ខេត្តរតនគិរី ៖ លោកយាយជរាកំសត់ទុរគតពីរនាក់ដែលតែងតែដើរបេះបន្លែព្រៃតាមទី សាធារណៈយកមកលក់ក្នុងផ្សារ ដើម្បីដោះដូរយកកម្រៃបន្ដិចបន្ដួចចិញ្ចឹមជីវិតយ៉ាងត្រដាបត្រដួសបាន ព្រឹកខ្វះល្ងាចបានល្ងាចខ្វះព្រឹក និងពុំមានកូនចៅសាច់ញាតិអាចពឹងពាក់បាននោះ ពេលនេះលោកយាយម្នាក់ឈ្មោះយិន ឈៀង ដែលមាន
ខេត្តរតនគិរី ៖ លោកយាយជរាកំសត់ទុរគតពីរនាក់ដែលតែងតែដើរបេះបន្លែព្រៃតាមទីសាធារណៈយកមកលក់ក្នុងផ្សារ ដើម្បីដោះដូរយកកម្រៃបន្ដិចបន្ដួចចិញ្ចឹមជីវិតយ៉ាងត្រដាបត្រដួសបានព្រឹកខ្វះល្ងាចបានល្ងាចខ្វះព្រឹក និងពុំមានកូនចៅសាច់ញាតិអាចពឹងពាក់បាននោះ ពេលនេះលោកយាយម្នាក់ឈ្មោះយិន ឈៀង ដែលមានអាយុ៨៤ឆ្នាំ កំពុងមានជំងឺយ៉ាងធ្ងន់ធ្ងរសម្រាកស្ដូកស្តឹងនៅលើលំនៅឋានរបស់គាត់ក្នុងភូមិត្រពាំងច្រេស ឃុំត្រពាំងច្រេស ស្រុកកូនមុំ។ ចំណែកលោកយាយម្នាក់ទៀតឈ្មោះថី អាយុ៨៣ឆ្នាំ ដែលតែងតែដើរបេះបន្លែព្រៃជាមួយគ្នា មានផ្ទះក្នុងតំបន់សំណង់បណ្ដោះអាសន្ននៅមាត់ជ្រោះខាងត្បូងផ្សារបានលុង ស្ថិតក្នុងភូមិ១ សង្កាត់ឡាបានសៀក ក្រុងបានលុង ។ ពេលនេះលោកយាយទាំង២នាក់ បានទទួលអំណោយរួមគ្នាពីសប្បុរជនតាមរយៈកោះសន្ដិភាពដែលភ្នាក់ងារបានយកទៅផ្ដល់ជូននៅភូមិត្រពាំងច្រេស ឃុំត្រពាំងច្រេស ស្រុកកូនមុំ មានចម្ងាយពីក្រុងបានលុងប្រមាណ៤៥គីឡូម៉ែត្រ នៅព្រឹកថ្ងៃទី១៧ សីហា។
បើតាមការសង្កេត អាការៈជំងឺរបស់លោកយាយ យិន ឈៀង មានសភាពធ្ងន់ធ្ងរខ្លាំងណាស់ ប្រហែលជាមិនអាចមានជីវិតរស់នៅយូរបន្ដទៀតបានទេ ដោយសារបច្ចុប្បន្នគាត់សន្លប់ស្ដូកស្តឹងសល់តែដង្ហើម ដាច់បាយដាច់ទឹក៤-៥ថ្ងៃមកហើយ មានតែសេរ៉ូមដាក់ជាប់ជានិច្ច ហើយកូនៗ និងសាច់ញាតិបាននិមន្ដព្រះសង្ឈ និងអាចារ្យសូត្រធម៌រៀងរាល់ល្ងាច ព្រមទាំងបានធ្វើមឈូសទុកជាស្រេចផងដែរ។ តាមការរៀបរាប់របស់កូនប្រុសដែលរស់នៅក្នុងខ្ទមជាមួយបានឱ្យដឹងថា ម្ដាយគាត់នៅពេលត្រឡប់ពីផ្សារបានលុង តាមរថយន្ដឈ្នួលកាលពីថ្ងៃទី៩ សីហា ២០១១ ស្រាប់តែដួលនៅមុខផ្ទះពេលចុះពីរថយន្ដហើយចាប់តាំងពីពេលនោះមកជំងឺរបស់គាត់កាន់តែធ្ងន់ធ្ងរទៅៗ រហូតលែងដឹងខ្លួន។
កូនប្រុសរបស់គាត់ឈ្មោះសួស ភឿង អាយុ៤៦ឆ្នាំ រស់នៅពោះម៉ាយ មានកូនស្រីពីរនាក់ ប្រពន្ធស្លាប់ និងមានជីវភាពក្រីក្រលំបាកយ៉ាប់យ៉ឺនខ្លាំងណាស់ ។ កូនប្រុសរូបនេះ បានរៀបរាប់ទាំងទឹកភ្នែករលីងរលោងថា រូបគាត់រស់នៅក្នុងខ្ទមជាមួយនឹងម្ដាយ ហើយតែងតែដើរស៊ីឈ្នួលគេនៅស្រុកឆ្ងាយៗ។ចំណែកឯម្ដាយរបស់គាត់តែងដើរបេះបន្លែព្រៃទៅលក់នៅផ្សារយកកម្រៃមកចិញ្ចឹមចៅស្រីទាំងពីរនាក់ដែលត្រូវជាកូនរបស់គាត់។ ប៉ុន្ដែពេលនេះម្ដាយរបស់គាត់បានធ្លាក់ខ្លួនឈឺធ្ងន់ធ្ងរបំផុត ប្រហែលជាមិនសង្ឈឹមថា មានជីវិតរស់នៅបានយូរទៀតទេ។ គាត់បានបន្ដថា ពេលម្ដាយគាត់ធ្លាក់ខ្លួនឈឺដំបូងគឺសម្រាកនៅលើខ្ទមរបស់គាត់ទេ តែពេលនេះបានយកមកឱ្យសម្រាកនៅលើផ្ទះសាច់ញាតិក្បែរនោះវិញម្ដង ព្រោះខ្ទមរបស់គាត់មានទំហំតូចចង្អៀតពេកពិបាកមិនអាចនិមន្ដព្រះសង្ឈ និងតាអាចារ្យមកសូត្រធម៌កើត។
សូមបញ្ជាក់ថា ចំពោះការប្រគល់អំណោយរបស់សប្បុរសជន ដល់លោកយាយទុរគតទាំងពីរនាក់នេះ គឺលោកយាយទាំងពីរពុំបាននៅជុំគ្នាទេ ដោយលោកយាយ ថី រស់នៅជាមួយកូនស្រីគាត់ឯក្រុងបានលុង ហើយលោកយាយ យិន ឈៀង កំពុងមានជំងឺនៅឯខ្ទមក្នុងស្រុកកូនមុំ។ ភ្នាក់ងារបស់យើងបានជូនដំណើរលោកយាយ ថី ទៅទទួលអំណោយរួមគ្នានៅស្រុកកូនមុំតែម្ដង ។
ថវិកាអំណោយដែលត្រូវបាននាំយកទៅប្រគល់ជូនលោកទាំង២នាក់ គឺកោះសន្តិភាពបានទទួលពី ១-ក្រុមហ៊ុនប្រាយវិកថឹរីមេគង្គ ភេត្រូលៀម ឧបត្ថម្ភលោកយាយទាំង២ក្នុងម្នាក់ៗចំនួន២០ដុល្លារ ២-លោកទៀវ ហាន់យ៉ូង ឧបត្ថម្ភ១៥ម៉ឺនរៀល ៣-លោកសេង គី លក់ទាខ្វៃនៅច្បារអំពៅ១ ផ្លូវជាតិលេខ១ ផ្ទះលេខ៤០Eo ខណ្ឌមានជ័យ ឧបត្ថម្ភ៣ម៉ឺនរៀល ៤-កញ្ញា ស្រីពៅ ឧបត្ថម្ភ១៥.០០០រៀល ៥-លោកវណ្ណា ឧបត្ថម្ភមី១កេស ៦-អ្នកស្រី ចាន់ណាក់ ឧបត្ថម្ភត្រីខ១យួរ ៧-ប្អូនប្រុស បញ្ញា ឧបត្ថម្ភ១៥.០០០រៀល ។ ជាមួយគ្នានេះ កោះសន្តិភាពក៏បានទទួលប្រាក់អំណោយបន្ថែមក្រោយពេលបញ្ជូនទៅ១ឈុតមុន ចំនួន២៨ម៉ឺនរៀល ក្នុងនោះជាការឧបត្ថម្ភពីលោកអ៊ា ផា និងលោកស្រី ពឹង វណ្ណា ១០ម៉ឺនរៀល, លោកពឹង ចាន់ថា និងលោកស្រី ហួង ផល្លី ៤ម៉ឺនរៀល លោកពឹង ទិត្រតុលា និងលោកស្រីផៃ ច័ន្ទណារី ១០ម៉ឺនរៀល និងលោកពឹង ចាន់ថូ និងលោកស្រី ឡាយ ពិសី ៤ម៉ឺនរៀល ។ ថវិកាដែលបានទទួលក្រោយនេះត្រូវបញ្ជូនទៅ១ឈុតទៀតក្នុងសប្តាហ៍នេះ។
បន្ទាប់ពីទទួលបានអំណោយពីសប្បុរសជនរួចមក លោកយាយ ថី និងកូនលោកយាយ យិន ឈៀង បានថ្លែងអំណរគុណដល់សប្បុរសជនដែលបានផ្តល់ជូននូវអំណោយដ៏ថ្លៃថ្លាទាំងនេះ និងបានលើកដៃបួងសួងសូមឱ្យបុណ្យកុសលទាំងអស់នេះ កើតមានចំពោះសប្បុរសជនទាំងអស់នូវភាពសម្បូរសប្បាយ រកស៊ីមានបាន និងមានសុភមង្គលក្នុងក្រុមគ្រួសារ ៕
ចែករំលែកព័តមាននេះ