ក្រុងប៉ោយប៉ែត ៖ ពលករខ្មែរ១៤៧នាក់ ដែលត្រូវសមត្ថកិច្ចថៃធ្វើការចាប់ខ្លួនកាលពីយប់ថ្ងៃទី១៦ សីហា ២០១១ នៅស្រុកអារញ្ញ ខណៈពួកគេចូលទៅធ្វើជាកម្មករសំណង់ឱ្យក្រុមហ៊ុនម៉ៅការសំណង់ មួយរបស់ជនជាតិថៃនោះ ឥឡូវនេះត្រូវបានដោះលែង១២៦នាក់វិញហើយឱ្យធ្វើការតាមសម្រួល នៅទីនោះកាលពីព្រឹកថ្ងៃទី១៨
ក្រុងប៉ោយប៉ែត ៖ ពលករខ្មែរ១៤៧នាក់ ដែលត្រូវសមត្ថកិច្ចថៃធ្វើការចាប់ខ្លួនកាលពីយប់ថ្ងៃទី១៦ សីហា ២០១១ នៅស្រុកអារញ្ញ ខណៈពួកគេចូលទៅធ្វើជាកម្មករសំណង់ឱ្យក្រុមហ៊ុនម៉ៅការសំណង់មួយរបស់ជនជាតិថៃនោះ ឥឡូវនេះត្រូវបានដោះលែង១២៦នាក់វិញហើយឱ្យធ្វើការតាមសម្រួលនៅទីនោះកាលពីព្រឹកថ្ងៃទី១៨ សីហា ២០១១។
តាមការឱ្យដឹងពីមន្ត្រីកម្ពុជាដែលធ្វើការនៅប្រទេសថៃ ក្នុងខេត្តស្រះកែវ ប្រាប់តាមទូរស័ព្ទថា ពលករ១២៦នាក់ត្រូវបានគេដោះលែងឱ្យធ្វើការនៅកន្លែងដើមវិញ ចំណែក២១នាក់ទៀតមានស្រី៦នាក់ កំពុងត្រូវបានគេឃុំខ្លួននៅឯស្ថានីយតម្រួតស្រុកអារញ្ញ។ មន្ត្រីដដែលនេះប្រាប់ថា ពលករទាំងអស់មុនពេលដោះលែងត្រូវបានគេដឹកយកមកច្រកទ្វារព្រំដែនខាងទឹកដីរបស់គេ ដើម្បីពិនិត្យមើលរូូបភាព និងឯកសារក្នុងកុំព្យូទ័រថា តើត្រឹមត្រូវ តាមច្បាប់ ឬក៏អត់។ និយាយពីពលករ២១នាក់ ដែលនៅបន្តឃុំខ្លួននោះវិញ ត្រូវបានមន្ត្រីដដែលប្រាប់ថា ដោយសារក្រោយការពិនិត្យរកឃើញពួកគេមានតែប័ណ្ណឆ្លងដែន ប៉ុន្តែគ្មានប័ណ្ណអនុញ្ញាតឱ្យធ្វើការ ទើបឃាត់ទុកសិនរង់ចាំការដោះស្រាយបន្ត។
ទោះជាបែបណា មន្ត្រីរូបនេះបន្តថា អាចនឹងមិនមានការបញ្ជូនមកខ្មែរវិញទេ គឺខាងថៅកែក្រុមហ៊ុនម៉ៅការសំណង់នេះកំពុងបន្តដោះស្រាយដើម្បីឱ្យពួកគេបានបន្តធ្វើការនៅនោះតទៅទៀត ហើយលោកក៏បញ្ជាក់ផងដែរថា ទាំង២១នាក់ខាងលើ សមត្ថកិច្ចថៃអាចនឹងធ្វើការដោះលែងវិញនៅល្ងាចនេះ ដោយមន្ត្រីខ្មែរយើងកំពុងបន្តតាមដាននិងជួយសម្របសម្រួលយ៉ាងយកចិត្តទុកដាក់៕
ចែករំលែកព័តមាននេះ