ខេត្តបាត់ដំបង ៖ មន្ត្រីជំនាញមកពីគ្រប់បណ្តាស្ថាប័ននានាក្នុងខេត្ត ជាពិសេសសមត្ថកិច្ចសរុបជាង៨០នាក់ ត្រូវបានអញ្ជើញឱ្យចូលរួមកាលពីព្រឹកថ្ងៃទី៣០ សីហា នៅក្នុងកិច្ចប្រជុំមួយដែលផ្តោតសំខាន់លើការអនុវត្តច្បាប់ ស្តីពីយុត្តិធម៌អនីតិជន និងស្ត្រី។ កិច្ចប្រជុំនេះត្រូវបានរៀបចំធ្វើឡើងដោយតំណាងអយ្យការសាលា ដំបូង
ខេត្តបាត់ដំបង ៖ មន្ត្រីជំនាញមកពីគ្រប់បណ្តាស្ថាប័ននានាក្នុងខេត្ត ជាពិសេសសមត្ថកិច្ចសរុបជាង៨០នាក់ ត្រូវបានអញ្ជើញឱ្យចូលរួមកាលពីព្រឹកថ្ងៃទី៣០ សីហា នៅក្នុងកិច្ចប្រជុំមួយដែលផ្តោតសំខាន់លើការអនុវត្តច្បាប់ស្តីពីយុត្តិធម៌អនីតិជន និងស្ត្រី។ កិច្ចប្រជុំនេះត្រូវបានរៀបចំធ្វើឡើងដោយតំណាងអយ្យការសាលាដំបូងខេត្តនៅសាលប្រជុំនៃសណ្ឋាគាររស្មីបាត់ដំបង ស្ថិតក្នុងក្រុងបាត់ដំបង ក្រោមការអញ្ជើញចូលរួមពីលោកនួន សាន តំណាងអយ្យការលោករុន សារ៉ាយ នាយកប្រតិបត្តិនៃអង្គការជំនួយផ្នែកច្បាប់នៃកម្ពុជា លោកគឹម រ៉ាវី អនុប្រធានតុលាការខេត្តដែលមានការឧបត្ថម្ភពីទីភ្នាក់ងារអូស្ត្រាលី ដើម្បីអភិវឌ្ឍន៍អន្តរជាតិ, អង្គការ Save the Children និងអង្គការជំនួយផ្នែកច្បាប់នៃកម្ពុជា។
លោករុន សារ៉ាយ នាយកប្រតិបត្តិនៃអង្គការជំនួយផ្នែកច្បាប់នៃកម្ពុជាបានថ្លែងថា កិច្ចប្រជុំនេះមានសារសំខាន់បំផុតសម្រាប់អង្គភាពពាក់ព័ន្ធដែលធ្វើការងារពាក់ព័ន្ធកុមារ និងស្ត្រី ។លោកបន្តថា មន្ត្រីនានាដែលចូលរួមក្នុងកិច្ចប្រជុំនេះអាចលើកយកបញ្ហាផ្លូវច្បាប់ណាមួយដែលពាក់ព័ន្ធនឹងកុមារ ឬស្ត្រីដែលអនុវត្តកន្លងមក ដាក់ជារបៀបវារៈក្នុងអង្គប្រជុំ ដើម្បីពិភាក្សារកដំណោះស្រាយ ព្រោះយើងមានមន្ត្រីច្បាប់សំខាន់ៗ ជាពិសេសលោកព្រះរាជអាជ្ញានួន សាន ដែលចូលរួមបំភ្លឺនូវរាល់ចម្ងល់ទាំងនេះ។ លោករុន សារ៉ាយ បានបន្ថែមថា ខ្លឹមសារនៃច្បាប់មានការស្មុគស្មាញ និងពិបាកយល់ហើយក៏ពិបាកក្នុងការអនុវត្តផងដែរ។ ប៉ុន្តែលោកសង្ឃឹមថា កិច្ចប្រជុំនេះនឹងទទួលបានផ្លែផ្កាជាទីពេញចិត្តសម្រាប់មន្ត្រីជំនាញនានាយកទៅអនុវត្ត ដើម្បីបម្រើផលប្រយោជន៍ជូនសង្គមជាតិ។
ឆ្លៀតក្នុងឱកាសនោះ លោកនួន សាន ព្រះរាជអាជ្ញាអមសាលាដំបូងខេត្តបានមានប្រសាសន៍ថា គោលបំណងនៃកិច្ចប្រជុំនេះគឺយើងស្វែងរកមធ្យោបាយល្អៗ ដើម្បីដោះស្រាយនូវបញ្ហាផ្លូវច្បាប់ទាំងឡាយណា ដែលពាក់ព័ន្ធលើអនីតិជន និងស្ត្រី។ លោកព្រះរាជអាជ្ញាបានបន្តថា យើងតម្រូវឱ្យមានការចូលរួមពីសមត្ថកិច្ចនគរបាល កងរាជអាវុធហត្ថ មន្ត្រីមកពីកិច្ចការនារី មន្ត្រីមកពីសង្គមកិច្ច និងមន្ត្រីមកពីស្ថាប័នពាក់ព័ន្ធមួយចំនួនទៀតរួមជាមួយមន្ត្រីមកពីអង្គការនានាផងដែរ ដែលធ្វើការជាមួយកុមារ និងស្ត្រីដើម្បីចូលរួមផ្លាស់ប្តូរយោបល់គ្នា លើបញ្ហាទាំងឡាយដែលពួកគាត់អនុវត្តកន្លងមក។ ជាពិសេសដើម្បីមន្ត្រីទាំងនោះយល់ច្បាស់អំពីច្បាប់ស្តីពីកុមារ ហើយអ្វីដែលសំខាន់ជាងនេះ គឺយើងចង់ឱ្យមន្ត្រីអនុវត្តទាំងអស់យល់អំពីច្បាប់អនីតិជន ដែលមានអាយុក្រោម១៤ឆ្នាំ។ លោកបញ្ជាក់ថា មន្ត្រីអនុវត្តច្បាប់ដាច់ខាតមិនត្រូវចោទប្រកាន់ច្បាប់ព្រហ្មទណ្ឌលើក្មេងដែលមានអាយុក្រោម១៤ឆ្នាំឡើយ តែយើងត្រូវបញ្ជូនពួកគេទៅអង្គភាពពាក់ព័ន្ធណាមួយដើម្បីអប់រំណែនាំ ឱ្យយល់អំពីផ្លូវច្បាប់ ព្រោះពួកគេជាទំពាំងស្នងឫស្សី។
លោកនួន សាន បានបញ្ជាក់ទៀតថា នេះជាលើកទី៨ហើយដែលស្ថាប័នអយ្យការរបស់លោករៀបចំឱ្យមានកិច្ចប្រជុំពិភាក្សាស្តីពីយុត្តិធម៌អនីតិជន និងស្ត្រីក្រោមជំនួយឧបត្ថម្ភរបស់អង្គការខាងលើ ដោយលោកបានរំលឹកថា នេះជាឱកាសដ៏ល្អបំផុតសម្រាប់មន្ត្រីនានាដែលមានចម្ងល់ខាងផ្លូវច្បាប់ពាក់ព័ន្ធកុមារ ជាពិសេសមន្ត្រីនគរបាលយុត្តិធម៌ ដើម្បីចៀសវាងការអនុវត្តច្បាប់ខុសនីតិវិធីចំពោះអនីតិជន និងស្ត្រី ដូច្នេះលោកសង្ឃឹមថា មន្ត្រីទាំងអស់នឹងបានយល់ច្បាស់មួយកម្រិតទៀត ស្តីពីច្បាប់អនីតិជន៕
ចែករំលែកព័តមាននេះ