ខេត្តក្រចេះ ៖ រថយន្តកាមរីបាឡែន មួយគ្រឿងដោយសារតែបោះពួយលឿនហួសហេតុពេក ដល់ផ្លូវកោង បត់មិនទាន់ ក៏បណ្តាលឱ្យក្រឡាប់ធ្លាក់ចូលជ្រោះ ធ្វើឱ្យអ្នកជិះក្នុងរថយន្តមួយគ្រួសារដែលមានគ្នាចំនួន ៣នាក់រងរបួសស្រាល។
ខេត្តក្រចេះ ៖ រថយន្តកាមរីបាឡែន មួយគ្រឿងដោយសារតែបោះពួយលឿនហួសហេតុពេក ដល់ផ្លូវកោង បត់មិនទាន់ ក៏បណ្តាលឱ្យក្រឡាប់ធ្លាក់ចូលជ្រោះ ធ្វើឱ្យអ្នកជិះក្នុងរថយន្តមួយគ្រួសារដែលមានគ្នាចំនួន៣នាក់រងរបួសស្រាល។
សាក្សីឃើញហេតុការណ៍បាននិយាយថា កាលពីវេលាម៉ោងប្រហែល១១និង៣០នាទីថ្ងៃត្រង់ ទី២៩ សីហា ២០១១ នៅលើកំណាត់ផ្លូវជាតិលេខ៧៣ ត្រង់ចំណុចព្រៃច្រោក ភូមិព្រែកតាអាំ ឃុំបុសលាវ ស្រុកចិត្របុរី មានរថយន្តកាមរីស៊េរីទំនើប ធ្វើដំណើរពីជើងទៅត្បូង ក្នុងល្បឿនយ៉ាងលឿន លុះមកដល់ចំណុចកើតហេតុ ជាផ្លូវកោងបត់ស្តាំកាច់ចង្កូតបត់មិនទាន់ ក៏បណ្តាលឱ្យក្រឡាប់ជាច្រើនត្រឡប់ ធ្លាក់ចូលជ្រោះស្នាមភ្លោះ ដែលមានជម្រៅជ្រៅ បណ្តាលឱ្យអ្នកជិះក្នុងរថយន្តព្រលឹងចុងសក់ វារចេញមកទាំងភ័យស្លន់ស្លោ។
រថយន្តដែលជួបឧប្បត្តិហេតុនេះ ម៉ាកកាមរី បាឡែន ពណ៌ទឹកប្រាក់ ពាក់ស្លាកលេខ ភ្នំពេញ 2D-5044 មានអ្នកជិះចំនួន៣នាក់ ប្រុស២នាក់ ស្រីម្នាក់ រងរបួសស្រាល រីឯរថយន្តបានដេកផ្អៀងខ្លួនក្នុងបាតបឹង។
ទោះបីយ៉ាងណា ក៏ជនរងគ្រោះ ជាម្ចាស់រថយន្តមិនបានប្រាប់អត្តសញ្ញាណដល់សមត្ថកិច្ចនោះទេ តែគេដឹងថា រថយន្តមួយគ្រឿងនេះ បានធ្វើដំណើរចេញពីខេត្តរតនគិរី ក្នុងគោលដៅឆ្ពោះទៅក្រុងភ្នំពេញ ហើយគេសង្ស័យថា អ្នកបើកបររថយន្តនេះ មិនស្គាល់ភូមិសាស្ត្រផ្លូវច្បាស់ ទើបបណ្តាលឱ្យជួបគ្រោះថ្នាក់បែបនេះ ៕
ចែករំលែកព័តមាននេះ