ខេត្តកណ្តាល ៖ ជនម្នាក់ដែលតាំងខ្លួនជាអង្គរក្សសម្តេចតេជោហ៊ុន សែន ហើយទូរស័ព្ទគំរាមប្រធានសាលាដំបូងខេត្តព្រៃវែងឱ្យដោះលែងជន សង្ស័យម្នាក់កំពុងជាប់ឃុំនោះ បានត្រូវកម្លាំងខុទ្ទកាល័យសម្តេចតេជោហ៊ុន សែន ចាប់ខ្លួនបញ្ជូនទៅកាន់ស្នងការដ្ឋាននគរបាលខេត្តកាលពីព្រឹកថ្ងៃ ទី១៤ ខែសីហា តាមពាក្យបណ្តឹង
ខេត្តកណ្តាល ៖ ជនម្នាក់ដែលតាំងខ្លួនជាអង្គរក្សសម្តេចតេជោហ៊ុន សែន ហើយទូរស័ព្ទគំរាមប្រធានសាលាដំបូងខេត្តព្រៃវែងឱ្យដោះលែងជនសង្ស័យម្នាក់កំពុងជាប់ឃុំនោះ បានត្រូវកម្លាំងខុទ្ទកាល័យសម្តេចតេជោហ៊ុន សែន ចាប់ខ្លួនបញ្ជូនទៅកាន់ស្នងការដ្ឋាននគរបាលខេត្តកាលពីព្រឹកថ្ងៃទី១៤ ខែសីហា តាមពាក្យបណ្តឹងរបស់ប្រធានសាលាដំបូងខេត្តព្រៃវែង។
ប្រភពព័ត៌មានពីមន្ត្រីនគរបាលបានឱ្យដឹងថា ជនសង្ស័យដែលត្រូវកម្លាំងខុទ្ទកាល័យចាប់ខ្លួនឈ្មោះសេង គា ភេទប្រុស អាយុ៤៩ឆ្នាំ មានទីលំនៅភូមិភ្នៀត សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។ ប្រភពដដែលបានឱ្យដឹងទៀតថា ក្រោយពីត្រូវចាប់ខ្លួននគរបាលបានដកហូតពីជនសង្ស័យនូវប័ណ្ណសម្គាល់ខ្លួនជាភ្នាក់ងារផ្តល់ព័ត៌មានកងឯកភាពអង្គរក្សសម្តេចតេជោហ៊ុន សែន ដែលហួសសុពលភាពតាំងពីថ្ងៃទី៣០ ខែធ្នូ ឆ្នាំ២០០៨ និងប័ណ្ណសម្គាល់ខ្លួនភ្នាក់ងារផ្តល់ព័ត៌មានរបស់បញ្ជាការដ្ឋានអង្គរក្ស ស្នងការដ្ឋានស្រាវជ្រាវសន្តិសុខដែលហួសសុពលភាពតាំងពីថ្ងៃទី៣១ ខែមិថុនា ឆ្នាំ២០១០ មក ។ ជននេះបានយកតួនាទីដែលហួសសុពលភាពទៅទូរស័ព្ទគំរាមលោកសុខ កល្យាណ ប្រធានសាលាដំបូងខេត្តព្រៃវែងឱ្យដោះលែងជនសង្ស័យម្នាក់ឈ្មោះអាំ វែល ដែលត្រូវតុលាការសម្រេចឃុំខ្លួនដោយចោទប្រកាន់ពីបទបង្កឱ្យរបួសដល់ជនរងគ្រោះមានស្ថានភាពពិការអចិន្ត្រៃយ៍ និងខ្វាក់ភ្នែកម្ខាងក្នុងសំណុំរឿងព្រហ្មទណ្ឌលេខ៥៥៣ចុះថ្ងៃទី៦ ខែធ្នូ ឆ្នាំ២០១០។
ប្រភពដដែលបានឱ្យដឹងទៀតថា នៅថ្ងៃទី១២ ខែសីហា ឆ្នាំ២០១១ ប្រធានតុលាការ លោកសុខ កល្យាណ បានអនុញ្ញាតឱ្យជនឈ្មោះសេង គា ជួបនៅក្នុងបន្ទប់នៃអគារតុលាការដើម្បីសាកសួរ និងបានប្រាប់ថា ឈ្មោះអាំ វែល មិនអាចដោះលែងបានទេ ។ ពេលនោះឈ្មោះសេង គា បាននិយាយគំរាមថា «លោកឯងចាំមើល!» រួចក៏ដើរចេញបាត់ទៅ។ លុះដល់ល្ងាចថ្ងៃដដែលឈ្មោះសេង គា និងមនុស្ស៣នាក់ទៀតបានទៅដល់ផ្ទះក្រឡាបញ្ជីរបស់ប្រធានតុលាការហើយបានស្នើសុំក្រឡាបញ្ជីពិនិត្យមើលសំណុំរឿងជាថ្មីម្តងទៀត តែក្រឡាបញ្ជីប្រាប់ថា សំណុំរឿងទុកនៅតុលាការ។ ពេលនោះឈ្មោះសេង គា បានគំរាមថា សូមផ្តាំទៅលោកប្រធានតុលាការផងខ្លួនទុកពេលឱ្យ៣ថ្ងៃ បើលោកមិនធ្វើការដោះលែងឈ្មោះអាំ វែល ទេ ខ្លួននឹងកៀងគរប្រជាពលរដ្ឋធ្វើពាក្យបណ្តឹងទៅសម្តេចតេជោហ៊ុន សែន។
ប្រភពដដែលបានឱ្យដឹងទៀតថា ក្រោយពីមានការសម្លុតគំរាមកំហែងដល់លោកប្រធានសាលាដំបូងខេត្តព្រៃវែង និងក្រឡាបញ្ជីរួចមករឿងនេះក៏បានបែកធ្លាយដឹងដល់ខាងខុទ្ទកាល័យសម្តេចតេជោហ៊ុន សែន ទើបលោកហូ សិទ្ធី នាយខុទ្ទកាល័យបានបញ្ជាឱ្យកម្លាំងសមត្ថកិច្ចឃាត់ខ្លួនឈ្មោះសេង គា នាំខ្លួនទៅកាន់ស្នងការដ្ឋាននគរបាលខេត្តកណ្តាលដើម្បីកសាងសំណុំរឿងបញ្ជូនទៅកាន់សាលាដំបូងខេត្តចាត់ការតាមច្បាប់ ៕
ចែករំលែកព័តមាននេះ