រាជធានីភ្នំពេញ ៖ នារី៣នាក់រងរបួសធ្ងន់សន្លប់ស្តូកស្តឹងជាប់នៅក្នុងរថយន្ត ត្រូវបានគេវាយបំបែកកញ្ចក់២ទៅ៣កន្លែង រួចហើយទាញពួកនាងចេញពីក្នុងរថយន្តនាំយកទៅសង្គ្រោះយ៉ាង ប្រញាប់ប្រញាល់នៅគ្លីនិកទួលគោក ខណៈបើករថយន្តលឿនស្លេវជ្រុលទៅធ្លាក់ស្រះទឹកធំមួយក្រឡាប់ ផ្ងារកង់ឡើងលើដំបូលលិចទៅក្រោម
រាជធានីភ្នំពេញ ៖ នារី៣នាក់រងរបួសធ្ងន់សន្លប់ស្តូកស្តឹងជាប់នៅក្នុងរថយន្តត្រូវបានគេវាយបំបែកកញ្ចក់២ទៅ៣កន្លែង រួចហើយទាញពួកនាងចេញពីក្នុងរថយន្តនាំយកទៅសង្គ្រោះយ៉ាងប្រញាប់ប្រញាល់នៅគ្លីនិកទួលគោក ខណៈបើករថយន្តលឿនស្លេវជ្រុលទៅធ្លាក់ស្រះទឹកធំមួយក្រឡាប់ផ្ងារកង់ឡើងលើដំបូលលិចទៅក្រោមទឹក គួរឱ្យរន្ធត់ពន់ពេក ក្រោមតំណក់គ្រាប់ភ្លៀងរលឹមស្រិចៗ។
ឧប្បត្តិហេតុនេះបានកើតឡើងកាលពីវេលាម៉ោង៥និង៣០នាទីល្ងាចថ្ងៃទី១៨ សីហា ២០១១ លើកំណាត់ផ្លូវភ្នំពេញ-ហាណូយ ស្ថិតក្នុងសង្កាត់ឃ្មួញ ខណ្ឌសែនសុខ បង្កឱ្យមានការភ្ញាក់ផ្អើលយ៉ាងខ្លាំង សូម្បីតែអ្នកចោមរោមមើលក៏ទទួលរងនូវភាពរងាចំប្រប់លាយឡំនឹងភាពព្រឺរន្ធត់ផងដែរ ខណៈឃើញពួកនារីទាំង៣នាក់សន្លប់ស្តូកស្តឹងប្រឡាក់ដោយឈាម។ រថយន្តដែលជួបគ្រោះថ្នាក់ចរាចរណ៍នេះម៉ាកកូរ៉ូឡា ពណ៌ស្ករ ពាក់ស្លាកលេខ ភ្នំពេញ 2A-4089 ជិះគ្នា៣នាក់សុទ្ធតែស្រីៗទាំងអស់ មិនត្រូវបានគេស្គាល់អត្តសញ្ញាណទេ ព្រោះត្រូវបញ្ជូនទៅសង្គ្រោះភ្លាមៗ។
សាក្សីបាននិយាយថា មុនដំបូងរថយន្តកូរ៉ូឡានេះ បើកលឿនលើកំណាត់ផ្លូវភ្នំពេញ-ហាណូយវ៉ារថយន្តមួយគ្រឿងទៀត ស្រាប់តែវាក់នឹងម៉ូតូមកពីមុខ នាងក៏បញ្ជាចង្កូតគេច ប៉ុន្តែស្តាយណាស់ វាបែរជាជ្រុលទៅធ្លាក់ចូលស្រះទឹកទៅវិញ។ ពេលរថយន្តក្រឡាប់ផ្ងារកង់ដំបូលលិចចុះក្រោមស្ទើរតែបាត់រថយន្តនោះគឺនាងទាំង៣នាក់បានសន្លប់បាត់ទៅហើយ ហើយត្រូវប្រជាពលរដ្ឋវាយទម្លាយកញ្ចក់ទាញចេញមកក្រៅនាំយកទៅសង្គ្រោះ។
សូមបញ្ជាក់ថា ប្រសិនបើប្រជាពលរដ្ឋយឺតពេលក្នុងការវាយទម្លាយកញ្ចក់តែបន្តិច គឺពួកនាងទាំង៣ប្រាកដជាស្លាប់ដោយសារឈ្លក់ទឹកថប់ដង្ហើម ព្រោះថា រថយន្តឱ្យតែលិចចូលទឹកវាមិនអាចបើកទ្វារចេញបាននោះទេ។ ព័ត៌មានលម្អិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព ៕
ចែករំលែកព័តមាននេះ