ខេត្ដកំពង់ធំ ៖ ក្មេងប្រុសតូចៗ២នាក់បងប្អូនបានស្លាប់រួញក្រញង់ក្នុងខ្ទមចាំចំការ ដែលមានទំហំ៤ម៉ែត្រគុណនឹង៣ម៉ែត្រប្រក់ស្បូវជញ្ជាំងស្លឹកដោយសារភ្លើងឆេះខ្ទមនេះ ពេលឪពុកម្ដាយជាប់រវល់ទៅច្រូតស្បូវនៅក្នុងព្រៃ។ ហេតុការណ៍នេះកើតឡើងនៅវេលាម៉ោងប្រមាណ៣រសៀល ថ្ងៃទី១៩ កុម្ភៈ ឆ្នាំ២០១០ នៅតំបន់ជាំម្អម ក្នុងភូមិសាស្ដ្រឃុំសណ្ដាន់ ស្រុកសណ្ដាន់ ខេត្ដកំពង់ធំ។
តាមរបាយការណ៍របស់សមត្ថកិច្ចស្រុកសណ្ដាន់បានឱ្យដឹងថា ក្មេងប្រុសទាំង២នាក់ដែលត្រូវស្លាប់ក្នុងភ្នក់ភ្លើងយ៉ាងវេទនា និងអាណោចអាធ័មបំផុតនេះម្នាក់ឈ្មោះស៊ុន តាក់ អាយុ៧ឆ្នាំជាបងនិងប្អូនឈ្មោះស៊ុន សាក់ អាយុ៨ខែ ស្នាក់នៅកន្លែងកើតហេតុខាងលើ។ លោកអួង ម៉ូលី អធិការនគរបាលស្រុកសណ្ដាន់មានប្រសាសន៍តាមទូរស័ព្ទឱ្យដឹងថាក្មេងរងគ្រោះទាំង២នាក់ មានឪពុក ឈ្មោះងិន សឿង និងម្ដាយឈ្មោះញៀន សាម៉ន អាយុ៣០ឆ្នាំ ស្មើគ្នារស់នៅភូមិជរឃុំសណ្ដាន់ ស្រុកសណ្ដាន់ ជាគ្រួសារក្រីក្រមានមុខរបរជាអ្នកធ្វើស្រែចំការ។ ប្រភពដដែលបានឱ្យដឹងទៀតថាជារៀងរាល់ឆ្នាំគ្រួសារនេះ តែងនាំគ្នាទៅស្នាក់នៅតំបន់កើតហេតុខាងលើដើម្បីប្រកបរបរធ្វើចំការដោះស្រាយជីវភាព ។
ដោយឡែកនៅមុនពេលកើតហេតុបន្ទាប់ពីពួកគេដាំបាយហូបពេលថ្ងៃត្រង់រួច ជាការធ្វេសប្រហែសមិនបានពន្លត់ភ្លើងចង្ក្រានឱ្យបានត្រឹមត្រូវ ក៏នាំគ្នា២នាក់ប្ដីប្រពន្ធទៅច្រូតស្បូវក្នុងព្រៃ ដែលនៅចំងាយពីខ្ទមនេះប្រហែលជា៣គីឡូម៉ែត្រដោយទុកឱ្យកូនប្រុសច្បងឈ្មោះស៊ុន តាក់ អាយុ៧ឆ្នាំ នៅចាំខ្ទម និងយោលអង្រឹងឱ្យប្អូនប្រុសឈ្មោះស៊ុន សាក់ អាយុ៨ខែដេក គួបផ្សំនឹងមានខ្យល់បក់់ត្រសៀកពីទិសខាងត្បូង ខណៈក្មេងទាំង២នាក់លង់លក់ក្នុងដំណេក។ ក្នុងពេលនោះខ្យល់បានបំប៉ើងរងើកភ្លើងពីចង្ក្រានបាយទៅប៉ះជញ្ជាំងខ្ទម ដែលបិទបាំងដោយស្លឹក ទើបបង្កឱ្យមានអគ្គីភ័យនេះឡើងហើយក៏បណ្ដាលឱ្យភ្លើងឆេះខ្ទមនេះយ៉ាងសន្ធោសន្ធៅ ។
ចំណែកប្រជាពលរដ្ឋដែលមានខ្ទមស្នាក់នៅក្នុងព្រៃក្បែរនោះ ពេលឃើញផ្សែងឆេះខ្មួលខ្មាញ់ឡើងទៅលើមេឃ នឹកស្មានតែភ្លើងឆេះព្រៃក៏នាំគ្នាទៅមើល ស្រាប់តែឃើញក្មេងរងគ្រោះត្រូវស្លាប់រួញក្រញង់ក្នុងភ្នក់ភ្លើងរួចទៅហើយ ក៏នាំគ្នារត់ទៅប្រាប់ឪពុកម្ដាយក្មេងរងគ្រោះ។ ទោះបីជាទទួលបានព័ត៌មានគួរឱ្យរន្ធត់បែបនេះប្រញាប់ប្រញាល់វិលត្រឡប់មកដល់កន្លែងកើតហេតុ បានត្រឹមមកឃើញសាកសពកូនៗឆេះរួញក្រញង់ ក៏យំសោកបោកខ្លួនដូចសត្វអកដោយក្ដីអាណិតអាសូរ និងអាលោះអាល័យជាទីបំផុត ហើយក៏នាំយកសពកូនៗយកទៅធ្វើបុណ្យតាមប្រពៃណី។ គ្រោះអគ្គីភ័យនេះក្រៅពីសម្លាប់ក្មេងៗអស់២នាក់និងឆេះខ្ទម១នេះ បានឆេះបំផ្លាញទ្រព្យសម្បត្ដិរបស់គ្រួសាររងគ្រោះអស់ស្រូវចំនួន៣ការ៉ុង និងខោអាវ មុង ភួយ ចានឆ្នាំងអស់មួយចំនួនទៀតផង។
ចែករំលែកព័តមាននេះ