តាមការសិក្សាថ្មីមួយបានបង្ហាញថា ស្ត្រីទទួលទានជាប្រចាំប្រភេទអាហារសម្រន់មានដូចជានំប៊ីស្គីត នំឃេក ឬនំប៉័ងផ្អែមអាចបង្កើនឱកាសកើតជំងឺមហារីកស្បូនដល់ទៅ៣៣ភាគរយ។ អត្រានៃការកើតជំងឺនោះអាចឡើងដល់៤២ភាគរយប្រសិនជាគេទទួលទានប្រភេទអាហារទាំងអស់នេះច្រើនជាង៣ដងក្នុងមួយសប្តាហ៍។ ទោះជាយ៉ាងណាក៏ដោយ ក្រុមអ្នកស្រាវជ្រាវបានពិពណ៌នាទំហំនៃការប៉ះពាល់នេះថាមិនជាខ្លាំងប៉ុន្មានទេ។ ផលប៉ះពាល់នេះទាមទារការស្រាវជ្រាវបន្ថែមទៀត។
ចំណែកបណ្តាក្រុមអ្នកជំនាញខាងជំងឺមហារីករបស់អង់គ្លេសបានសង្កត់ធ្ងន់ថា វាដូចជាឆាប់រហ័សពេកដែលទាញការសន្និដ្ឋានពីផលប៉ះពាល់ដ៏មុតមាំនោះ។
លទ្ធផលនៃការសិក្សានោះធ្វើឡើងដោយក្រុមអ្នកវិទ្យាសាស្ត្រប្រទេសស៊ុយអែតដែលបានចំណាយពេលអស់ជាច្រើនឆ្នាំ។ ពួកគេសិក្សាលើទិន្នន័យព័ត៌មានរបស់បណ្តាស្ត្រីរាប់ម៉ឺននាក់ចន្លោះពីឆ្នាំ១៩៨៧ដល់ឆ្នាំ១៩៩០។
ក្រុមអ្នកវិទ្យាសាស្ត្រវិទ្យាស្ថាន Karolinska របស់ទីក្រុងស្តុកខូមតាមរយៈនៃការចុះផ្សាយលទ្ធផលស្រាវជ្រាវរបស់ខ្លួនក្នុងព្រឹត្តិប័ត្រ Cancer Epidemiology,Biomarkers and Preventionបាននិយាយថា នៅមានផលប៉ះពាល់ជាច្រើនយ៉ាងទៀតដែលប្រភេទអាហារសម្រន់មានរសជាតិផ្អែមមានចំពោះរាងកាយមនុស្ស។ ទី១គឺជាតិស្ករច្រើនលើសលប់នឹងធ្វើឲ្យរាងកាយបញ្ចេញអាំងស៊ុយលីនកាន់តែច្រើនហើយអាចធ្វើឲ្យកកើតកោសិកាច្រើនលើសលប់នៅក្នុងendometriumដែលជាភ្នាសខាងក្នុងរបស់ស្បូនមនុស្សស្រី។ ចំណែកបញ្ហាទី២គឺវានឹងជួយជម្រុញកម្រិតអ័រម៉ូន oestrogenដែលត្រូវបានបង្ហាញថាជាគន្លឹះនៃការលូតលាស់មិនអាចគ្រប់គ្រងបាននៃកោសិកាទាំងឡាយ។
លោកស្រីយីនកា អេបូនាយកព័ត៌មានសុខភាពរបស់មូលនិធិស្រាវជ្រាវជំងឺមហារីកចក្រភពអង់គ្លេសបាននិយាយថា រក្សាទម្ងន់ខ្លួនឲ្យនៅថេរព្រមទាំងហាត់ប្រាណជាប្រចាំគឺជាមធ្យោបាយដ៏ល្អបំផុតក្នុងការកាត់បន្ថយឱកាសកើតមានជំងឺមហារីកស្បូន ៕
ចែករំលែកព័តមាននេះ