រាជធានីភ្នំពេញ ៖ ថៃ ប៊ុនហាន មកពីក្លឹបបុរីនាគរាជ ជួបហ៊ឹម សារ៉ាន់ មកពីក្លឹបកីឡាប្រដាល់ក្រសួងការពារជាតិនៅលើសង្វៀន CTN ថ្ងៃសៅរ៍ ទី៨ តុលា ខាងមុននេះ។ ទាំងសងខាងសុទ្ធតែមិនហ៊ានចេញមុខធ្វើការអះអាងពីការចាញ់-ឈ្នះទុកមុនដូចគ្នា ប៉ុន្តែក្នុងចិត្តរបស់គេម្នាក់ៗគឺមិនត្រូវការចាញ់ឡើយ ព្រោះមិនចង់ឱ្យអ្នកគាំទ្ររបស់ខ្លួនបាត់បង់ជំនឿ។
រាជធានីភ្នំពេញ ៖ ថៃ ប៊ុនហាន មកពីក្លឹបបុរីនាគរាជ ជួបហ៊ឹម សារ៉ាន់ មកពីក្លឹបកីឡាប្រដាល់ក្រសួងការពារជាតិនៅលើសង្វៀន CTN ថ្ងៃសៅរ៍ ទី៨ តុលា ខាងមុននេះ។ ទាំងសងខាងសុទ្ធតែមិនហ៊ានចេញមុខធ្វើការអះអាងពីការចាញ់-ឈ្នះទុកមុនដូចគ្នា ប៉ុន្តែក្នុងចិត្តរបស់គេម្នាក់ៗគឺមិនត្រូវការចាញ់ឡើយ ព្រោះមិនចង់ឱ្យអ្នកគាំទ្ររបស់ខ្លួនបាត់បង់ជំនឿ។
អ្នកប្រដាល់ចិត្តស្រាលថៃ ប៊ុនហាន និយាយថា ខ្លួនមិនហ៊ានវាយតម្លៃហ៊ឹម សារ៉ាន់ ថាយ៉ាងណានោះទេ ព្រោះគេក៏ហាត់ខ្លួនក៏ហាត់ អ្នកណាខ្លាំង ឬខ្សោយ រង់ចាំមើលការប្រកួតរួចសិន ។ ប៉ុន្តែប៊ុនហាន សរសើរថា សារ៉ាន់ មានចិត្តធ្ងន់ ចេះប្រើកម្លាំងអាចតស៊ូបាន៥ទឹកពេញដោយមិនលំបាកឡើយ ។ ដូច្នេះគេមានតែវិធីម្យ៉ាងគត់ គឺធ្វើយ៉ាងណាបង្កើនការវាយសម្រុកក្នុងទឹកទី១ ដល់ទឹកទី៣ ទើបបាន ។ ប៊ុនហាន មិនសូវប្រសប់ខាងប្រើស្នៀតកែង និងជង្គង់ឡើយ តែបើស្នៀតជើង និងស្នៀតកណ្តាប់ដៃវិញនោះ គឺមិនអន់ឡើយ ។ ចំណែកហ៊ឹម សារ៉ាន់វិញ គេមិនចូលចិត្តមើលស្រាលលើគូប្រកួត តែក៏មិនបណ្តោយឱ្យគូប្រកួតធ្វើអ្វីស្រេចតែចិត្តនោះដែរ។ លើកនេះ គេគិតថា ប៊ុនហាន ក៏ជាជើងខ្លាំងម្នាក់ ដូច្នេះគេមិនអាចធ្វេសប្រហែសបានឡើយ។
ជឹម សារ៉ាត់ មកពីក្លឹបសិង្ហកីឡា ជួបផុន ផុល មកពីក្លឹបតាព្រហ្មមានជ័យ ។ រវាងគូនេះ ក៏ពិបាកក្នុងការវាយតម្លៃបន្តិចដែរ ព្រោះជឹម សារ៉ាត់ ចាស់វស្សាជាង ប៉ុន្តែកម្រិតបច្ចេកទេសរបស់គេសព្វថ្ងៃធ្លាក់ចុះច្រើនជាងមុនឆ្ងាយណាស់ មិនអាចលេងសើចជាមួយអ្នកប្រដាល់ស្រករក្រោយដូចផុន ផុល ដែលមានកម្លាំងខ្លាំងជាងនោះដែរ ។ ជឹម សារ៉ាត់ ល្អផ្លែកែង និងជង្គង់ តែផុន ផុល ល្អស្នៀតកណ្តាប់ដៃ និងស្នៀតជើង ដូច្នេះគូនេះល្អម្យ៉ាងម្នាក់ មិនដឹងថាអ្នកណាខ្លាំងជាងនោះទេ ។ សេក គឹមគីម មកពីក្លឹបសឹករងខេត្តសៀមរាប ជួបប្រាក់ មករា មកពីក្លឹបរស្មីកុមារកំព្រា។ ហែល វ៉ា មកពីក្លឹបឃ្លាំងមឿនកីឡា ជួបប្រកួតជាមួយយ៉េន ឌីណា មកពីក្លឹបក្រសួងកសិកម្ម ។
ដោយឡែកសម្រាប់ថ្ងៃអាទិត្យ ទី៩ តុលា នៅលើសង្វៀន CTN នោះដែរ ឡន លឿប មកពីក្លឹបកងពលតូចលេខ៧០ ឡើងសាកកម្លាំងជាមួយអូត ភូថង មកពីក្លឹបកីឡាប្រដាល់ក្រសួងការពារជាតិម្តងទៀត ។
ឡន លឿប ធ្លាប់បានទទួលមេរៀនពីអួត ភូថង រួចម្តងមកហើយនៅលើសង្វៀនប៉ុស្តិ៍លេខ៣ កាលពីប៉ុន្មានសប្តាហ៍មុន ដោយចាញ់ត្រឹមតែ ពិន្ទុប៉ុណ្ណោះ ប៉ុន្តែអូត ភូថង ក៏វេទនាមិនតិចដែរ។ ឡន លឿប មានស្នៀតម៉ាត់ត្រង់ល្អគួរសម ប៉ុន្តែកម្លាំងមិនសូវខ្លាំងប៉ុន្មានឡើយ ។ ការជួបអូត ភូថង កាលពីលើកមុនគេហាក់បីដូចជាចាញ់សម្លុតអូត ភូថង មិនសូវហ៊ានចូលកៀកឡើយ ។ អូត ភូថង ចិត្តរបស់គេហ៊ានស្នៀតកណ្តាប់ដៃអាចវាយចេញបានត្រង់ល្អ តែអន់កម្លាំងបន្តិច។ ប៉ុន្តែសម្រាប់ការជួបគ្នាលើកនេះ គេនៅមិនទាន់ដឹងថា អូត ភូថង មានវាសនាល្អដូចមុនទៀត ឬយ៉ាងណានោះទេ ដូច្នេះមានតែរង់ចាំអ៊ុតមើលលទ្ធផលនៃការប្រកួតនៅថ្ងៃនោះចុះ។
ក្រៅពីគូឯកខាងលើនៅមានកីឡាករជាច្រើនទៀតដែលត្រូវឡើងមកសម្តែងឫទ្ធិដាក់គ្នាក្នុងនោះមានដូចជា ខុន រិទ្ធ មកពីក្លឹបកងពលធំអន្តរាគមន៍លេខ៣ ព្រះវិហារ ជួបមៀច សុខរ៉ា មកពីក្លឹបក្រសួងមហាផ្ទៃ ។ គួន ប៊ុនហ៊ឹម មកពីក្លឹបពន្លឺសាមគ្គីខេត្តបាត់ដំបង ជួបផន ប៊ុនម៉ៅ មកពីក្លឹបបុរីរាជសីហ៍មានឫទ្ធិ ។ អ៊ុំ ចំរើន មកពីក្លឹបតាឡីដំរីមានឫទ្ធិ ជួបកង មករា មកពីក្លឹបកងទ័ពឆត្រយោង៩១១ ៕
ចែករំលែកព័តមាននេះ