ខេត្តកំពង់ឆ្នាំង ៖ លោកបណ្ឌិត ណៅ ធួក ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផល កាលពីរសៀលថ្ងៃទី១៧ សីហា បានអញ្ជើញជាអធិបតីភាពក្នុងពិធីប្រគល់កូនត្រីជាង៦ម៉ឺនក្បាល ជូនដល់កងយោធពលខេមរភូមិន្ទ ខេត្តកំពង់ឆ្នាំង ។ ពិធីនេះបានប្រព្រឹត្តទៅនៅក្នុងទីបញ្ជាការតំបន់ប្រតិបត្តិ ការសឹករងខេត្ត
ខេត្តកំពង់ឆ្នាំង ៖ លោកបណ្ឌិត ណៅ ធួក ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផល កាលពីរសៀលថ្ងៃទី១៧ សីហា បានអញ្ជើញជាអធិបតីភាពក្នុងពិធីប្រគល់កូនត្រីជាង៦ម៉ឺនក្បាលជូនដល់កងយោធពលខេមរភូមិន្ទ ខេត្តកំពង់ឆ្នាំង ។ ពិធីនេះបានប្រព្រឹត្តទៅនៅក្នុងទីបញ្ជាការតំបន់ប្រតិបត្តិការសឹករងខេត្ត ដោយមានការអញ្ជើញចូលរួមពីលោកចេង ញ៉ាន់ អភិបាលរងខេត្ត មន្ត្រីរាជការ និងកងទ័ពនៃតំបន់ប្រតិបត្តិការសឹករងខេត្តជាច្រើនរូបទៀត ។
លោកឈួរ ចាន់ឌឿន មេបញ្ជាការតំបន់ប្រតិបត្តិការសឹករងខេត្តមានប្រសាសន៍ថា ថ្ងៃនេះជាលើកទី២ហើយដែលកងយោធពលខេមរភូមិន្ទខេត្តទទួលបាននូវកូនត្រីពីខណ្ឌរដ្ឋបាលជលផល ហើយលើកនេះក៏ដូចជាលើកមុនដែរ ក្រោយពីទទួលបាននូវពូជកូនត្រីទាំងនេះ នឹងធ្វើការបែងចែកទៅតាមបណ្តាអង្គភាពយោធាស្រុកទាំង៨ និងខេត្តចំនួន១ ដែលគ្រប់បណ្តាអង្គភាពទាំងអស់បានត្រៀមស្រះ និងអាងចិញ្ចឹមជាស្រេចតាមការណែនាំរបស់ខណ្ឌរដ្ឋបាលជលផលកំពង់ឆ្នាំង ។
លោកសេង ប៊ុនឈឿន នាយរងខណ្ឌរដ្ឋបាលជលផលបានលើកឡើងថា កូនត្រីដែលយកមកប្រគល់ជូនកងទ័ពចិញ្ចឹមនៅថ្ងៃនេះ គឺ មានជាង៦ម៉ឺនក្បាលជាពូជត្រីអណ្តែងសុទ្ធ ដែលមានតម្លៃជាង៦លានរៀល ។ ពូជកូនត្រីអណ្តែងនេះងាយស្រួលចិញ្ចឹម និងឆាប់ធំធាត់ដែលមានទំហំធំដល់ទៅ២គីឡូក្រាមក្នុងមួយក្បាល បើយើងចិញ្ចឹមបានល្អ ។ លោកក៏បានលើកពីស្នាដៃដែលខណ្ឌរដ្ឋបាលជលផលខំប្រឹងប្រែងបង្ក្រាបបទល្មើសនេសាទកន្លងមក ដោយទទួលបានស្នាដៃល្អផងដែរ ។
លោកចេង ញ៉ាន់ អភិបាលរងខេត្តបានថ្លែងកោតសរសើរ និងអរគុណដល់ខណ្ឌរដ្ឋបាលជលផល ដែលបានផ្តល់កូនត្រីដល់កងទ័ពជាលើកទី២នេះ ដែលលើកទី១ ជាកូនត្រីចម្រុះ និងលើកទី២ ជាកូនត្រីអណ្តែងសុទ្ធ។ លោកក៏បានលើកឡើងពីគោលនយោបាយភូមិ-ឃុំមានសុវត្ថិភាព ថា ឃុំ-សង្កាត់ទូទាំងខេត្តមាន៦៩ ក្នុងនោះ៥៩អនុវត្តបានល្អ ៩ឃុំមានការបង្ក្រាបបទល្មើសលើ៨៥ភាគរយ និង១ឃុំក្រោម៨៥ភាគរយ ។
លោកបណ្ឌិត ណៅ ធួក ប្រធានរដ្ឋបាលជលផលបានលើកឡើងថា កន្លងមករដ្ឋបាលជលផលធ្លាប់បានប្រគល់កូនត្រីដល់កងទ័ពសមរភូមិមុខដែលពេលនេះខ្លះបានហូបបណ្តើរហើយ ហើយពួកគាត់ចូលចិត្តចិញ្ចឹមកូនត្រី ដែលបានផ្តល់ជូនណាស់ ។ លោកបានអំពាវនាវដល់គ្រប់អង្គភាពពេលត្រឡប់ទៅវិញ សូមជួយផ្សព្វផ្សាយឱ្យភូមិ-ឃុំ ស្រុកយកចិត្តទុកដាក់ជួយអភិរក្សតំបន់ ឬស្រះចិញ្ចឹមត្រីគ្រប់ទីកន្លែងដើម្បីឱ្យផលត្រីមានកំណើនឡើងវិញ ៕
ចែករំលែកព័តមាននេះ