អគ្គិភ័យឆេះភោជនីយដ្ឋានចិននៅជ្រោយចង្វារអស់រយៈពេល១យប់២ថ្ងៃ ទើបអាចទប់ស្កាត់បាន
- ភ្នំពេញ
រាជធានីភ្នំពេញ ៖ ភោជនីយដ្ឋានចិនយីហោ” ស៊ីហុងឡឺ ” ស្ថិតនៅអគារលេខ១៩៨ បុរីអូគីដេ ដឹប៉ូតានិចស៊ីធី ក្នុង ភូមិព្រែកតាគង់…
រាជធានីភ្នំពេញ ៖ ភោជនីយដ្ឋានចិនយីហោ” ស៊ីហុងឡឺ ” ស្ថិតនៅអគារលេខ១៩៨ បុរីអូគីដេ ដឹប៉ូតានិចស៊ីធី ក្នុង ភូមិព្រែកតាគង់ សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញត្រូវអគ្គីភ័យឆាបឆេះយ៉ាងសន្ធោរៗអស់រយៈពេលប្រមាណជាង ៣១ម៉ោងទើបសមត្ថកិច្ចបាញ់ពន្លត់ទប់ស្កាត់បាន។ទោះបីជាយ៉ាងណាអគារហាងតែចិនទាំងមូលត្រូវ បានបំផ្លាញទាំងស្រុងព្រមទាំងបង្កអោយមន្ត្រីនគរបាលពន្លត់អគ្គីភ័យម្នាក់បានរងរបួសផងដែរ។
ហេតុការណ៍អគ្គីភ័យនេះបានកើតឡើងតាំងពីវេលាម៉ោង ៥និង២៥នាទីព្រឹក ថ្ងៃទី០២ ខែសីហា ឆ្នាំ២០២៥ហើយបន្តរហូតមកដល់វេលាម៉ោង១២ថ្ងៃត្រង់ទី៣ខែសីហា ទើបទើបសមត្ថកិច្ចទប់ស្កាត់បាន។
ហាងតែចិននិងភោជនីយដ្ឋានដែលត្រូវភ្លើងឆេះជាប្រភេទសំណង់: ថ្មបេតុងទំហំ ១៥ម៉ែត្រx ១៨ម៉ែត្រ កម្ពស់៤ជាន់ ដែលមានម្ចាស់ឈ្មោះHUNG ZHI CHENG ភេទប្រុស អាយុ ៣៣ឆ្នាំ ជនជាតិ ចិន ។
តាមសាក្សីបានឲ្យដឹងថា នៅមុនពេលកើតហេតុគេឃើញភ្លើងបានឆាប់ឆេះហាងតែចិនខាងលើ ផ្សែងហុយខ្មួល ខ្មាញ់បង្កឲ្យមានការភ្ញាក់ផ្អើលដល់ប្រជាពលរដ្ឋនៅក្បែរខាងនាំគ្នាជួយពន្លត់និងទាក់ទងហៅរថយន្តពន្លត់អគ្គីភ័យទៅជួយអន្តរាគមន៍។ នៅក្នុងហេតុការណ៍នោះដែរគេឃើញរថយន្តពន្លត់អគ្គីភ័យជាច្រើនគ្រឿងបានទៅអន្តរាគមន៍បាញ់ពន្លតតាំងពីព្រឹករហូតដល់វេលាយប់មិនទាន់រលត់នៅឡើយ។
តាមព័ត៌មានឲ្យដឹងថា នៅវេលាម៉ោង១២ថ្ងៃត្រង់ទី ៣ខែសីហាឆ្នាំ២០២៥ នេះទើបសមត្ថកិច្ចទប់ស្កាត់ បានដោយប្រើរយៈពេលអស់ជាង៣១ ម៉ោង។ អគារតែចិន ដែលត្រូវភ្លើងឆេះខាងលើមានលក្ខណៈស្មុគស្មាញដោយមានជញ្ជាំងក្រាស់ៗជាច្រើនជាន់មានសម្ភារះច្រើន ,និងមិនមានទ្វារច្រើននោះទេ។សមត្ថកិច្ចជំនាញបានប្រើប្រាស់រថយន្តជណ្ដើរនិងរថយន្តខួងទម្លុះជញ្ជាំងដើម្បីបាញ់ពន្លត់។
តាមនគរបាលការិល័យបង្ការពន្លត់អគ្គិភ័យនិងសង្គ្រោះនៃស្នងការនគរបាលរាជធានីភ្នំពេញបានឲ្យដឹងថា នៅក្នុងហេតុការណ៍អគ្គិភ័យនេះសមត្ថកិច្ចបានប្រើប្រាស់រថយន្តពន្លត់អគ្គីភ័យចំនួន ៣០ គ្រឿងដោយប្រើប្រាស់ទឹកអស់ចំនួន ៣៣៧រថយន្តដែលក្នុងនោះ
រថយន្តការិយាល័យពន្លត់អគ្គីភ័យ ចំនួន ១៦គ្រឿង ប្រើប្រាស់ទឹកអស់ចំនួន៣២០ឡាន ស្មើរនឹង ១៩២០ម៉ែត្រគូប ,រថយន្តជំនួយ:កងពលតូចង៧០ចំនួន ០៨គ្រឿង ប្រើប្រាស់ទឹកអស់ចំនួន ១៣ឡាន ស្មើនឹង ១៣០ម៉ែត្រគូប ,រថយន្តអគ្គិភ័យក្រុមហ៊ុនOCICទីក្រុងជ្រោយចង្វារចំនួន ០៣គ្រឿង ប្រើប្រាស់ទឹកអស់ចំនួន ០៣ឡាន ស្មើនឹង ៣០ម៉ែត្រគូប ,រថយន្តបុរីអ័រគីដេចំនួន ០២គ្រឿង ប្រើប្រាស់ទឹកអស់ចំនួន ០១ឡាន ស្មើនឹង ០៦ម៉ែត្រគូប និងរថយន្តរដ្ឋបាលខណ្ឌជ្រោយចង្វារចំនួន ០១គ្រឿង តែពុំបានប្រើប្រាស់ទឹកឡើយហើយភ្លើងបានរលត់ទៅវិញនៅម៉ោង ១២ថៃ្ងត្រង់ថ្ងៃទី០៣ខែសីហា ឆ្នាំ២០២៥។
តាមនគរបាលបានឲ្យដឹងទៀតថា អគ្គិភ័យនេះបណ្ដាឱ្យអគារភោជនីយដ្ឋានទាំងមូលរួមទាំងសម្ភារៈត្រូវភ្លើងឆេះរងការខូចខាតទាំងស្រុងតែពុំបណ្ដាឲ្យឆេះរាលដាលដល់ផ្ទះ អ្នកក្បែរខាងឡើយ ។ នៅក្នុងហេតុការណ៍នោះដែរបណ្ដាលឲ្យមន្ត្រីជាប់កិច្ចសន្យាម្នាក់បានរងរបួសស្រាល ។ មូលហេតុនៃការកើតមានអគ្គីភ័យតាមនគរបាលឲ្យដឹងថាបណ្ដាមកពីឆ្នងចរន្ត ។ ទោះបីជាយ៉ាងណា គេពុំដឹងពីទំហំនៃការខូចខាតគិតជាប្រាក់អស់ប៉ុន្មានឡើយ ៕
ចែករំលែកព័តមាននេះ