រាជធានីភ្នំពេញ ៖ នៅថ្ងៃទី១៨ ខែសីហា ស្នងការដ្ឋាននគរបាលរាជធានី បានចេញសេចក្តីប្រកាសស្វែងរកចាប់ខ្លួនជាសាធារណៈ ករណីខ្មាន់កាំភ្លើងដែលបា.ញ់ប្រហារយ៉ាងឃោរឃៅមកលើមន្ត្រី នគរបាលជាតិ២រូបបម្រើការងារនៅការិយាល័យព្រហ្មទណ្ឌកម្រិតធ្ងន់ កាលពីវេលាម៉ោង២និង៤០នាទីរំលងអធ្រាត្រ ថ្ងៃទី១៤
រាជធានីភ្នំពេញ ៖ នៅថ្ងៃទី១៨ ខែសីហា ស្នងការដ្ឋាននគរបាលរាជធានី បានចេញសេចក្តីប្រកាសស្វែងរកចាប់ខ្លួនជាសាធារណៈ ករណីខ្មាន់កាំភ្លើងដែលបាញ់ប្រហារយ៉ាងឃោរឃៅមកលើមន្ត្រីនគរបាលជាតិ២រូបបម្រើការងារនៅការិយាល័យព្រហ្មទណ្ឌកម្រិតធ្ងន់ កាលពីវេលាម៉ោង២និង៤០នាទីរំលងអធ្រាត្រ ថ្ងៃទី១៤ សីហា ឆ្នាំ២០១១ កន្លងមក ត្រូវបានសមត្ថកិច្ចកំណត់មុខសញ្ញាច្បាស់លាស់ហើយ ហើយនឹងកំពុងស្វែងរកចាប់ខ្លួនដូចមានក្នុងរូបថតនេះស្រាប់ ។
ខ្មាន់កាំភ្លើងដែលជាឧក្រិដ្ឋបាញ់ប្រហារមកលើមន្ត្រីនគរបាលត្រូវប្រកាសស្វែងរកចាប់ខ្លួននេះមានឈ្មោះញៀវ ធឿន ហៅម៉ាំង ភេទប្រុស អាយុ៤១ឆ្នាំ មធ្យោបាយគេចខ្លួនមានម៉ូតូហុងដា C125 ពណ៌ខ្មៅ ស៊េរី២០០៥ ពាក់ស្លាកលេខភ្នំពេញ 1G-2510 ។ ញៀវ ធឿន ហៅម៉ាំង មានសម្បុរស្រអែមមាឌធំ កម្ពស់ជាង១,៧០ម៉ែត្រ ។ ដើម្បីរួមចំណែករក្សាសន្តិសុខ សុវត្ថិភាពសង្គមស្នងការដ្ឋាននគរបាលរាជធានីសំណូមពរដល់ប្រជាពលរដ្ឋ មេត្តាសហការផ្តល់ព័ត៌មានចំពោះទីកន្លែងលាក់ខ្លួនឧក្រិដ្ឋជនរូបនេះ ។
បើសិនជាបានឃើញ ឬជួបប្រទះនៅទីណានោះ ត្រូវរាយការណ៍មកសមត្ថកិច្ចតាមរយៈលេខទូរស័ព្ទ០១២ ៩៩៩ ៩៩៩, ០១២ ៩២៣ ៩២៣, ០១២ ៨១៥ ០៩៧, ០១៦ ៩៧១ ៦៦៦ និង០១២ ៨២២ ៨២២ ស្នងការដ្ឋាននគរបាលរាជធានីភ្នំពេញ នឹងជូនរង្វាន់ជាទីគាប់ចិត្តចំពោះព័ត៌មានណាដែលឈានទៅបង្ក្រាបបានឧក្រិដ្ឋជននេះ ។ ជាមួយនោះផងដែរ លេចធ្លាយព័ត៌មានថ្មីទៀត ពីសមត្ថកិច្ចនគរបាលបានហៅអ្នករត់ម៉ូតូឌុបម្នាក់ដែលឌុបខ្មាន់កាំភ្លើងទៅពិនិត្យមើលកន្លែងកើតហេតុត្រូវបានសមត្ថកិច្ចនគរបាលរាជធានី អញ្ជើញទៅសាកសួរព័ត៌មានបន្ថែម ដើម្បីជាតឹកតាងសម្រាប់រកបទល្មើសដាក់បន្ទុកលើជនត្រូវចោទ ។
ប្រភពព័ត៌មានបានឱ្យដឹងថា អ្នករត់ម់ូតូឌុបដែលត្រូវសមត្ថកិច្ចអញ្ជើញទៅសាកសួរបានរៀបរាប់ថា កាលពីព្រឹកថ្ងៃទី១៤ សីហា ឈ្មោះញៀវ ធឿន ហៅម៉ាំង បានទូរស័ព្ទហៅខ្លួនឱ្យឌុបពីផ្ទះនៅក្រុងតាខ្មៅ ទៅភ្នំពេញ ដោយនិយាយប្រាប់ថា ជូនទៅរកញ៉ាំអាហារពេលព្រឹក។ អ្នករត់ម៉ូតូឌុបក៏បានទៅឌុបខ្មាន់កាំភ្លើងតាមការកំណត់ ព្រោះគេជាមនុស្សស្គាល់គ្នា និងរាប់អានគ្នាដូច្នេះមិនរុញរាក្នុងការជូនដំណើរទេ តែអ្នករត់ម៉ូតូនោះមិនបានដឹងថា មនុស្សដែលសិទ្ធិស្នាលកំពុងជិះម៉ូតូពីក្រោយវាឃាតកទេ។
ម៉ូតូឌុបបានប្រាប់សមត្ថកិច្ចទៀតថា ឈ្មោះញៀវ ធឿន បានឱ្យគេឌុបចេញពីភូមិដើមមៀន ឃុំដើមមៀន ស្រុកតាខ្មៅ ខេត្តកណ្តាល ពីផ្ទះសំដៅទៅម្តុំអង់តែនទូរទស្សន៍ជាតិទួលគោក ពេលទៅដល់នោះ គេបានឃើញមនុស្សម្នាអ៊ូ អរចោមរោមមើលទីកន្លែងដែលចោរបាញ់ប្រហារមន្ត្រីនគរបាល២រូបកាលពីយប់ ។ ពេលឈប់ម៉ូតូក្នុងហ្វូងមនុស្សកុះករឈ្មោះញៀវ ធឿន ហៅម៉ាំង បានចុះពីលើម៉ូតូរួចធ្វើជាសួរគេឯងថា គេចោមរោមមើលអី អ្នកដំណើរម្នាក់ឆ្លើយភ្លាមថា មើលសាកសពប៉ូលិស២នាក់ត្រូវចោរបាញ់សម្លាប់។ អ្នករត់ម៉ូតូដដែលនិយាយទៀតថា ពេលឮអ្នកដំណើរប្រាប់ថា ចោរប្លន់បាញ់ប៉ូលិសឈ្មោះញៀវ ធឿន ហៅម៉ាំង ក៏សួរបន្តថា ប៉ូលិស២នាក់នោះស្លាប់ហើយឬនៅ គេក៏ថា ម្នាក់ស្លាប់ ម្នាក់មិនទាន់ផុតដង្ហើមទេ ។ បានទទួលព័ត៌មានបែបនេះ ឈ្មោះម៉ាំង ក៏ឱ្យឌុបជូនទៅហាងគុយទាវឆ្ងាញ់មួយនៅចាក់អង្រែ ហើយគេក៏បែកគ្នាទៅ ។
លោកវរសេនីយ៍ទោ ជួន ណារិន្ទ ប្រធានការិយាល័យនគរបាលព្រហ្មទណ្ឌកម្រិតធ្ងន់បានឱ្យដឹងថា ខ្មាន់កាំភ្លើងដែលបាញ់មន្ត្រីនគរបាល២រូប កូនចៅរបស់លោកនោះ ពិតជាសមាសភាពក្រុមចោរប្លន់ប្រដាប់អាវុធ ទោះបីជាជននោះចេញពីប្រភពណាក៏ដោយ ។ លោកជួន ណារិន្ទ អះអាងយ៉ាងដូច្នេះយោងទៅលើកាលពីថ្ងៃទី ៨ សីហា ឆ្នាំ២០១១ ពោលគឺមុនកើតហេតុ៥ទៅ៦ថ្ងៃ កម្លាំងជំនាញរបស់ការិយាល័យព្រហ្មទណ្ឌ កម្រិតធ្ងន់បានល្បាតជួបប្រទះមុខសញ្ញាចោរប្លន់១ក្រុមមានគ្នា២នាក់ ដែលប៉ុនប៉ងប្លន់ជនបរទេសចេញពីលេងល្បែងកាសីុណូជិះម៉ូតូកង់បីបំណងទៅកាន់កន្លែងស្នាក់នៅ ។ ដោយមាន ព័ត៌មានពីកម្លាំងជំនាញនោះហើយ លោកក៏បានជូនដំណឹងទៅលោកស្នងការ ដើម្បីប្រើប្រាស់កម្លាំងបន្ថែមតាមមុខសញ្ញានោះ ជាប្រចាំ និងរាល់យប់ ។ ជាក់ស្តែងនៅយប់ថ្ងៃទី១៤ សីហា ក្រុមចោរប្លន់១ក្រុមដដែលនោះបម្រុងប្លន់ជនបរទេសដូចសព្វដងទៀត ប៉ុន្តែដោយសារជនល្មើសបានឃើញ និងសង្ស័យលើកម្លាំងសមត្ថកិច្ចទើបពួកគេបានបោះបង់សកម្មភាពហើយគេចខ្លួន។ ដូច្នេះពេលកំណត់បានមុខសញ្ញាច្បាស់លាស់ ហើយលោកគង់ វិចិត្រ ហៅជា រហស្សនាមរាត្រី៣៦ និងលោករឿង ប៉ូ ហៅមាស រហស្សនាមរាត្រី៨៥ បានបើករថយន្តតាមមុខសញ្ញានោះ លុះទៅដល់ក្បែរអង់តែនទូរទស្សន៍ជាតិទួលគោក មន្ត្រីនគរបាលទាំង២សម្រេចបើករថយន្តកៀរជនល្មើសឱ្យឈប់ដើម្បីត្រួតពិនិត្យ ។ លោកជួន ណារិន្ទ បានបន្តថា ពេលនោះលោករឿងប៉ូ ហៅមាស រាត្រី៨៥ ចុះពីរថយន្តដោយផ្ទុះអាវុធ១គ្រាប់ឡើងលើ តែត្រូវជនល្មើសដកកាំភ្លើងពីចង្កេះបាញ់ស្រោចតបវិញ ខណៈអាវុធរបស់រាត្រី៨៥ ត្រូវអាក់ស្តង់ បណ្តាលឱ្យស្លាប់ភ្លាម ។ បន្ទាប់មកជនល្មើសបានបន្តបាញ់លោកគង់ វិចិត្រ ហៅជា រាត្រី៣៦ ដែលនៅកាន់ចង្កូតរថយន្តឱ្យស្លាប់ដែរ ហើយក៏គេចខ្លួនបាត់ទៅ ។
ថ្ងៃនេះគំរប់៧ថ្ងៃ ផ្តើមពិធីបុណ្យនៅស្នងការដ្ឋាននគរបាលរាជធានីភ្នំពេញ នៅពេលចប់បុណ្យនេះទៅលោកស្នងការ នឹងធ្វើពិធីប្រគល់ប្រាក់ឧបត្ថម្ភពីសប្បុរសជនជូនទៅក្រុមគ្រួសារមន្ត្រីរងគ្រោះត្រូវចោរបាញ់សម្លាប់ ។ ថវិកានោះ នឹងអាចបាន១គ្រួសារជាង១ម៉ឺនដុល្លារសហរដ្ឋអាមេរិក ។
នៅព្រឹកថ្ងៃទី១៨ សីហា នេះ សមត្ថកិច្ចនាយកដ្ឋាននគរបាលបច្ចេកទេស និងវិទ្យាសាស្ត្រនៃក្រសួងមហាផ្ទៃ បានចុះទៅសហការជាមួយការិយាល័យនគរបាលបច្ចេកទេសនៃស្នងការនគរបាលរាជធានីភ្នំពេញ រួមទាំងអធិការដ្ឋានខណ្ឌទួលគោក ធ្វើការត្រួតពិនិត្យរថយន្តម៉ាកកាមរី ពណ៌ស្ករ ពាក់ស្លាកលេខភ្នំពេញ 2A-5777 របស់មន្ត្រីប៉ូលិសចំនួន២នាក់ ដែលត្រូវបានចោរបាញ់ស្លាប់ រួមទាំងត្រួតពិនិត្យម៉ូតូមា៉កហុងដា C125 ស៊េរី២០០៧ ពាក់ស្លាកលេខកណ្តាល 1D-6058 ដែលជាម៉ូតូឃាតកបាញ់សម្លាប់មកលើមន្ត្រីប៉ូលិស ។ នៅក្នុងការត្រួតពិនិត្យនេះត្រូវសមត្ថកិច្ចបង្ហើបឱ្យដឹងថា ដើម្បីបញ្ជាក់បន្ថែមឱ្យកាន់តែច្បាស់ជុំវិញ ការបាញ់សម្លាប់មកលើមន្ត្រីប៉ូលិសចំនួន២នាក់នោះពីសំណាក់ជនដៃដល់ សមត្ថកិច្ចអះអាងថា ជាចោរប្លន់កាលពីម៉ោង២និង៤០នាទីរំលងអធ្រាត្រចូលថ្ងៃទី១៤ សីហា នៅក្បែរអង់តែនមុខមន្ទីរពហុព្យាបាលម៉ៅសារី ក្នុងសង្កាត់បឹងកក់ទី ១ ខណ្ឌទួលគោក ។
តាមព័ត៌មានឱ្យដឹងថា នៅក្នុងការត្រួតពិនិត្យនោះសមត្ថកិច្ចចម្រុះបានពិនិត្យឃើញស្នាមរបកថ្នាំរថយន្ត និងកាបាំងម៉ូតូដែលមន្ត្រីប៉ូលិសព្រហ្មទណ្ឌកម្រិតធ្ងន់នៃស្នងការនគរបាលរាជធានីភ្នំពេញ ចំនួន២នាក់ដែលរងគ្រោះថ្នាក់បានបើកកៀរស្ទាក់ផ្លូវម៉ូតូជនដៃដល់ដើម្បីត្រួតពិនិត្យ ។ ប្រភពបន្តថា នៅវេលាម៉ោង៧យប់ ថ្ងៃទី១៧ សីហា ក្រុមគ្រួសារជនរងគ្រោះដែលជាមន្ត្រីនគរបាលបានអញ្ជើញតាអាចារ្យទៅសូត្រធម៌ ដើម្បីឧទ្ទិសកុសលផលបុណ្យជូនដល់វិញ្ញាណក្ខន្ធមន្ត្រីប៉ូលិស២នាក់នោះដែលពិធីនេះបានរៀបចំឡើងនៅកន្លែងកើតហេតុស្ថិតនៅផ្លូវលេខ៥១៦ សង្កាត់បឹងកក់ទី១ ខណ្ឌទួលគោក រាជធានីភ្នំពេញ៕
ចែករំលែកព័តមាននេះ