយៗ ដូច្នេះហើយទើបបច្ចុប្បន្នកម្ពុជាកំពុងតែខិតខំធ្វើយ៉ាងណា ដើម្បីទាក់ទាញភ្ញៀវបរទេសឱ្យមកថតភាពយន្តនៅស្រុកយើងឱ្យបានកាន់តែច្រើន គឺកាន់តែល្អ ។ ជាមួយនេះយើងនឹងធ្វើការជ្រើសរើសយកតារាភាពយន្តដែលមានបទពិសោធន៍ក្នុងការសម្តែងទៅធ្វើការបណ្តុះបណ្តាលបន្ថែមនៅក្រៅប្រទេស ពីព្រោះនៅកម្ពុជាកំពុងមានការខ្វះខាតច្រើនណាស់គឺទាំងអ្នកនិពន្ធ អ្នកដឹកនាំរឿង អ្នកថត អ្នកសម្តែង អ្នកបញ្ចូលសំឡេង និងអ្នកបច្ចេកទេស ៕ អ៊ុយសុង
ចែករំលែកព័តមាននេះ