ក្រុងប៉ោយប៉ែត ៖ សណ្ឋាគារមួយឈ្មោះ Star Vegas ដែលអ្នកក្រុងប៉ោយប៉ែតហៅថា កាស៊ីណូផ្កាយ៥ របស់ថៅកែឪពុក និងកូនជាជនជាតិសៀម ទទួលរងនូវការថ្កោលទោសថា មិន ព្រមទទួលយកប្រាក់រៀល និងប្រាក់ដុល្លារគ្រប់យ៉ាងទេ គឺពួកគេទាមទារយកតែប្រាក់បាតសៀមតែមួយគត់សម្រាប់ថ្លៃបន្ទប់សម្រាក ធ្វើដូចក្រុងប៉ោយប៉ែតជាទឹកដីសៀម ។
ក្រុងប៉ោយប៉ែត ៖ សណ្ឋាគារមួយឈ្មោះ Star Vegas ដែលអ្នកក្រុងប៉ោយប៉ែតហៅថា កាស៊ីណូផ្កាយ៥ របស់ថៅកែឪពុក និងកូនជាជនជាតិសៀម ទទួលរងនូវការថ្កោលទោសថា មិន ព្រមទទួលយកប្រាក់រៀល និងប្រាក់ដុល្លារគ្រប់យ៉ាងទេ គឺពួកគេទាមទារយកតែប្រាក់បាតសៀមតែមួយគត់សម្រាប់ថ្លៃបន្ទប់សម្រាក ធ្វើដូចក្រុងប៉ោយប៉ែតជាទឹកដីសៀម ។
ប្រភពព័ត៌មានច្បាស់ការណ៍មួយឱ្យដឹងថា ថ្មីៗនេះ មានតំណាងក្រុមហ៊ុនក្នុងស្រុកមួយនៅរាជធានីភ្នំពេញបានធ្វើបេសកកម្មនៅក្រុងប៉ោយប៉ែត ដើម្បីត្រួតពិនិត្យមើលសកម្មភាពមុខជំនួញសាខាក្រុមហ៊ុនរបស់ខ្លួននៅទីនោះ ។ ដោយយប់ជ្រៅបន្តិចទៅហើយ ក៏បាននាំគ្នាទៅសម្រាកនៅសណ្ឋាគារ Star Vegas ដែលពួកគេមិនដែលចូលសម្រាកទីនោះសោះ ។ ប្រភពព័ត៌មានដដែលប្រាប់កោះសន្តិភាពថា នៅកន្លែង ទទួលភ្ញៀវ បន្ទាប់ពីជួលបន្ទប់សម្រាកបានហើយ ក៏ចាប់ផ្តើមបង់ប្រាក់ថ្លៃបន្ទប់ ។ ប៉ុន្តែគួរឱ្យសោកស្តាយ និងគួរឱ្យស្អប់ខ្ពើមបំផុត ព្រោះអ្នកចាត់ការនៅទីនោះមិនព្រមទទួលយកប្រាក់រៀលទេ ។ បន្ទាប់មកឱ្យប្រាក់ដុល្លារ ក៏មិនទទួលយកដែរ ទោះបីឱ្យក្រេឌីខាត ក៏មិនព្រមទទួលយកទៀត គឺពួកគេទាមទារតែមួយមុខគត់ គឺប្រាក់បាតសៀម ។ ដោយយប់ជ្រៅបន្តិចទៅហើយ ធ្វើឱ្យភ្ញៀវខ្មែរដែលមានប្រាក់ដុល្លារប្រាក់រៀលពេញខ្លួនជួបការលំបាកយ៉ាងខ្លាំង ក្នុងការស្វែងរកដូរប្រាក់បាតសម្រាប់ថ្លៃបន្ទប់មួយយប់ នេះ ក៏សម្រេចចិត្តចាកចេញពីចំណុចខ្មៅនេះវិញ ទាំងក្រហមមុខ ។ មុនដើរចេញពី Star Vegas ភ្ញៀវខ្មែរដ៏មានកិត្តិយសមួយ
ក្នុងសង្គមដែរ និយាយថា ទីនេះជាដីរបស់ខ្មែរ ហេតុអ្វីបានជាអ្នកឯងមិនយកលុយខ្មែរ? ឱ្យលុយដុល្លារដែលគេចាយពេញពិភពលោក ក៏លោកឯងមិនយកទៀត ។ ឱ្យប័ណ្ណដកប្រាក់ទៅអ្នកឯង ហើយក៏មិនទទួលយក តើហេតុអីបានជាអ្នកឯងកំណត់យកតែលុយបាតមួយមុខ? ទីនេះទឹកដីខ្មែរ ហើយខ្ញុំជាខ្មែរម្ចាស់ស្រុក ហេតុអីលោកឯងរើសអើងយ៉ាងនេះ?
អាកប្បកិរិយាបែបនេះ តើថ្ងៃក្រោយមានភ្ញៀវណាហ៊ានវង្វេងចូលស្នាក់នៅទៅ?
ប្រភពដដែលបាននិយាយថា ទោះបីនិយាយបែបណាក៏ដោយ ជនជាតិសៀមដែលជាអ្នកទទួលបន្ទុកចាត់ការទីនោះធ្វើមិនដឹងដែលបង្ហាញយ៉ាងច្បាស់ថា ពួកគេមិនត្រូវការប្រាក់ប្រភេទណាផ្សេង ក្រៅពីប្រាក់បាតរបស់ជនជាតិគេឡើយ ។
បើតាមក្រុមអ្នកវិភាគបាននិយាយថា ឈ្មួញប្រភេទណាក៏ដោយ បើជាអ្នករកស៊ីសុទ្ធសាធ ទោះប្រាក់ប្រភេទណាក៏ដោយ ឱ្យតែគេចាយ គេត្រូវតែទទួលយកយ៉ាងពិតប្រាកដ ។ មានតែឈ្មួញបង្កប់ដោយនយោបាយពិសពុលណាមួយទើបពួកគេរើសអើង ឬជាអ្នកជាតិនិយមជ្រុលនៃជាតិសាសន៍គេតែប៉ុណ្ណោះ ដែលធ្វើបែបនេះ ។
តាមការកត់សម្គាល់កន្លងមក កាស៊ីណូយីហោ Star Vegasនេះ ធ្លាប់បានចាប់មនុស្ស៥នាក់បង្ខាំងទុកដោយខុសច្បាប់ក្នុងទ្រុងដែកសម្ងាត់មួយក្នុងបរិវេណសណ្ឋាគារកាស៊ីណូរបស់ខ្លួន ។ ក្រោយពីមានដំណឹងបែបនេះ អាជ្ញាធរក្រុងប៉ោយប៉ែតរួមជាមួយអាជ្ញាធរខេត្តបន្ទាយមានជ័យបានលើកកម្លាំងទៅរំដោះមនុស្សរងគ្រោះទាំង៥នាក់ឱ្យរួចខ្លួនមកវិញ ។ ក្រោយពីសួរនាំត្រូវបានថៅកែទីនោះនិយាយថា មនុស្ស៤នាក់ត្រូវជាប់ចោទពីបទលួចខ្សែភ្លើងត្រូវជាប់ទ្រុងដែក អត់នរណាដឹង ។ ឯម្នាក់ទៀត ជាប់ទ្រុងដែកជាង៨ខែយ៉ាងសម្ងាត់ ដោយចោទថា យកកាក់ក្លែងក្លាយមកបន្លំលេងល្បែង។
ក្រុមអ្នកវិភាគនិយាយថា កាស៊ីណូនៅលើដីខ្មែរត្រូវតែគោរពច្បាប់របស់ខ្មែរ ។ ចង់ចាប់ចង់ចងត្រូវតែប្តឹងមកសមត្ថកិច្ចខ្មែរ មិនត្រូវប្រព្រឹត្តអំពើដែលគេយល់ថា ជាគំនិតនៃក្រុមម៉ាហ្វីយ៉ាបែបនេះឡើយ។
កោះសន្តិភាពមិនអាចទំនាក់ទំនងសុំការបំភ្លឺពីជនជាតិសៀមដែលជាថៅកែកាស៊ីណូនេះបាន ទេ ម្សិលមិញនេះ ប៉ុន្តែសន្តិសុខម្នាក់ដែលប្រចាំការទីនោះនិយាយថា ស្តារវេហ្គាសនេះ មានថៅកែជាជនជាតិសៀម២នាក់ឪពុកនិងកូន ។
តាមក្រុមអ្នកវិភាគនិយាយថា រឿងអាក្រក់បែបនេះគួរតែក្រហមមុខដាក់ចៅហ្វាយក្រុងប៉ោយប៉ែត ទើបត្រូវជាង ព្រោះធ្វើដល់ទៅចៅហ្វាយគ្រប់គ្រងក្រុងប៉ោយប៉ែតទាំងមូល បណ្តោយឱ្យឈ្មួញបរទេសធ្វើព្យុះធ្វើភ្លៀងតាមចិត្តនៅក្រោមច្រមុះរបស់ខ្លួន ។
គួរបញ្ជាក់ថា ប្រាក់រៀលជារូបិយបណ្ណជាតិ ឬជាអត្តសញ្ញាណជាតិខ្មែរយើង ដែលត្រូវតែលើកដំកើង មិនគួរចៅហ្វាយក្រុងប៉ោយប៉ែតទុកឱកាសឱ្យឈ្មួញបរទេសជាន់ឈ្លីបែបនេះឡើយ ៕
ចែករំលែកព័តមាននេះ