ខេត្ដក្រចេះ ៖ ពិរុទ្ធជនម្នាក់បានស្លាប់ នៅក្នុងមន្ទីរពេទ្យខេត្ដ កាលពីព្រឹកថ្ងៃទី១៦ ឧសភា ដោយសារតែមានជំងឺធ្ងន់ធ្ងរព្យាបាល មិនជាតាំងពីនៅក្នុងពន្ធនាគាររហូតបញ្ជូនមកព្យាបាលនៅមន្ទីរពេទ្យ ។មន្ដ្រីពន្ធនាគារខេត្ដមួយរូបបានប្រាប់ឱ្យ ដឹងថាពិរុទ្ធជនដែលបានបញ្ជូនមកធ្វើការសង្គ្រោះនៅមន្ទីរពេទ្យ ហើយស្លាប់បាត់បង់ជីវិតនោះឈ្មោះថោង វី ភេទប្រុស អាយុ៣៩ឆ្នាំ មានស្រុកកំណើតនៅភូមិសម៉ ឃុំទឹកជ្រៅ ស្រុកតំបែរ ខេត្ដកំពង់ចាម ហើយ បានមកធ្វើចំការនៅភូមិវាលបី ឃុំ២ធ្នូ ស្រុកស្នួល ជាប់ចោទពីបទមនុស្សឃាតដោយចេតនា ។
ពិរុទ្ធជនរូបនេះ និងបក្សពួកមានគ្នា៥នាក់បានព្រួតវាយ និងកាប់ជនរងគ្រោះ ឈ្មោះម៉ៅ ជា មានទីលំនៅក្នុងភូមិ-ឃុំ ខាងលើជាមួយគ្នា ជាច្រើនកាំបិតផ្គាក់ បណ្ដាលឱ្យស្លាប់នៅនឹងកន្លែងកាលពីថ្ងៃទី២៣ កុម្ភៈ ឆ្នាំ២០១០កន្លងទៅ ហើយត្រូវបានចាប់ខ្លួនបញ្ចូនមកឃុំខ្លួនបណ្ដោះអាសន្ននៅពន្ធនាគារ កាលពីថ្ងៃទី២៦ កុម្ភៈ ឆ្នាំ ២០១០ រង់ចាំសវនាការកាត់ទោស ។មន្ដ្រីរូបនោះបានឱ្យដឹងទៀតថា ពិរុទ្ធជនរូបនេះបន្ទាប់ពីបានធ្វើការឃុំខ្លួននៅពន្ធនាគារតាំងពីថ្ងៃដំបូងគឺមានជំងឺថប់ដង្ហើម ណែនទ្រូង និងពោះរីកធំ ដែលគ្រូពេទ្យថា ជាជំងឺថ្លើម ហើយក៏បានព្យាបាលនៅក្នុងពន្ធនាគារមួយរយៈ និងបញ្ជូនមកព្យាបាលនៅ មន្ទីរពេទ្យអស់រយៈពេលជាង២សបា្ដហ៍ទៅហើយ តែមិនអាចជាសះស្បើយក៏ស្លាប់ ។
នៅព្រឹកនោះដែរ គេឃើញមន្ដ្រីសាលាដំបូងខេត្ដ និងមន្ដ្រីប៉ូលិសបានចុះទៅដល់មន្ទីរពេទ្យ ដើម្បីពិនិត្យមើលសពពិរុទ្ធជនខាងលើ និងបានប្រគល់សពជូនទៅក្រុមគ្រួសារ ប៉ុន្ដែដោយសារគ្រួសារសពមិនមានលទ្ធភាពក្នុងការដឹកជញ្ជូនទើបមន្ដ្រីពន្ធនាគារខេត្ដបានយកសពទៅធ្វើការបូជាតែម្ដង ។
ចែករំលែកព័តមាននេះ