រាជធានីភ្នំពេញ ៖ សមត្ថកិច្ចចម្រុះមានប៉េអឹម ប៉ូលិស មន្ត្រីរដ្ឋបាលព្រៃឈើ អាជ្ញាធរមូលដ្ឋាន និងមន្ត្រីតុលាការបានធ្វើការឆែកឆេររឹបអូសឈើគ្រញូង ពីក្នុងផ្ទះវីឡាធំមួយ (គ្មានលេខ) និងឃាត់ខ្លួនកម្មករ១នាក់ជាអ្នកយាមផ្ទះ កាលពីវេលាម៉ោងជាង១២រសៀលថ្ងៃទី៣១ សីហា ២០១១ ស្ថិតក្នុងភូមិដីថ្មី ក្រុម៤ សង្កាត់ភ្នំពេញថ្មី
រាជធានីភ្នំពេញ ៖ សមត្ថកិច្ចចម្រុះមានប៉េអឹម ប៉ូលិស មន្ត្រីរដ្ឋបាលព្រៃឈើ អាជ្ញាធរមូលដ្ឋាន និងមន្ត្រីតុលាការបានធ្វើការឆែកឆេររឹបអូសឈើគ្រញូងពីក្នុងផ្ទះវីឡាធំមួយ (គ្មានលេខ) និងឃាត់ខ្លួនកម្មករ១នាក់ជាអ្នកយាមផ្ទះ កាលពីវេលាម៉ោងជាង១២រសៀលថ្ងៃទី៣១ សីហា ២០១១ ស្ថិតក្នុងភូមិដីថ្មី ក្រុម៤ សង្កាត់ភ្នំពេញថ្មី ខណ្ឌសែនសុខ បង្កឱ្យមានការភ្ញាក់ផ្អើលផងដែរ ព្រោះតែសមត្ថកិច្ចបានធ្វើការត្រួតពិនិត្យរាប់ម៉ោង។
ភ្លាមៗគេមិនទាន់ដឹងថា ឈើគ្រញូងទាំងនោះ មានចំនួនប៉ុន្មានម៉ែត្រគូបនៅឡើយទេ ព្រោះសមត្ថកិច្ចមិនបង្ហើបឱ្យដឹង ប៉ុន្តែគេឃើញរថយន្តកូរ៉េប្រភេទ១តោនកន្លះដឹកឈើគ្រញូងទាំងនោះចេញពីផ្ទះវីឡខាងលើចំនួន៤ឡាន លុះរហូតមកដល់វេលាម៉ោង៥ល្ងាច ទើបសមត្ថកិច្ចបង្ហើបឱ្យដឹងថា មានចំនួន៧.៧៤៤គីឡូក្រាម។ ផ្ទះវីឡាដែលលាក់ទុកឈើគ្រញូងនេះ មិនត្រូវបានគេបង្ហើបឱ្យដឹងថា ជាផ្ទះរបស់អ្នកណាទេ ប៉ុន្តែប្រជាពលរដ្ឋជិតខាងស្គាល់ថា ជាអតីតផ្ទះរបស់មន្ត្រីជាន់ខ្ពស់កងរាជអាវុធហត្ថមួយរូប។
ពេលប្រតិបត្តិការនៅក្នុងផ្ទះវីឡាលាក់ទុកឈើគ្រញូងនេះ គេសង្កេតឃើញមានលោកចាន់ រិទ្ធី នាយអធិការដ្ឋានរដ្ឋបាលព្រៃឈើខាងត្បូងបឹងទន្លេសាប លោកព្រះរាជអាជ្ញារងលី សុផាណា លោកជា ខេមា អភិបាលរងខណ្ឌសែនសុខ មេបញ្ជាការប៉ូលិស ប៉េអឹមខណ្ឌជាច្រើននាក់ទៀត។ កម្មករម្នាក់ដែលត្រូវបានឃាត់ខ្លួននេះ សមត្ថកិច្ចបានសួរចម្លើយ ប៉ុន្តែគេមិនបាននិយាយលម្អិតយ៉ាងណានោះទេ ក្រៅពីពាក្យថា មិនដឹងរឿងអ្វីច្រើនឡើយ ព្រោះខ្លួនជាកម្មករ។ ឈើគ្រញូងដែលរឹបអូសទាំងប៉ុន្មានត្រូវបញ្ជូនយកទៅរក្សាទុកនៅទីស្នាក់ការរដ្ឋបាលព្រៃឈើនៃអធិការដ្ឋានខាងត្បូងបឹងទន្លេសាប៕
ចែករំលែកព័តមាននេះ