ខេត្តសៀមរាប ៖ ក្រុមមន្ត្រីអាជ្ញាធរអប្សរាបានថ្លែងឱ្យដឹងថា គេមានគម្រោងទទួលយកគ្រួសារស្ម័គ្រចិត្ដដែលរស់នៅក្នុងតំបន់១ និងតំបន់២ ជាតំបន់ហាមឃាត់នៃឧទ្យានអង្គរចំនួន១០០គ្រួសារបន្ថែមទៀត ឱ្យទៅតាំងទីលំនៅថ្មីនៅក្នុងភូមិធម្មជាតិរុនតាឯក ដែលជាភូមិអភិវឌ្ឈន៍គំរូលើកដំបូងសម្រាប់ប្រទេសកម្ពុជា ស្ថិតក្នុងស្រុកបន្ទាយស្រី
ខេត្តសៀមរាប ៖ ក្រុមមន្ត្រីអាជ្ញាធរអប្សរាបានថ្លែងឱ្យដឹងថា គេមានគម្រោងទទួលយកគ្រួសារស្ម័គ្រចិត្ដដែលរស់នៅក្នុងតំបន់១ និងតំបន់២ ជាតំបន់ហាមឃាត់នៃឧទ្យានអង្គរចំនួន១០០គ្រួសារបន្ថែមទៀត ឱ្យទៅតាំងទីលំនៅថ្មីនៅក្នុងភូមិធម្មជាតិរុនតាឯក ដែលជាភូមិអភិវឌ្ឈន៍គំរូលើកដំបូងសម្រាប់ប្រទេសកម្ពុជា ស្ថិតក្នុងស្រុកបន្ទាយស្រី ចម្ងាយប្រមាណ៣០គីឡូម៉ែត្រខាងជើងក្រុងសៀមរាប។
អគ្គនាយកអាជ្ញាធរអប្សរា លោក ប៊ុន ណារិទ្ធ បានមានប្រសាសន៍ថា យើងកំពុងប្រឹងប្រែងរៀបចំដីលំនៅឋាន និងដីកសិកម្មចំនួនមួយរយប្លង់បន្ថែមទៀតនៅក្នុងភូមិធម្មជាតិរុនតាឯកសម្រាប់ធ្វើការបែងចែកទៅឱ្យប្រជាពលរដ្ឋស្ម័គ្រចិត្ដដែលរស់នៅក្នុងតំបន់១ និងតំបន់២ជាតំបន់ការពារយ៉ាងតឹងរ៉ឹងនៃរមណីយដ្ឋានវប្ប
ធម៌ប្រវត្ដិសាស្ដ្រអង្គរ បេតិកភណ្ឌពិភពលោកដ៏ល្បីល្បាញរបស់យើង ។ លោកបានបញ្ជាក់ថា គម្រោងការផ្ដល់ដីសម្បទានសង្គមកិច្ចទៅឱ្យប្រជាពលរដ្ឋស្ម័គ្រចិត្ដនាពេលខាងមុខនេះ ជាដំណាក់កាលទី២ហើយសម្រាប់កិច្ចប្រឹងប្រែងកាត់បន្ថយបាននូវចំនួនខ្នងផ្ទះថ្មីៗកើនឡើងពីមួយឆ្នាំទៅមួយឆ្នាំក្នុងតំបន់ហាមឃាត់របស់
រមណីយដ្ឋានប្រវត្ដិសាស្ដ្រអង្គរដែលមានផ្ទៃក្រឡា៤០១គីឡូម៉ែត្រការ៉េ គ្របដណ្ដប់ទៅលើផ្នែកមួយចំនួននៃស្រុក-ក្រុងចំនួនប្រាំ និងឃុំចំនួន២១ ភូមិចំនួន១១២ របស់ខេត្ដសៀមរាប។
គួរបញ្ជាក់ថា ភូមិធម្មជាតិ«រុនតាឯក» ត្រូវបានបង្កើតឡើងដោយអនុក្រឹត្យលេខ៦៩អនក្រ បក ចុះថ្ងៃទី១៩ ខែតុលា ឆ្នាំ២០០៤ ដែលមានទំហំ១.០០០ហិកតា ស្ថិតក្នុងភូមិតានី ឃុំរុនតាឯក ស្រុកបន្ទាយស្រី និងភូមិស្នាសង្គ្រាម ឃុំបល្ល័ង្ក ស្រុកប្រាសាទបាគង ខេត្ដសៀមរាប អាចទទួលប្រជាពលរដ្ឋចំនួន៨៥០គ្រួសារ ឬចំនួនមនុស្ស៥.០០០នាក់ឱ្យទៅរស់នៅទីនោះ។ ភូមិធម្មជាតិនឹងត្រូវរៀបចំជាលក្ខណៈភូមិខ្មែរតាមលំនាំប្រពៃណី ដែលផ្តោតទៅលើមូលដ្ធានសំខាន់ៗដូចជាកសិកម្មធម្មជាតិ សិប្បកម្ម និងទេសចរណ៍ធម្មជាតិ ។
អាជ្ញាធរអប្សរា បានចាប់ផ្ដើមទទួលយកគ្រួសារស្ម័គ្រចិត្ដដែលរស់នៅក្នុងតំបន់១ និងតំបន់២នៃឧទ្យានអង្គរចំនួន១០០គ្រួសារឱ្យទៅតាំងទីលំនៅថ្មីនៅភូមិធម្មជាតិរុនតាឯកជាផ្លូវការលើកដំបូងកាលពីព្រឹកថ្ងៃទី១២ ខែកក្កដា ឆ្នាំ២០១០កន្លងទៅ តាមរយៈការចាប់ឆ្នោតជ្រើសរើសដីឡូត៍។ គ្រួសារនីមួយៗ អាចទទួលបានដីសម្រាប់សាងសង់លំនៅឋានមួយកន្លែងនិងដីកសិកម្មទំហំសរុបមួយហិកតា បន្ថែមពីលើនោះនឹងទទួលបាននូវឈើសាងសង់ចំនួនជិត១០ម៉ែត្រគូប រួមទាំងដែកគោល សង្ក័សី បង្គន់អនាម័យផងដែរ។
ចំណែកអភិបាលខេត្ដសៀមរាប លោក ស៊ូ ភិរិន្ទ និងជាអនុប្រធានក្រុមប្រឹក្សាភិបាលនៃអាជា្ញធរអប្សរាធ្លាប់បានមានប្រសាសន៍ថា ការកំណត់ឱ្យប្រជាពលរដ្ឋមករស់នៅក្នុងភូមិធម្មជាតិរុនតាឯកនេះគឺពុំបានគិតពីនិន្នាការគណបក្សនយោបាយអ្វីឡើយ ដោយមួយគ្រួសារៗទទួលបានផ្ទះទំហំ៥ម៉ែត្រគុណ៧,៥០ម៉ែត្រស្មើៗគ្នា ក៏ប៉ុន្ដែសម្រាប់តែប្រជាពលរដ្ឋរស់នៅតំបន់១ និងតំបន់២ និងតាមមាត់ស្ទឹងសៀមរាបតែប៉ុណ្ណោះ។
អគ្គនាយករងអាជ្ញាធរអប្សរាលោក សុខ ល័ក្ខណា ដែលគ្រប់គ្រងគម្រោងភូមិធម្មជាតិ«រុនតាឯក» បានថ្លែងថា រហូតមកទល់ពេលនេះមានប្រជាពលរដ្ឋចំនួនជាង៩០គ្រួសារហើយបានទៅតាំងទីលំនៅជាអចិន្ដ្រៃយ៍នៅក្នុងភូមិធម្មជាតិរុនតាឯក ហើយពេលនេះពួកអ្នកទាំងនោះកំពុងតែត្រូវបានយកចិត្ដទុកដាក់ខ្ពស់ពីសំណាក់ថ្នាក់ដឹកនាំអាជ្ញាធរ ដើម្បីធ្វើយ៉ាងណាឱ្យមានជីវភាពសមរម្យ។ លោកបានបញ្ចាក់ទៀតថា ភូមិធម្មជាតិរុនតាឯក ក្រោមការផ្ដួចផ្ដើមបង្កើតឡើងដោយលោកឧបនាយករដ្ឋមន្ដ្រី សុខ អាន រដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រី ដែលជាប្រធានអាជ្ញាធរអប្សរា នឹងក្លាយទៅជាភូមិអភិវឌ្ឍន៍គំរូមួយនៅទូទាំងប្រទេសកម្ពុជា ។ ពេលនេះហេដ្ឋារចនាសម្ព័ន្ធសង្គមជាច្រើនដូចជាផ្លូវលំ មណ្ឌលសុខភាព សាលារៀនរួមទាំងសាលាបណ្ដុះបណ្ដាលវិជ្ជាជីវៈផងដែរត្រូវបានកសាងឡើងរួចជាស្រេចដើម្បីប្រែក្លាយតំបន់ដែលធ្លាប់តែមានសភាពស្ងាត់ជ្រងំទៅជាកន្លែងដ៏ទាក់ទាញមួយសម្រាប់ភ្ញៀវទេសចរ។
ក្រុមសង្គមស៊ីវិល បានសម្ដែងនូវការស្វាគមន៍ចំពោះអាជ្ញាធរអប្សរាដែលបានបង្កើតឡើងនូវភូមិធម្មជាតិរុនតាឯក ជាផ្នែកមួយក្នុងកិច្ចប្រឹងប្រែងអភិរក្ស និងអភិវឌ្ឍន៍ប្រកបដោយចីរភាពនូវរមណីយដ្ឋានវប្បធម៌ប្រវត្ដិសាស្ដ្រអង្គរជាបេតិកភណ្ឌពិភពលោកដ៏ល្បាញល្បីរបស់ព្រះរាជាណាចក្រកម្ពុជា។
មន្ដ្រីស៊ើបអង្កេតសមាគមការពារសិទ្ធិមនុស្សអាដហុកប្រចាំខេត្ដសៀមរាប លោកសួស ណារិន បានថ្លែងកាលពីរសៀលថ្ងៃទី២៩ សីហា ថា យើងសូមស្វាគមន៍ចំពោះផែនការទទួលយកប្រជាពលរដ្ឋទៅរស់នៅក្នុងភូមិធម្មជាតិរុនតាឯកជាបន្ដបន្ទាប់របស់អាជ្ញាធរអប្សរា ដែលនេះស្ដែងឱ្យឃើញនូវការរួមចំណែកកាត់បន្ថយភាពក្រីក្រនិងគោរពសិទ្ធិមនុស្ស ។ ម្យ៉ាងទៀតនេះក៏ជាសញ្ញាថ្មីមួយទៀតអាចឈានទៅដល់ការបព្ចាប់នូវភាពចម្រូងចម្រាសដែលធ្លាប់កើតមានជាហូរហែមកហើយរវាងប្រជាពលរដ្ឋរស់នៅក្នុងតំបន់១ និងតំបន់២របស់ឧទ្យានអង្គរជាមួយអាជ្ញាធរអប្សរា ជុំវិញរឿងសាងសង់លំនៅឋាន ៕
ចែករំលែកព័តមាននេះ