ខេត្តបន្ទាយមានជ័យ៖ បុរសចំណាស់ម្នាក់ស្លា.ប់នៅនឹងកន្លែងកើតហេតុ និងបុរសម្នាក់ទៀតជាកូនរងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍នៅ លើផ្លូវជាតិលេខ៥ ត្រង់មុខសាកលវិទ្យាល័យមានជ័យ កាលពីវេលាម៉ោង២និង៣០នាទីរសៀល ថ្ងៃទី២០ សីហា ឆ្នាំ២០១១ ស្ថិតក្នុងភូមិបាណយ សង្កាត់ទឹកថ្លា
ខេត្តបន្ទាយមានជ័យ៖ បុរសចំណាស់ម្នាក់ស្លាប់នៅនឹងកន្លែងកើតហេតុ និងបុរសម្នាក់ទៀតជាកូនរងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍នៅលើផ្លូវជាតិលេខ៥ ត្រង់មុខសាកលវិទ្យាល័យមានជ័យ កាលពីវេលាម៉ោង២និង៣០នាទីរសៀល ថ្ងៃទី២០ សីហា ឆ្នាំ២០១១ ស្ថិតក្នុងភូមិបាណយ សង្កាត់ទឹកថ្លា ក្រុងសិរីសោភ័ណ។
នគរបាលចរាចរជើងគោកខេត្តប្រាប់ឱ្យដឹងថា បុរសចំណាស់រងគ្រោះជាអ្នកបើកគោយន្តកន្ត្រៃឈ្មោះអែម រុន អាយុ៥១ ឆ្នាំនៅ ភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ និងជាគណៈកម្មការអាចារ្យវត្តទឹកថ្លា ចំណែកឯកូនប្រុសជិះជាមួយរងរបួស។ ចំពោះអ្នកបើកបររថយន្តដឹកដីពណ៌ស ម៉ាកអ៊ីស៊ុយហ្ស៊ុយកង់១០ពាក់ស្លាក លេខបន្ទាយមានជ័យ ៣A-០១៥៥ ឈ្មោះម៉ៅ ភេទប្រុស រស់នៅភូមិភ្នំប្រាសាទ ឃុំប្រាសាទ ស្រុកមង្គលបុរី ខេត្តបន្ទាយមានជ័យ ក្រោយពីបង្កហេតុបានរត់គេចខ្លួនបាត់។
តាមសាក្សីប្រាប់សមត្ថកិច្ចថា នៅពេលកើតហេតុមានភ្លៀងរលឹម។ គោយន្តនោះបើកពីទិសខាងលិចទៅកើត ចំណែករថយន្តបើកមកពីក្រោយក្នុងល្បឿនលឿន លុះដល់ចំណុចកើតហេតុជា ផ្លូវកោងជាន់ហ្រ្វាំងមិនទាន់ក៏ជ្រុលទៅបុកគោយន្តបណ្តាលឱ្យអ្នកបើកបរផ្លោងធ្លាក់លើថ្នល់ហើយត្រូវរថយន្តជាន់ថែម បណ្តាលឱ្យស្លាប់។រថយន្តនិងគោយន្តធ្លាក់ពីលើថ្នល់ដូចគ្នា។ ភ្លាមនោះអ្នកបើករថយន្តបានបើក ទ្វាររត់គេចខ្លួនបាត់ ។
មន្រ្តីនគរបាលឱ្យដឹងថា គ្រោះថ្នាក់នេះ គឺមកពីអ្នកបើកបររថយន្តខ្វះការប្រុងប្រយ័ត្ន ម្យ៉ាងទៀតមេឃភ្លៀង និងដល់ផ្លូវកោងមិនបន្ថយល្បឿន។
វត្ថុតាងរថយន្ត និងគោយន្តសមត្ថកិច្ចយកទៅរក្សាទុកនៅស្នងការដ្ឋាននគរបាលខេត្តរង់ចាំដោះស្រាយតាមច្បាប់៕
ចែករំលែកព័តមាននេះ