រាជធានីភ្នំពេញ ៖ ប្រធានរដ្ឋសភាឡាវ លោកស្រីប៉ានី យ៉ាថុទូ នឹងអញ្ជើញមកបំពេញទស្សនកិច្ចផ្លូវការ រឹតចំណងមិត្តភាពនៅកម្ពុជា រយៈពេល៤ថ្ងៃ ចាប់ពីថ្ងៃទី១ ដល់ថ្ងៃទី៤ កញ្ញា ២០១១ ខាងមុខនេះ ។ យោងតាមសេចក្តីប្រកាសព័ត៌មានរបស់អគ្គលេខាធិការដ្ឋាន រដ្ឋសភាចុះថ្ងៃទី២៩ សីហា ២០១១ ដែលកោះសន្តិភាពទើប
រាជធានីភ្នំពេញ ៖ ប្រធានរដ្ឋសភាឡាវ លោកស្រីប៉ានី យ៉ាថុទូ នឹងអញ្ជើញមកបំពេញទស្សនកិច្ចផ្លូវការ រឹតចំណងមិត្តភាពនៅកម្ពុជា រយៈពេល៤ថ្ងៃ ចាប់ពីថ្ងៃទី១ ដល់ថ្ងៃទី៤ កញ្ញា ២០១១ ខាងមុខនេះ ។ យោងតាមសេចក្តីប្រកាសព័ត៌មានរបស់អគ្គលេខាធិការដ្ឋាន រដ្ឋសភាចុះថ្ងៃទី២៩ សីហា ២០១១ ដែលកោះសន្តិភាពទើបទទួលបាននៅថ្ងៃអង្គារនេះ បានបញ្ជាក់ឱ្យដឹងថា ក្នុងអំឡុងពេលទស្សនកិច្ចនៅកម្ពុជា គណៈប្រតិភូសភានៃសាធារណរដ្ឋប្រជាធិបតេយ្យប្រជាមានិតឡាវ នឹងត្រូវបានព្រះរាជានុញ្ញាត ចូលក្រាបបង្គំគាល់ព្រះមហាក្សត្រកម្ពុជា ព្រះបរមនាថ នរោត្តម សីហមុនី និងជួបសវនាការ សម្តែងការគួរសម ជាមួយថ្នាក់ដឹកនាំ
សំខាន់ៗរបស់កម្ពុជា រួមមានសម្តេចប្រធានព្រឹទ្ធសភា ជា ស៊ីម សម្តេចប្រធានរដ្ឋសភា ហេង សំរិន និងសម្តេចតេជោនាយករដ្ឋមន្ត្រីហ៊ុន សែន ។
សេចក្តីប្រកាសព័ត៌មានដដែលបានបញ្ជាក់ទៀតថា ក្រៅពីនោះ គណៈប្រតិភូរដ្ឋសភាឡាវ ដឹកនាំ ដោយលោកស្រីប៉ានី យ៉ាថុទូ ក៏នឹងទៅទស្សនកិច្ចនៅខេត្តព្រះសីហនុផងដែរ ។
ជាបន្តបន្ទាប់គ្នានេះទៀត ប្រធានរដ្ឋសភាដែលទើបជ្រើសតាំងថ្មី នៃសាធារណរដ្ឋសង្គមនិយមវៀតណាម ក៏នឹងត្រូវអញ្ជើញមកបំពេញទស្សនកិច្ចផ្លូវការនៅកម្ពុជាផងដែរ ដើម្បីពិភាក្សាផ្លាស់ប្តូរបទពិសោធន៍លើកិច្ចការនីតិប្បញត្តិមួយចំនួនដែលប្រទេសទាំង២ ធ្លាប់បានសហការគ្នាកន្លងមក ។ តាមការឱ្យដឹងពីអគ្គលេខាធិការដ្ឋានរដ្ឋសភា បានបញ្ជាក់ថា តាមគម្រោង លោកង្វៀន ស៊ីងហ៊ុង ប្រធានរដ្ឋសភាវៀតណាមថ្មី នឹងមកបំពេញទស្សនកិច្ចផ្លូវការក្នុងប្រទេសកម្ពុជា នៅថ្ងៃទី១៦ កញ្ញា ២០១១ រហូតដល់ពេលបញ្ចប់មហាសន្និបាតអន្តរសភា (អាយប៉ា) លើកទី៣២ ទើបអញ្ជើញនិវត្តន៍ទៅវិញ ៕
ចែករំលែកព័តមាននេះ