ខេត្តពោធិ៍សាត់ ៖ កាលពីថ្ងៃទី២៩ សីហា លោកលី ជបៀង នាយខណ្ឌរដ្ឋបាលព្រៃឈើពោធិ៍សាត់បានប្រគេន និងចែកជូនកូនឈើដល់ព្រះសង្ឃ យោធា និងប្រជាពលរដ្ឋដាំនៅតាមវត្តអារាម បន្ទាយទាហាន និងសហគមន៍។ ពិធីនេះប្រារព្ធធ្វើនៅអធិការដ្ឋានរដ្ឋបាលព្រៃឈើខាងត្បូង បឹងទន្លេសាប ដោយមានការនិមន្តចូលរួមពី
ខេត្តពោធិ៍សាត់ ៖ កាលពីថ្ងៃទី២៩ សីហា លោកលី ជបៀង នាយខណ្ឌរដ្ឋបាលព្រៃឈើពោធិ៍សាត់បានប្រគេន និងចែកជូនកូនឈើដល់ព្រះសង្ឃ យោធា និងប្រជាពលរដ្ឋដាំនៅតាមវត្តអារាម បន្ទាយទាហាន និងសហគមន៍។ ពិធីនេះប្រារព្ធធ្វើនៅអធិការដ្ឋានរដ្ឋបាលព្រៃឈើខាងត្បូងបឹងទន្លេសាប ដោយមានការនិមន្តចូលរួមពីព្រះសង្ឃ អភិបាលរងក្រុង មេបញ្ជាការរងយោធាខេត្ត និងប្រជាពលរដ្ឋនៅតាមសហគមន៍។
លោកជា ប៊ុនលី នាយសង្កាត់រដ្ឋបាលព្រៃឈើសំពៅមាសឱ្យដឹងថា ឆ្នាំ២០១១នេះបណ្តុះកូនឈើប្រភេទអាកាស្យាចំនួន១១.០០០ដើម ឈើទាល៨.០០០ដើម ផ្តៀក១២.០០០ដើម ពពេល១.២០០ដើម និងត្បែង៤៥០ដើម សម្រាប់ចែកចាយនៅឆ្នាំ២០១២។ ដោយឡែកកូនឈើដែលធ្វើពិធីប្រគេន និងចែកជូននេះបណ្តុះនៅឆ្នាំ២០១០ បែងចែកដល់វត្តចំនួន២០ នៅក្រុងពោធិ៍សាត់ ១វត្តនៅស្រុកក្រគរ សហគមន៍ព្រៃឈើអូរបាក់ត្រា និងតំបន់ប្រតិបត្តិការសឹករងពោធិ៍សាត់ សរុបកូនឈើ៥.០៦០ដើម ក្នុងនោះមានបេង៨០០ដើម គគីរ៣.៨០០ដើម និងខ្នុរ៤៦០ដើម។
លោកស្រែម៉ែន ផល្លី អភិបាលរងក្រុងពោធិ៍សាត់មានប្រសាសន៍ថា ការដាំកូនឈើបម្រើឱ្យផលប្រយោជន៍រួម និងយូរអង្វែងដល់កូនចៅជំនាន់ក្រោយសម្រាប់ការប្រើប្រាស់ ជាម្លប់ជ្រកកោនសម្រាប់អ្នកធ្វើសំណើរ សោភ័ណភាព ការពារបរិស្ថាន ការពារបម្រែបម្រួលធាតុអាកាស និងចូលរួមអភិរក្សធនធានធម្មជាតិ។ លោកស្រីអំពាវនាវប្រជាពលរដ្ឋគ្រប់មជ្ឈដ្ឋានភ្ញាក់រលឹកនាំគ្នាដាំដើមឈើឡើងវិញនៅតាមកន្លែងកម្សាន្ត សហគមន៍ ដងផ្លូវ និងទីសាធារណៈនានា។
លោកលី ជូបៀង នាយខណ្ឌរដ្ឋបាលព្រៃឈើពោធិ៍សាត់មានប្រសាសន៍ថា រដ្ឋបាលព្រៃឈើជាអ្នកបណ្តុះទាំងកូនឈើរយៈពេលវែង កូនឈើរយៈពេលខ្លី និងឈើហូបផ្លែ តែការដាំដុះមានលក្ខណៈទូលំទូលាយ។ ការចែកកូនឈើដាំតាមវត្តអារាមជាការណែនាំរបស់លោកបណ្ឌិតច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ព្រោះវត្តធានាសុវត្ថិភាព និងគង់វង្សជាងទីសាធារណៈនានាសម្រាប់ឈើដែលមានតម្លៃរយៈពេលវែងដូចជា គគីរ ឈើទាល នាងនួន និងគ្រញូងជាដើម។
លោកបន្តទៀតថា ដោយសារខេត្តពោធិ៍សាត់សម្បូរព្រៃឈើ ទើបការដាំដើមឈើឡើងវិញយឺតយ៉ាវមិនសូវមាការភ្ញាក់រលឹក និងចាប់អារម្មណ៍ដូចខេត្តព្រៃវែង ស្វាយរៀង កំពង់ឆ្នាំងនិងកំពង់ស្ពឺទេ។ កូនឈើទាំងនេះបណ្តុះមួយឆ្នាំកន្លះទៅពីរឆ្នាំទើបអាចយកទៅដាំបាន ដូច្នេះពេលយកទៅដាំត្រូវយកចិត្តទុកដាក់តាមការណែនាំរបស់អ្នកបច្ចេកទេស ថែរក្សាឱ្យបានលូតលាស់ល្អ និងគង់វង្ស ចៀសវាងកូនឈើងាប់ ឬបង់បាត់ទៅវិញដោយប្រការណាមួយដោយសារគ្មានឆន្ទៈ៕
ចែករំលែកព័តមាននេះ