ខេត្តស្វាយរៀង ៖ ប្រជាពលរដ្ឋមានការក្តៅក្រហាយនឹងអ្នកបើកបរគោយន្តដែលបានលួច ជីកដីទួលបុរាណមួយយកអាចម៌ដីលក់ឱ្យយួននៅចំណុចច្រករបៀង ស្រែបារាំង ភូមិតានូ ឃុំចម្លង ស្រុកស្វាយជ្រំ ។ បើតាមប្រជាពលរដ្ឋភូមិស្វាយតាភ្ល ឃុំបាសាក់ ស្រុកស្វាយជ្រំ សុំមិនបញ្ចេញឈ្មោះបានប្រាប់កោះសន្តិភាពថា ចាប់ពីថ្ងៃទី២៨ វិច្ឆិកា ដល់ថ្ងៃទី២ ធ្នូ មានក្រុមអ្នកបើកគោយន្ត
ខេត្តស្វាយរៀង ៖ ប្រជាពលរដ្ឋមានការក្តៅក្រហាយនឹងអ្នកបើកបរគោយន្តដែលបានលួចជីកដីទួលបុរាណមួយយកអាចម៌ដីលក់ឱ្យយួននៅចំណុចច្រករបៀងស្រែបារាំង ភូមិតានូ ឃុំចម្លង ស្រុកស្វាយជ្រំ ។ បើតាមប្រជាពលរដ្ឋភូមិស្វាយតាភ្ល ឃុំបាសាក់ ស្រុកស្វាយជ្រំ សុំមិនបញ្ចេញឈ្មោះបានប្រាប់កោះសន្តិភាពថា ចាប់ពីថ្ងៃទី២៨ វិច្ឆិកា ដល់ថ្ងៃទី២ ធ្នូ មានក្រុមអ្នកបើកគោយន្តចំនួន៤គ្រឿង បានចូលលួចជីកដីទួលបុរាណ គឺទួលតាម៉ម ស្ថិតនៅខាងត្បូងទួលវត្តតាព្រហ្ម ចម្ងាយ៥០ម៉ែត្រ ក្នុងភូមិស្វាយតាភ្ល ដឹកយកទៅលក់អស់ចំនួន២០០គោយន្តហើយដោយដឹកឆ្លងកាត់តាមច្រករបៀងស្រែបារាំង ចូលទៅទឹកដីវៀតណាម ភូមិតានូ ឃុំយិនហឹុង ស្រុកយិនហឹុង ខេត្តឡុងអាន ដើម្បីចាក់ដីធ្វើផ្សារជាប់ព្រំដែន ។
ប្រជាពលរដ្ឋខ្លះសង្ស័យថា លោកមេភូមិស្វាយតាភ្ល លក់ដីទួលតាម៉ម ឱ្យពួកគោយន្ត ។ ទាក់ទិននឹងករណីខាងលើលោកពៅ សូ៊ន អាយុ៦២ឆ្នាំ ជាមេភូមិស្វាយតាភ្ល បានមានប្រសាសន៍បំភ្លឺថា មិនពិតដូចការចោទប្រកាន់ពីប្រជាពលរដ្ឋនោះទេ។ លោកបានសុំអគារសិក្សា១ខ្នងមាន២បន្ទប់ សង់នៅសាលាបឋមសិក្សាស្វាយតាភ្ល ពីគម្រោងផែនការអភិវឌ្ឍន៍ឃុំ ក្នុងទឹកប្រាក់៦៤លានរៀល ដោយសាលាទឹកលិចក៏ចាក់ដីឱ្យខ្ពស់ ដូច្នេះក៏សុំអាចម៌ដីនៅទួលតាម៉ម ពីលោកប្រធានក្រុមប្រឹក្សាឃុំយកមកចាក់ដើម្បីសង់សាលា ពីព្រោះក្រោយពីទឹកជំនន់ជន់លិចពុំមានដីណាអាចជីកយកអាចម៌ដីបានទេ ដោយសារមានទឹកហើយក្រុមជាងដេញថ្លៃបានគេប្រញាប់សាងសង់ឱ្យទាន់កុងត្រា ទើបសុំជីកដីទួលតាម៉ម យកអាចម៌ដីដាក់សាលា។ ប៉ុន្តែពេលក្រុមគោយន្តដឹកដាក់សាលាពេញហើយក៏ឆ្លៀតឱកាសលួចដឹកដីទួលនោះបន្តរយៈពេល៥ថ្ងៃ ទើបប្រជាពលរដ្ឋទៅប្រាប់លោក ហើយលោកបានទៅឃាត់ឱ្យឈប់ដឹកដីនោះទៀត ក៏ប៉ុន្តែការដឹកអាចម៌ដីលក់ឱ្យវៀតណាមអស់ប៉ុន្មាននោះ លោកមិនបានដឹងទេ ហើយក៏ពុំបានលក់ឱ្យពួកគោយន្តដែរ ។
អ្នកភូមិថា ការដឹកដីចាក់សង់សាលា គឺអស់ចំនួន៧០គោយន្តប៉ុណ្ណោះ ហើយពួកគោយន្តសុំដឹកទៅស្វាយរៀង៤គោយន្តទៀត ។ ទាក់ទិនករណីខាងលើនេះដែរ លោកអ៊ូ ឆេង អាយុ៦៨ឆ្នាំ នៅភូមិស្វាយតាភ្ល ជាជំទប់ទី១ ឃុំបាសាក់ បានប្រាប់កោះសន្តិភាពថា ក្នុងឃុំបាសាក់នេះមានទួលបុរាណចំនួន១៦ ហើយភូមិស្វាយតាភ្លមានទួលចំនួន៦ គឺ១-ទួលដើមពោធិ៍ទំហំ២០ម៉ែត្រគុណ៤០ម៉ែត្រ ទី២-ទួលក្រួសទំហំ១៥ម៉ែត្រគុណ២០ម៉ែត្រ ទី៣-ទួលតាព្រហ្ម បច្ចុប្បន្នយកធ្វើជាវត្តទួលតាព្រហ្ម ទី៤-ទួលតាម៉មទំហំ៣០ម៉ែត្រគុណ៣៥ម៉ែត្រ ទី៥-ទួលសំពៅ មានរៀបដុំឥដ្ឋខឿនប្រាសាទទំហំ៤០ម៉ែត្រគុណ៥០ម៉ែត្រ និងទី៦-ទួលតាម៉ៅ ។ ទួលបុរាណទាំង៦នេះ ខ្ពស់មិនលិចទឹកទេ ទឹកជំនន់ឆ្នាំ២០០០ ក៏ពុំលិចដែរ រដ្ឋទុកធ្វើជាទួលសុវត្ថិភាពជម្លៀសប្រជាពលរដ្ឋឱ្យទៅរស់នៅពេលមានទឹកជំនន់ ។ បច្ចុប្បន្នទួលដើមពោធិ៍ ត្រូវពួកគោយន្តជីកយកអាចម៌ដីលក់នៅក្នុងអំឡុងខែកុម្ភៈ មកដល់ខែមករា ឆ្នាំ២០១១ បណ្តាលឱ្យទួលនេះរាបអស់ទាំងស្រុង រីឯទួលក្រួសកំពុងប្រឈមនឹងពួកគោយន្តលួចជីកយកអាចម៌ដីអស់មួយចំនួន ហើយចាប់ពីថ្ងៃទី២០ វិច្ឆិកា ២០១១ មកដល់ថ្ងៃទី៤ ធ្នូ ឆ្នាំ២០១១ នេះ ។ ទួលតាម៉ម ត្រូវគេលួចជីកយកអាចម៌ដីអស់ជម្រៅកន្លះម៉ែត្រពីលើទួលទាំងមូល ហើយក៏មានអ្នកម្ចាស់ស្រែក្បែរនោះលួចវាតធ្វើស្រែអស់មួយកូនអំពក និងវាតភ្លឺស្រែពីទួលតាម៉ម ទៅកាន់ទួលអ្នកតា ទួលតាព្រហ្មអស់ផងដែរ និងតាមចែងភ្លឺទួលតូចធំកែងស្រែក៏ត្រូវពួកគោយន្តលួចជីកយកអាចម៌ដីលក់ដែរ ទើបប្រជាពលរដ្ឋក្តៅក្រហាយសុំឱ្យសមត្ថកិច្ច និងអាជ្ញាធរធ្វើអន្តរាគមន៍ទប់ស្កាត់បើពុំដូច្នោះទេ ទួលបុរាណពិតជារលាយអស់មិនខាន ហើយក៏គ្មានទួលសុវត្ថិភាពទៀតដែរ ។
ចំពោះអ្នកជីកអាចម៌ដីលក់ឱ្យវៀតណាមធ្វើផ្សារនោះនិយាយថា ដីក្នុង១គោយន្តបានតម្លៃ ១៥.០០០រៀល ។ លោកញូង យ៉េន មេឃុំបាសាក់ បានមានប្រសាសន៍តាមទូរស័ព្ទថា ចំពោះក្រុមគោយន្តលួចជីកយកអាចម៌ដីនៅទួលតាម៉មនោះលោកពុំបានដឹងទេ លោកនឹងចុះទៅត្រួតពិនិត្យបញ្ឈប់មិនឱ្យមានការដឹកបន្តទៀតទេ ។ ការជីកបំផ្លាញទីទួលបុរាណគឺធ្វើឱ្យប៉ះពាល់ដល់ទួលសុវត្ថិភាព ជាពិសេសកន្លែងប្រជាពលរដ្ឋចាត់ទុកថា ជាទីសក្ការបូជា៕
ចែករំលែកព័តមាននេះ