ខេត្តរតនគិរី​​​ ៖ ​ពីខេត្តរតនគិរីមាន​សេចក្តី​រាយការណ៍មកថា មនុស្សម្នាក់បានស្លាប់ និង៤នាក់ផ្សេងទៀតរងរបួសធ្ងន់ស្រាលនៅក្នុង គ្រោះថ្នាក់ចរាចរណ៍ម៉ូតូ​បុកម៉ូតូ​។ ហេតុការណ៍ នេះ​បានកើតឡើង​កាលពីវេលាម៉ោង៦ព្រឹកថ្ងៃ​ទី១៦ សីហានេះ តាមបណ្តោយផ្លូវជាតិលេខ​៧៨​អា ស្ថិតនៅចំណុចភូមិបក់ធំ ឃុំប៉ក់ញ៉ៃ ស្រុក​អូរយ៉ាដាវ ។

បើតាមអ្នកឆ្លើយឆ្លងព័ត៌មានកោះសន្តិភាព បានបញ្ជាក់អោយដឹងទៀតថា នៅមុនពេលកើត​ហេតុ គេបានឃើញម៉ូតូម៉ាកវ៉េវមួយគ្រឿងជិះគ្នា​៣​នាក់​បើកក្នុងល្បឿនលឿនពីកើតទៅលិចក្នុង​ទិសដៅឆ្ពោះទៅក្រុងបានលុង។ លុះមកដល់មុខ​មណ្ឌលសុខភាពស្រុកអូរយ៉ាដាវ ស្រាប់តែ​បុក​គ្នាពេញទំហឹងលាន់ដូចរន្ទះ ជាមួយម៉ូតូមួយ​គ្រឿង​ទៀតម៉ាកសង់កូរ៉េជិះគ្នា២​នាក់ ដែល​ទើបជិះចេញពីផ្លូវលំបត់ឡើងមកលើផ្លូវអាស៊ាន បណ្តាលអោយអ្នកជិះលើម៉ូតូទាំងសងខាងប៉ើង ខ្ទាតចេញធ្លាក់លើថ្នល់កៅស៊ូ របួសធ្ងន់ទាំង​អស់​គ្នា។ ភ្លាមៗគេបានទាក់ទងតាមទូរស័ព្ទប្រាប់​ប៉ូលិស និងរថយន្តសាមុយដើម្បីសង្គ្រោះ ប៉ុន្តែ​ដោយសារមាន​ភាពយឺតយ៉ាវគឺរង់ចាំរថយន្តសង្គ្រោះប្រមាណ១ម៉ោងទើបមកដល់នោះ បណ្តាលអោយយុវជនម្នាក់ជាអ្នកបើកបរស្លាប់ ពេលបញ្ជូនដល់មន្ទីរពេទ្យ​។ សេចក្តីរាយ​ការណ៍​បានបញ្ជាក់ថា ជនរងគ្រោះដែលស្លាប់ឈ្មោះ សល់ ញាវ អាយុ ១៥ឆ្នាំ រស់នៅភូមិបាតាង ឃុំ​សេសាន ស្រុកអូរយ៉ាដាវ បើកបរម៉ូតូម៉ាកសង់​កូរ៉េព៌ណក្រហម គ្មានស្លាកលេខ ដឹកប្រពន្ធ ឈ្មោះ​សាវ ថាច អាយុ១៥ឆ្នាំដូចគ្នា របួសធ្ងន់។

ចំណែកភាគីម្ខាងទៀតដែលជិះម៉ូតូវ៉េវពណ៌ ខៀវ គ្មានស្លាកលេខ បើកបរដោយឈ្មោះ ពយ ធ្លី អាយុ​៤២ឆ្នាំ របួសស្រាល មុខរបរកសិករ រស់​នៅក្នុងភូមិ-ឃុំកើតហេតុខាងលើ និងអ្នករួម​ដំណើរ​២នាក់ទៀតត្រូវជាកូនអ្នកបើកបរ ឈ្មោះ​រចំ ពើយ ភេទប្រុស អាយុ​១៨ឆ្នាំ របួស​ស្រាល និង​ម្នាក់ទៀតជាប្អូនឈ្មោះ​រចំ លឿន អាយុ​១៦ឆ្នាំ ភេទស្រី របួសធ្ងន់​។ បច្ចុប្បន្នអ្នក​របួសទាំងអស់កំពុងសម្រាកព្យាបាលនៅមន្ទីរពេទ្យបង្អែកខេត្ត​។ ចំណែកអ្នកស្លាប់ត្រូវ​ក្រុម​គ្រួសារបញ្ជូនយក​ទៅធ្វើបុណ្យតាមប្រពៃណី រីឯ​ម៉ូតូត្រូវបានសមត្ថកិច្ចបញ្ជូនយកទៅរក្សាទុកនៅ ទីបញ្ជាការដ្ឋានស្រុកអូរយ៉ាដាវដើម្បីរង់ចាំដោះ ស្រាយតាមច្បាប់ ៕