ក្រុងប៉ោយប៉ែត ៖ ចំណតមួយដែលទើបតែបង្កើតឡើងជាងមួយឆ្នាំ នៅចំណុចរង្វង់មូលច្រកទ្វារប៉ោយប៉ែត ស្ថិតក្នុងភូមិក្បាលស្ពាន១ សង្កាត់ប៉ោយប៉ែត គឺជាចំណតរថយន្តឈ្នួលសម្រាប់ដឹកពលករខ្មែរដែលចេញពីស្នាក់ការប៉ូលិសអន្តោប្រវេសន៍ក្រោយពីសមត្ថកិច្ចសៀមចាប់បញ្ជូនមកវិញនោះ នៅថ្ងៃទី៣ តុលា ត្រូវបានអាជ្ញាធរ និងសមត្ថកិច្ចក្រុងប៉ោយប៉ែតប្តូរទៅជាកន្លែងចតម៉ូតូកង់បីវិញ ដើម្បីកែលម្អសោភ័ណភាពច្រកទ្វារ និងលុបបំបាត់ភាពអនាធិបតេយ្យនៃការចាប់ម៉ូយ និងការដូរលុយរញ៉េរញ៉ៃដែលតែងតែកើតមានជារឿយៗពេលកន្លងមក។
ការប្តូរទីតាំងចំណតស៊ីឈ្នួលដឹកពលករទៅជាចំណតម៉ូតូកង់បីវិញនោះ ត្រូវបានលោកវរសេនីយ៍ត្រីអ៊ុំ សុផល អធិការនគរបាលក្រុងបានប្រាប់កោះសន្តិភាពថា ដោយសារកន្លងមកចំណតខាងលើនេះ ចេះតែមានបញ្ហាឥតឈប់ឈរ ព្រមទាំងមានភាពអនាធិបតេយ្យពីក្រុមអ្នកចាប់ម៉ូយរថយន្ត និងអ្នកដូរលុយបង្កឱ្យប៉ះពាល់ដល់សណ្តាប់ធ្នាប់សាធារណៈ។ ម្យ៉ាងការចតម៉ូតូកង់បីនៅចំណុចរង្វង់មូល និងតាមផ្លូវលំចូលផ្ទះអ្នកស្រុកបានធ្វើឱ្យខូចសោភ័ណភាពក្រុង ទើបមានការពិគ្រោះយោបល់ជាមួយអភិបាលក្រុង និងសមត្ថកិច្ចពាក់ព័ន្ធប្តូរយកចំណតនោះធ្វើជាកន្លែងដាក់ម៉ូតូកង់បីវិញ។
ចំពោះពលករក្រោយចេញពីស្នាក់ការប៉ូលិសអន្តោប្រវេសន៍ត្រូវបានកម្លាំងសមត្ថកិច្ចតម្រូវឱ្យដើរសំដៅទៅមុខ បរិវេណប្រៃសណីយ៍ និងទូរគមនាគមន៍វិញ ដើម្បីឱ្យរករថយន្តជិះដោយខ្លួនឯង ព្រោះក្នុងបរិវេណប្រៃសណីយ៍នោះមានរថយន្តច្រើនគ្រឿង ចតចាំនៅទីនោះហើយមានសណ្តាប់ធ្នាប់ល្អ។
ចំពោះអ្នកដូរលុយលោកអធិការប្រាប់ថា ជាគោលការណ៍លែងឱ្យមានហើយ ព្រោះអ្នកបើកដូរលុយនោះមានចំនួនច្រើនពេកពី៤០ទៅ៥០នាក់ ធ្វើឱ្យមានការរញ៉េរញ៉ៃ ដើរដូរលុយគ្មានច្បាប់ទម្លាប់។
ការរៀបចំថ្មីនៅព្រឹកថ្ងៃ៣ តុលា នេះ គេឃើញមានវត្តមានលោកង៉ោ ម៉េងជ្រួន អភិបាលក្រុងប៉ោយប៉ែត បានចុះមកពិនិត្យមើលផងដែរ។
នេះជាជំហានដំបូងនៃការប្តូរយុទ្ធវិធីថ្មីរបស់អាជ្ញាធរ និងសមត្ថកិច្ចក្រុង។ គេចាំមើលថា តើអាចនឹងទទួលជោគជ័យ ឬក៏នៅតែបន្តមានភាពអនាធិបតេយ្យដដែល ព្រោះកន្លងមកដោយសារការចាប់ម៉ូយអនាធិបតេយ្យនេះឯង បានធ្វើឱ្យស្ត្រីម្នាក់ត្រូវអ្នករត់តាក់ស៊ីម្នាក់ដឹកយកទៅរំលោភ ដែលរហូតមកដល់ពេលនេះ មិនទាន់ត្រូវបានចាប់ខ្លួនជនល្មើសនៅឡើយទេ ទោះបីជាស្គាល់អត្តសញ្ញាណហើយក្តី ៕
ចែករំលែកព័តមាននេះ