រាជធានីភ្នំពេញ ៖ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាក្នុងពិធីបិទសន្និបាតបូកសរុបសមិទ្ធផលការងារក្រុមប្រឹក្សាឃុំ-សង្កាត់ អាណត្តិទី២នៅទីស្តីការក្រសួងមហាផ្ទៃកាលពីថ្ងៃទី១៨ ខែសីហា ឆ្នាំ២០១១ បានអំពាវចំពោះបក្សនយោបាយនានាបើសិនជាចង់លើកស្ទួយសមធម៌យេនឌ័រ សូមមេត្តាដាក់បេក្ខភាពជាស្ត្រីឱ្យបានច្រើនសម្រាប់ការជាប់ឆ្នោតជាសមាជិកក្រុមប្រឹក្សាឃុំ-សង្កាត់ ។
សម្តេចតេជោនាយករដ្ឋមន្ត្រីមានប្រសាសន៍បន្តថា បើប្រៀបធៀបទៅនឹងអាណត្តិទី១ នៃក្រុមប្រឹក្សាឃុំ-សង្លាត់មានស្ត្រីប្រមាណជាង៨%ប៉ុណ្ណោះជាសមាជិកក្រុមប្រឹក្សាឃុំ-សង្កាត់ ប៉ុន្តែក្នុងអាណត្តិទី២ សមាជិកក្រុមប្រឹក្សាឃុំ-សង្កាត់ជាស្ត្រីមានចំនួនដល់១៦% ហើយសង្ឃឹមថាចំនួននេះនឹងកើនឡើងនៅក្នុងអាណត្តិទី៣ឆ្នាំ២០១២ គឺសមាជិកក្រុមប្រឹក្សាឃុំ-សង្កាត់ជាស្ត្រីកើនលើសពី២០%។ បើបានយ៉ាងដូច្នេះ គឺជាការល្អ ។ កុំឱ្យគ្នាឈរនៅកន្លែងដែលមិនជាប់ គួរតែដាក់ឱ្យគ្នាឈរគឺឈរឱ្យកន្លែងជាប់។
លើសពីនេះទៅទៀត នៅតាមភូមិនីមួយៗ មានសហការជាមេភូមិឬជាអនុប្រធានភូមិឬជាសមាជិកភូមិនិងក៏មានស្ត្រីយ៉ាងតិចមួយរូបជាអភិបាល ឬជាអភិបាលរងនៃគណៈអភិបាលរាជធានី-ខេត្ត-ក្រុង-ស្រុក-ខណ្ឌផងដែរ។
សំខាន់ជាងនេះទៅទៀត សម្តេចតេជោនាយករដ្ឋមន្ត្រីបញ្ជាក់ថា គណៈកម្មាធិការពិគ្រោះយោបល់កិច្ចការស្ត្រី និងកុមារត្រូវបានបង្កើតឡើងនៅក្រោមក្រុមប្រឹក្សានៃរដ្ឋបាលថ្នាក់ក្រោមជាតិនីមួយៗ ដើម្បីជួយក្រុមប្រឹក្សាឱ្យយកចិត្តទុកដាក់កាន់តែខ្លាំងថែមទៀតទៅលើបញ្ហាយេនឌ័រ និងការឆ្លើយតបទៅនឹងតម្រូវការរបស់ស្ត្រីនិងកុមារ ។
ការបង្កើតសម្ព័ន្ធភាពជាតិក្រុមប្រឹក្សាឃុំ-សង្កាត់គឺជាមធ្យោបាយដ៏សំខាន់មួយសម្រាប់ក្រុមប្រឹក្សារដ្ឋបាលថ្នាក់ក្រោមជាតិមានសំឡេងរួមគ្នាក្នុងការពិភាក្សាជាមួយរាជរដ្ឋាភិបាលពាក់ព័ន្ធនឹងការអភិវឌ្ឍ។ លើសពីនេះទៅទៀត សម្ព័ន្ធភាពជាតិបានដើរតួនាទីយ៉ាងសំខាន់នៅក្នុងការលើកកម្ពស់សមត្ថភាពរបស់សមាជិកក្រុមប្រឹក្សាក្នុងការអនុវត្តតួនាទីភារកិច្ចរបស់ខ្លួនស្របតាមច្បាប់និងលិខិតបទដ្ឋានគតិយុត្ត ។
ទន្ទឹមនឹងនេះសម្តេចតេជោនាយករដ្ឋមន្ត្រីគូសបញ្ជាក់អំពីកិច្ចការសំខាន់ៗមួយចំនួនផ្សេងទៀតដែលពាក់ព័ន្ធទៅនឹងក្រុមប្រឹក្សារដ្ឋបាលថ្នាក់ក្រោមជាតិ បន្ថែមពីលើការបង្កើតបានយ៉ាងរឹងមាំនូវក្រុមប្រឹក្សាឃុំ-សង្កាត់ដែលបច្ចុប្បន្នបានបង្កើតក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក និងក្រុមប្រឹក្សាខណ្ឌ ។ កិច្ចការទាំងនេះយើងកំពុងតែរៀបចំកិច្ចដំណើរការនៃការផ្តល់ដល់ក្រុមប្រឹក្សាទាំងនោះនូវប្រព័ន្ធគ្រប់គ្រងជាមូលដ្ឋាននានារួមជាមួយនឹងការផ្តល់បុគ្គលិកនិងធនធានហិរញ្ញវត្ថុផងដែរ ។
ជំហានបន្ទាប់ត្រូវមានការងារផ្នែកគោលនយោបាយដ៏សំខាន់មួយដែលនឹងត្រូវរៀបចំឡើងនៅក្នុងរយៈពេលដ៏ខ្លីខាងមុខ ក្នុងការរៀបចំធ្វើបញ្ជីមុខងាររបស់ខ្លួនដែលមាននាពេលបច្ចុប្បន្នសម្រាប់មើលឡើងវិញនូវមុខងារទាំងនោះដើម្បីកំណត់ថា តើមុខងារសមស្របណាខ្លះត្រូវផ្ទេរឱ្យទៅក្រុមប្រឹក្សារដ្ឋបាលថ្នាក់ក្រោមជាតិ ។
ក្រោមក្របខណ្ឌនៃច្បាប់រៀបចំអង្គការ គ.ជ.អ.ប ត្រូវទទួលខុសត្រូវក្នុងការពិនិត្យមើលដំណើរការនៃការផ្ទេរមុខងារនេះ និងត្រូវធានាថា កិច្ចដំណើរការនៃការផ្ទេរមុខងារត្រូវអនុវត្តប្រកបដោយប្រសិទ្ធភាព តម្លាភាព មានការពិគ្រោះយោបល់ តាមពេលវេលា កំណត់ច្បាស់លាស់ និងមិនរំខានឬរំខានក្នុងគំនិតអប្បរមាទៅលើប្រតិបត្តិការដែលកំពុងដំណើរការរៀបចំស្ថាប័នឡើងវិញ ដែលកិច្ចការនេះនៅមានការពាក់ព័ន្ធផងដែរ ក្នុងកម្មវិធីកំណែទម្រង់រដ្ឋបាលសាធារណៈ ។
ហេតុនេះ គ.ជ.អ.ប និងកម្មវិធីកំណែទម្រង់រដ្ឋបាលសាធារណៈចាំបាច់ត្រូវតែធ្វើការរួមគ្នា ដើម្បីធានាថា ដំណើរការនេះនឹងមានលក្ខណៈប្រទាក់ក្រឡាគ្នា និងមានការសម្របសម្រួលគ្នា។
លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានថ្លែងថា អង្គសន្និបាតបូកសរុបលទ្ធផលការងារក្រុុមប្រឹក្សាឃុំ-សង្កាត់អាណត្តិទី២បានដំណើរការក្នុងរយៈពេល២ថ្ងៃ ស្របតាមកម្មវិធីដែលបានគ្រោងទុក ដោយមានការអញ្ជើញចូលពីសមាជិកក្រុមប្រឹក្សាឃុំ-សង្កាត់ជាង២០០នាក់ ដែលតំណាងឱ្យឃុំ-សង្កាត់នៅទូទាំងប្រទេស។ ប្រធានក្រុមប្រឹក្សាក្រុង-ស្រុក-ខេត្ត-ខណ្ឌចំនួន១៩៥នាក់ តំណាងឱ្យក្រុង-ស្រុក-ខណ្ឌទូទាំងប្រទេស ។ ក្រុមប្រឹក្សារាជធានី-ខេត្ត៤៨នាក់ តំណាងឱ្យរាជធានី-ខេត្តទូទាំងប្រទេស និងគណៈអភិបាលរាជធានី-ខេត្ត-ក្រុង-ស្រុក-ខណ្ឌចំនួន១០៥នាក់ ព្រមទាំងមានការចូលរួមពីក្រសួងស្ថាប័ននៃរាជរដ្ឋាភិបាលកម្ពុជា តំណាងដៃគូអភិវឌ្ឍន៍ សង្គមស៊ីវិល និងអង្គការមិនមែនរដ្ឋាភិបាលនានាដែលមានចំនួនប្រមាណជាង៧០០នាក់ ។
លោកឧបនាយករដ្ឋមន្ត្រីមានប្រសាសន៍ថា អង្គសន្និបាតទាំងមូលបានឯកភាពខ្ពស់ចំពោះរបាយការណ៍វាយតម្លៃអំពីសមិទ្ធផលនៃការអនុវត្តការងាររបស់ក្រុមប្រឹក្សាឃុំ-សង្កាត់អាណត្តិទី២ សមិទ្ធផលរបស់ក្រុមប្រឹក្សារាជធានី-ខេត្ត-ស្រុក-ខណ្ឌរយៈពេលជាង២ឆ្នាំក៏ដូចជាកំណែទម្រង់វិមជ្ឈការ និងវិសហមជ្ឈការរយៈកាលជិត១០ឆ្នាំមកនេះ ។
ទន្ទឹមនេះអង្គសន្និបាតបានធ្វើការតាមដានយ៉ាងយកចិត្តទុកដាក់នូវបទពិសោធន៍នៃការអនុវត្តការងាររបស់ក្រុមប្រឹក្សាមួយចំនួននៃរដ្ឋបាលថ្នាក់ក្រោមជាតិ រួមទាំងបទអន្តរាគមន៍របស់ស្ថាប័នសិក្សាស្រាវជ្រាវឯករាជ្យក្នុងប្រទេសដែលបង្ហាញពីការរកឃើញរបស់ខ្លួនជុំវិញការអនុវត្តគោលនយោបាយកំណែទម្រង់វិមជ្ឈការនិងវិសហមជ្ឈការរបស់រាជរដ្ឋាភិបាលកម្ពុជា ។
ផ្អែកតាមរបាយការណ៍នៃបទអន្តរាគមន៍នានា អង្គសន្និបាតទាំងមូលបានបែងចែកក្រុមពិភាក្សាដែលប្រមូលផ្តុំលើបញ្ហាសំខាន់ៗដែលជាតម្រូវការជាអាទិភាពក្នុងកំណែទម្រង់ជាអាទិ៍ ការប្រមើលមើលអំពីជម្រើសសមស្របនានាសម្រាប់ការបង្កើតសមាគមក្រុមប្រឹក្សានៃរដ្ឋបាលថ្នាក់ក្រោមជាតិ ភាពចាំបាច់នៃការដាក់ឱ្យដំណើរការនូវមូលនិធិក្នុងស្រុកដែលតម្រូវដោយច្បាប់ស្តីពីរបបហិរញ្ញវត្ថុ និងការគ្រប់គ្រងទ្រព្យសម្បត្តិរបស់ថ្នាក់ក្រោមជាតិ យន្តការ និងវិធីសាស្ត្រនៃការគាំទ្ររបស់ខេត្តចំពោះក្រុង-ស្រុកនិងឃុំ-សង្កាត់ក្នុងស្ថាប័ន ស្ថានភាពប្រព័ន្ធគាំទ្រនេះ កំពុងត្រូវបានធ្វើការកែសម្រួល។ ការចូលរួមរបស់រដ្ឋបាលថ្នាក់ក្រោមជាតិ និងការផ្តល់សេវាសង្គមដោយផ្តោតទៅលើជនងាយរងគ្រោះនិងជនជាតិភាគតិច ស្ត្រី និងកុមារតម្រូវការចាំបាច់នៃការបញ្ជ្រាបយេនឌ័រ និងការបង្កើនភាពអង់អាចក្លាហានរបស់ស្ត្រីក្នុងកំណែទម្រង់រដ្ឋបាលថ្នាក់ក្រោមជាតិ ព្រមទាំងតួនាទីរបស់យុវជនក្នុងការចូលរួមធ្វើសេចក្តីសម្រេចចិត្តនានានៅមូលដ្ឋាន ។
ឆ្លងតាមការពិភាក្សា«អង្គសន្និបាតបានធ្វើការវាយតម្លៃខ្ពស់ចំពោះក្រុមប្រឹក្សាឃុំ-សង្កាត់ដែលមានតួនាទីស្នូលក្នុងការទ្រទ្រង់ការបង្កើត និងការធ្វើឱ្យមានចីរភាពដល់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ។
ក្នុងន័យនេះ អង្គសន្និបាតទាំងមូលបានប្តេជ្ញាចិត្តក្នុងការបន្តគាំទ្រក្នុងដំណើរការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៣ នាថ្ងៃអាទិត្យទី៣ខែមិថុនា ឆ្នាំ២០១២ខាងមុខ ឱ្យប្រព្រឹត្តទៅប្រកបដោយលក្ខណៈសេរី ត្រឹមត្រូវ យុត្តិធម៌ និងមានសុវត្ថិភាព ។
លោកឧបនាយករដ្ឋមន្ត្រីគូសបញ្ជាក់ថា តាមរយៈសន្និបាតនេះ បានបង្ហាញកាន់តែច្បាស់នូវការសម្រេចចិត្តដ៏ត្រឹមត្រូវរបស់រាជរដ្ឋាភិបាលកម្ពុជាក្នុងការនាំយកនូវគោលនយោបាយកំណែទម្រង់វិមជ្ឈការ វិសហមជ្ឈការ សម្រាប់ធ្វើជាចក្ខុវិស័យសម្រាប់កែលម្អរដ្ឋបាលសាធារណៈ ដើម្បីគាំទ្រដល់កំណែទម្រង់រដ្ឋបាលថ្នាក់ក្រោមជាតិនៅកម្ពុជា ។ ជាមេរៀនបទពិសោធន៍ក្នុងរយៈពេលជិត១០ឆ្នាំកន្លងមកនេះ បានបង្ហាញថា នៅពេលដែលកំណែទម្រង់បានវិវត្តពីដំណាក់កាលមួយទៅដំណាក់មួយទៀត បញ្ហាប្រឈមថ្មីៗប្រាកដជាកើតឡើងដូចដែលអង្គសន្និបាតបានកត់សម្គាល់ តាមរយៈរបាយការណ៍បទអន្តរាគមន៍ការពិភាក្សាមានរយៈពេល១ថ្ងៃកន្លះកន្លងមកនេះ ។
ទន្ទឹមនេះ រាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោហ៊ុន សែន ជាប្រមុខ បានប្តេជ្ញាចិត្តយ៉ាងមុតមាំ ក្នុងរយៈពេលវែងដើម្បីជំរុញដំណើរការកំណែទម្រង់នៅថ្នាក់ក្រោមជាតិឱ្យប្រព្រឹត្តទៅតាមជំហាននិងដំណាក់កាលទៅតាមរបៀបវារៈ និងគោលនយោបាយរបស់រាជរដ្ឋាភិបាលកម្ពុជា ៕
ចែករំលែកព័តមាននេះ