ខេត្តតាកែវ ៖ ទីតាំងចាក់ភ្នាល់បាល់ទះចំនួន២កន្លែង កំពុងលេងដាក់លុយរាប់លានរៀលក្នុង១សិតៗ ដោយពុំមានអាជ្ញាធរ និងសមត្ថកិច្ចខាងណាទប់ស្កាត់ឬបង្ក្រាបឡើយ ហើយចំពោះគូដែលណាត់គ្នាមកប្រកួតនោះ សុទ្ធសឹងតែអ្នកមានលុយនិងអ្នកមានខ្នងបង្អែក ដែលក្នុង១សិតៗពួកគេភ្នាល់គ្នាចាប់ពី៣លានរៀលទៅ១៥លាន រៀល ។
ខេត្តតាកែវ ៖ ទីតាំងចាក់ភ្នាល់បាល់ទះចំនួន២កន្លែង កំពុងលេងដាក់លុយរាប់លានរៀលក្នុង១សិតៗ ដោយពុំមានអាជ្ញាធរ និងសមត្ថកិច្ចខាងណាទប់ស្កាត់ឬបង្ក្រាបឡើយ ហើយចំពោះគូដែលណាត់គ្នាមកប្រកួតនោះ សុទ្ធសឹងតែអ្នកមានលុយនិងអ្នកមានខ្នងបង្អែក ដែលក្នុង១សិតៗពួកគេភ្នាល់គ្នាចាប់ពី៣លានរៀលទៅ១៥លានរៀល ។
ប្រភពព័ត៌មានពីអ្នកញៀនល្បែងភ្នាល់បាល់ទះបានឱ្យដឹងថា ទីតាំង២កន្លែងដែលកំពុងលេងភ្នាល់បាល់ទះរាល់ថ្ងៃនេះគឺមួយនៅភូមិថ្នល់បែក សង្កាត់រកាក្រៅ ក្រុងដូនកែវ និងមួយទៀតនៅខាងជើងផ្សារអង្គតាសោម ស្រុកត្រាំកក់ ។ ទីតាំងទាំង២នេះ គេលេងភ្នាល់សុទ្ធតែគូខ្លាំងៗ ហើយនៅពេលគូពិសេសណាត់គ្នាមកលេងម្តងៗមានមនុស្សមកមើលគគ្រឹកគគ្រេង ចតរថយន្ត ម៉ូតូត្រៀបត្រាពេញផ្លូវដើម្បីចូលមើលផងនិងដាក់លុយភ្នាល់ផង ។ អ្នកឈ្នះសប្បាយរីករាយ ឯអ្នកចាញ់រកវិធីបែបណាបានលុយមកចាក់ភ្នាល់គ្នាបន្តទៀត ។
ប្រភពដដែលបានបន្តថា កាលពីថ្ងៃទី២១ តុលា កន្លងទៅ នៅទីតាំងភូមិថ្នល់បែក សង្កាត់រកាក្រៅ ក្រុងដូនកែវ មានគូពិសេសមកប្រកួតគ្នាគឺក្រុមថៅកែគោ និងក្រុមប្រេងម៉ាស៊ីន ។ សិតដំបូងពួកគេចាក់ភ្នាល់គ្នា៣លានរៀល អ្នកចាញ់សិតទី១ បានបកសិតទី២ ចំនួន៧លានរៀល ។ នៅសិតទី២ ក្រុមថៅកែគោបានចាញ់ក្រុមប្រេងម៉ាស៊ីនទៀត រួចបក១៤លានរៀល នៅតែចាញ់ដដែល សរុបទៅក្រុមថៅកែគោចាញ់ជាង២០លានរៀល ។ ចំពោះលុយភ្នាល់១លានរៀលម្ចាស់ទីតាំងយកតុង១០ម៉ឺនរៀល នេះមិនគិតអ្នកដែលចូលមើលចាក់ភ្នាល់គ្នាខាងក្រៅផងទេ។ ឯចំពោះទីតាំងនៅខាងជើងផ្សារអង្គតាសោម ស្រុកត្រាំកក់ កាលពីថ្ងៃទី២២ តុលា ក្រុមជើងខ្លាំងបានណាត់គ្នាប្រកួតបាល់ទះ១សិត៧លានរៀល ។ ទីតាំងទាំង២នេះគេបានបើកលេងយូរមកហើយ អត់ដែលមានសមត្ថកិច្ចបង្ក្រាបម្តងណាឡើយ ឃើញតែនៅពេលចប់ការប្រកួតមានមន្ត្រីអសកម្មខ្លះទៅយកលុយពីម្ចាស់ទីតាំងប៉ុណ្ណោះ។
គួររំលឹកថា កាលពីថ្ងៃបុណ្យភ្ជុំបិណ្ឌកន្លងទៅទីតាំងខាងជើងផ្សារអង្គតាសោមបានភ្នាល់គ្នា១សិត ជាង១០លានរៀល ហើយដោយសារអ្នកចាញ់មិនព្រមឱ្យលុយទៅអ្នកឈ្នះក៏មានការដកកាំភ្លើងខ្លីរកបាញ់គ្នាថែមទៀតផង ។ ចំណែកនៅថ្ងៃទី២៣ តុលា ទីតាំងស្ថិតក្នុងសង្កាត់រកាក្រៅ ក្រុងដូនកែវ មានជើងខ្លាំងចំនួន២គូ ប្រកួតគ្នា ក្នុងនោះ១គូ១សិត ១០លានរៀល រីឯ១គូទៀត១សិត២០លានរៀល ។
ចំពោះបញ្ហានេះ មតិទូទៅបានលើកឡើងថា គួរតែអាជ្ញាធរនិងសមត្ថកិច្ចមានវិធានការខ្លះផង មិនគួរឱ្យគេជិះសេះលែងដៃដូច្នេះឡើយ ៕
ចែករំលែកព័តមាននេះ