ក្រុងប៉ោយប៉ែត ៖ រថយន្តធុនធំដឹកដីខ្សាច់ ឥដ្ឋ ហ្គាស និងថ្មនៅតែបន្តបំផ្លាញផ្លូវនៅក្នុងក្រុងប៉ោយប៉ែត បើទោះជាមួយរយៈនេះគេសង្កេតឃើញអាជ្ញាធរសង្កាត់ និងក្រុងប្រើធម៌ក្តៅចាប់ផាកពិន័យទៅលើរថយន្តធំទាំងឡាយណា ដែលដឹកបំផ្លាញផ្លូវក្តី។ ជាក់ស្តែងនៅចំណុចកែងបត់នៃផ្លូវបំបែកជាបួនក្នុងភូមិបាលិលេយ្យ ១ សង្កាត់
ក្រុងប៉ោយប៉ែត ៖ រថយន្តធុនធំដឹកដីខ្សាច់ ឥដ្ឋ ហ្គាស និងថ្មនៅតែបន្តបំផ្លាញផ្លូវនៅក្នុងក្រុងប៉ោយប៉ែត បើទោះជាមួយរយៈនេះគេសង្កេតឃើញអាជ្ញាធរសង្កាត់ និងក្រុងប្រើធម៌ក្តៅចាប់ផាកពិន័យទៅលើរថយន្តធំទាំងឡាយណាដែលដឹកបំផ្លាញផ្លូវក្តី។
ជាក់ស្តែងនៅចំណុចកែងបត់នៃផ្លូវបំបែកជាបួនក្នុងភូមិបាលិលេយ្យ១ សង្កាត់ប៉ោយប៉ែត នៅព្រឹកថ្ងៃទី១៧ សីហា ២០១១ គេឃើញរថយន្តធំម៉ាកហ្វ៊ុយសូដឹកឥដ្ឋមួយគ្រឿងជាប់ផុងបង្កឱ្យអ្នកស្រុកពិបាកក្នុងការធ្វើដំណើរ។ ទោះបីជាបែបណាក្តី ការជាប់ផុងរថយន្តបែបនេះវាមិនមែនទើបតែលើកនេះទេ គឺកើតមានជាច្រើនដងមកហើយ ប៉ុន្តែក្រុមឈ្មួញហាក់ដូចជាមិនរាងចាលចំពោះវិធានការរបស់អាជ្ញាធរសង្កាត់ និងក្រុងឡើយ។
បើតាមការឱ្យដឹងពីលោកឃុយ ហ៊ាង មេភូមិបាលិលេយ្យ១ក៏ដូចជាមេភូមិផ្សេងៗប្រាប់ថា ពួកគាត់ពិបាកក្នុងការចាត់ការលើម្ចាស់រថយន្ត ឬឈ្មួញខ្លាំងណាស់ ព្រោះក្រោយពីពួកលោកសួរ និងប្រាប់ពីហេតុផល គឺក្រុមអ្នកបើកបរ ឬឈ្មួញតែងតែទូរស័ព្ទពឹងលោកនេះ លោកនោះឱ្យមកជួយអន្តរាគមន៍។
លោកឃុយ ហ៊ាង បន្តថា មកទល់ពេលនេះលោកស្ទើរតែលែងចង់ហ៊ានទៅសួរនាំអ្នកបើកបរ ឬឈ្មួញដែលដឹកធ្ងន់ៗបំផ្លាញផ្លូវទាំងនោះទៀតហើយ។
ក្នុងទិដ្ឋភាពស្រដៀងគ្នានេះដែរក៏មានការរិះគន់ពីគ្រប់មជ្ឈដ្ឋានថា ការដឹកខ្សាច់មិនគ្របឱ្យបានត្រឹមត្រូវនៅលើផ្លូវជាតិជាកត្តានាំឱ្យមានគ្រោះថ្នាក់ទៅលើអ្នកធ្វើដំណើរ ហើយថែមទាំងធ្វើឱ្យប៉ះពាល់ដល់បរិស្ថានទៀតផង។ បច្ចុប្បន្នគេសង្កេតឃើញរថយន្តតូចធំមួយចំនួនដែលរកស៊ីដឹកខ្សាច់ពីខេត្តបន្ទាយមានជ័យ មកពីខេត្ត
ផ្សេងៗឆ្ពោះយកទៅលក់បន្តឱ្យតាមដេប៉ូនៅក្រុងប៉ោយប៉ែតពុំបានគ្របឱ្យបានត្រឹមត្រូវទេ ហើយបង្កឱ្យមានការហុយទ្រលោមលើផ្លូវជាតិ ឬប៉ះពាល់ទាំងអ្នកធ្វើដំណើរ និងបរិស្ថានទៀតផងដែលបញ្ហានេះគេឃើញកើតមានជារឿយៗតាំងពីយូរមកហើយ។
ក្រុមអ្នកធ្វើដំណើរតាមដងផ្លូវជាតិបានរអ៊ូរទាំថា នៅពេលមានរថយន្តធំៗដឹកខ្សាច់បើកម្តងៗធ្វើឱ្យពួកគាត់ពិបាកធ្វើដំណើរជាខ្លាំង រហូតអ្នកខ្លះ សុខចិត្តឈប់ម៉ូតូសិនក៏មានដែរ ព្រោះតែខ្សាច់លើរថយន្តទាំងនោះហុយចូលទាំងភ្នែកនិងច្រមុះធ្វើឱ្យប៉ះពាល់ដល់ផ្លូវដង្ហើម ពិសេសខ្លាចគ្រោះថ្នាក់ចរាចរណ៍កើតមានជាយថាហេតុ។
តាមប្រភពព័ត៌មានឱ្យដឹងថា ក្រុមរថយន្តដឹកខ្សាច់មិនបានគ្របទាំងនេះភាគច្រើនគឺដឹកពីខេត្តបន្ទាយមានជ័យ និងមួយចំនួនតូចដឹកមកពីខេត្តផ្សេងៗ។ អ្នកធ្វើដំណើរគ្រប់គ្នាបានអំពាវនាវដល់សមត្ថកិច្ចតាមដងផ្លូវសូមជួយចាត់វិធានការទៅលើក្រុមរថយន្តដែលធ្វើអាជីវកម្មដឹកខ្សាច់មិនគ្របនេះផង ៕
ចែករំលែកព័តមាននេះ