តាមទីភ្នាក់ងារព័ត៌មាន AFP ផ្សាយថា កសិដ្ឋានចិញ្ចឹមក្រពើមួយកន្លែងនៅប្រទេសអ៊ីស្រាអែល កំពុងមានក្តីបារម្ភលើការដាក់ឈ្មោះថ្មីឱ្យក្រពើមួយក្បាលដែលកន្លងមកមានឈ្មោះថា «មូអាម៉ា កាដាហ្វី» ព្រោះមានជំនឿថា ក្រពើមួយក្បាលនេះអាចបាត់ឈ្មោះប្រសិនបើមេដឹកនាំលីប៊ីមិនឆ្លងផុតពីកណ្តាប់ដៃរបស់ក្រុមឧទ្ទាមដែលចូលកាន់កាប់ក្រុងទ្រីប៉ូលី ។
ស្ថានការណ៍ក្នុងប្រទេសលីប៊ី បង្កើតនូវក្តី កង្វល់ដល់មន្ត្រីក្នុងកសិដ្ឋាន «ហាម៉ាត់ ហ្គាឌ័រ» ដែលជាកសិដ្ឋានចិញ្ចឹមក្រពើស្ថិតនៅតំបន់ខ្ពង់រាបហ្គោឡាន ប្រទេសអ៊ីស្រាអែល ។ ក្រុមអ្នកថែទាំកសិដ្ឋានមានក្តីបារម្ភថា ការស្លាប់របស់លោកមូអាម៉ា កាដាហ្វី គឺជាប្រផ្នូលដ៏អាក្រក់ដល់ជីវិតរបស់ «ក្រពើ កាដាហ្វី» ។
កាលពីឆ្នាំ២០០៤ កសិដ្ឋាននេះមានក្រពើមួយក្បាលឈ្មោះថា «យ៉ាស្ស៊ែរ អារ៉ាហ្វាត» បានងាប់ដោយគ្មានអ្នកណាម្នាក់ដឹងពីមូលហេតុ ក្នុងរយៈពេលប៉ុន្មានសប្តាហ៍ក្រោយពីលោកយ៉ាស្ស៊ែរ អារ៉ាហ្វាត អតីតមេដឹកនាំរំដោះប៉ាឡេស្ទីន ស្លាប់នៅឯមន្ទីរពេទ្យក្នុងប្រទេសបារាំងកាលពីថ្ងៃទី១១ វិច្ឆិកា ឆ្នាំ២០០៤ ។ បច្ចុប្បន្ន មន្ត្រីនៅក្នុងកសិដ្ឋានចិញ្ចឹមក្រពើមួយនេះកំពុងស្វែងរកឈ្មោះថ្មីដាក់ឱ្យក្រពើកាដាហ្វី ដែលមានប្រវែងជាង៣ម៉ែត្រ ទម្ងន់ជាង២៣០គីឡូក្រាម ដោយសង្ឃឹមថា ប្រសិនបើលោកមូអាម៉ា កាដាហ្វី ស្លាប់ ក្រពើកាដាហ្វី នឹងមិនប្រឈមមុខដូចក្រពើអារ៉ាហ្វាតឡើយ ៕
ចែករំលែកព័តមាននេះ