រាជធានីភ្នំពេញ ៖ បុរសម្នាក់ត្រូវមែកឈើបាក់សង្កត់ពីលើបែកក្បាលសន្លប់ស្ដូកស្ដឹង ខណៈពេលទៅស៊ីឈ្នួលកា.ប់ឈើឱ្យថៅកែនៅឃុំស្រែណូយ ស្រុកវ៉ារិន ខេត្ដសៀមរាប កាលពីវេលាម៉ោង៤ និង១០នាទីរសៀលថ្ងៃទី២៦ សីហា ២០១១ ។
រាជធានីភ្នំពេញ ៖ បុរសម្នាក់ត្រូវមែកឈើបាក់សង្កត់ពីលើបែកក្បាលសន្លប់ស្ដូកស្ដឹង ខណៈពេលទៅស៊ីឈ្នួលកាប់ឈើឱ្យថៅកែនៅឃុំស្រែណូយ ស្រុកវ៉ារិន ខេត្ដសៀមរាប កាលពីវេលាម៉ោង៤ និង១០នាទីរសៀលថ្ងៃទី២៦ សីហា ២០១១ ។
បុរសនោះឈ្មោះសេង សាក់ អាយុ៣៨ឆ្នាំ មុខរបរធ្វើស្រែមានប្រពន្ធ២នាក់ ១-ឈ្មោះឃឹម គា អាយុ៤១ឆ្នាំ មានកូន៥នាក់ និងប្រពន្ធ ទី២ឈ្មោះម៉ូ ស៊ីចាន់ អាយុ៤២ឆ្នាំ មានកូន៣នាក់ ស្នាក់នៅជុំគ្នានៅស្រុកកំពង់លែង ខេត្ដកំពង់ឆ្នាំង ។
តាមស្ត្រីឈ្មោះម៉ូ ស៊ីចាន់ ឱ្យដឹងថា ការរស់នៅជុំគ្នាជាមួយប្ដី និងប្រពន្ធដើម គឺរស់នៅមានសុភមង្គលនឹងគ្នាណាស់ ដោយប្រពន្ធទាំងពីរស្រឡាញ់រាប់អានគ្នាដូចបងប្អូន ហើយគោរពគ្នាទៅវិញទៅមក ។ បន្ទាប់ពីធ្វើស្រែវស្សាហើយ ក្រុមគ្រួសាររបស់គាត់ខ្វះខាតប្រាក់ទិញជីសម្រាប់បាចស្រូវ ក៏ចេះតែស៊ើបសួរគេឯងក្នុងភូមិបានដឹងថា មានក្រុមហ៊ុនមួយនៅស្រុកវ៉ារិន ខេត្ដសៀមរាប ត្រូវការកម្មករកាប់រានព្រៃ ដើម្បីយកដីអភិវឌ្ឍន៍ ។ កម្មករកាប់ឈើធ្វើអុសរៀបវាស់ក្នុងមួយម៉ែត្របានប្រាក់៨ម៉ឺនរៀល ។ ពេលទទួលបានដំណឹងដូច្នេះប្រពន្ធទីមួយបានសម្រេចចិត្ដឱ្យប្ដី និងគាត់ជាប្រពន្ធទី២ធ្វើដំណើរទៅ ចំណែកប្រពន្ធទីមួយនៅមើលថែកូនទាំងអស់នៅឯផ្ទះ ។
ប្រភពព័ត៌មានឱ្យដឹងទៀតថា ប្ដីនិងប្រពន្ធទី២ធ្វើដំណើរចេញពីស្រុកកំណើតនៅថ្ងៃទី២៥ សីហា ទៅកាន់ខេត្ដសៀមរាប លុះដល់ថ្ងៃទី២៦ សីហា ជាថ្ងៃទីមួយដែលត្រូវធ្វើការនៅវេលាម៉ោង៤រសៀល បុរសជាប្ដី និងគាត់ជាប្រពន្ធទី២បានកាប់ដើមឈើមួយដើមនៅក្នុងព្រៃអូប៉ារ៉ា ឬព្រៃអូរអាកុក ស្ថិតនៅឃុំស្រែណូយ ។ បុរសជាប្ដីយករណារម៉ាស៊ីនទៅអារផ្ដួលរលំដើមឈើ លុះពេលរលំស្រាប់តែទៅប៉ះជាមួយមែកសុក្រំដែលនៅជិតនោះ បណ្ដាលឱ្យបាក់មែកធ្លាក់សង្កត់មកលើក្បាលប្ដីបែកក្បាលហូរឈាមសន្លប់តែម្ដង ។ ខណៈនោះក្រុមហ៊ុនបានទូរស័ព្ទហៅរថយន្ដមន្ទីរពេទ្យខេត្ដសៀមរាបដឹកប្តីគាត់យកទៅព្យាបាល លុះបាន២យប់៣ថ្ងៃ ដោយស្ថានភាពរបួសធ្ងន់ធ្ងរពេក គ្រូពេទ្យបញ្ជូនបន្តទៅព្យាបាលនៅមន្ទីរពេទ្យព្រះកុសុមៈកាលពីព្រឹកថ្ងៃទី៣០ សីហា ។
មកដល់មន្ទីរពេទ្យព្រះកុសុមៈ ប្រពន្ធទាំងពីរនាក់បាននាំគ្នាអង្គុយយំកៀកកគ្នា ហើយសំពះអង្វរគ្រូពេទ្យឱ្យជួយព្យាបាលប្ដីរបស់ពួកគាត់ផង បើអត់ពីប្ដីទៅពួកគាត់ទាំងពីរនាក់ត្រូវមើលថែកូនដល់ទៅ៨នាក់ពិតជាលំបាកហើយ ។
លោកវេជ្ជបណ្ឌិតនៅមន្ទីរពេទ្យព្រះកុសុមៈឱ្យបុរសរងគ្រោះទៅស្គែនឃើញមានឈាមកកនៅក្នុងក្បាលត្រូវវះកាត់បន្ទាន់ ។ លោកវេជ្ជបណ្ឌិតបញ្ជាក់ថា បើវះកាត់មានសង្ឃឹមច្រើនជាងអត់វះកាត់ ។
ប្រពន្ធទាំងពីរនាក់បានត្អូញត្អែរថា ជីវភាពកំពុងតែខ្វះខាតស្រាប់ផង ឥឡូវប្ដីមានរបួសធ្ងន់ទៀត គ្មានប្រាក់សម្រាប់ព្យាបាលប្ដីទេ សូម្បីតែគោសម្រាប់ទឹមធ្វើស្រែក៏លក់អស់ដែរនៅតែមិនគ្រប់ ។ ពួកគាត់ខ្ចីគេគ្រប់ច្រកល្ហកបន្ថែមទៀត ដើម្បីយកប្រាក់មកមើលប្ដី ៕
ចែករំលែកព័តមាននេះ