ប្រាសាទចម្បង៣នៃរាជធានីដំបូងបង្អស់នាសម័យអង្គរ
- សៀមរាប
ខេត្តសៀមរាប៖ ប្រាសាទចម្បងនៃរាជធានីហរិហរាល័យ ដែលទេសចរមិនគួរមើលរំលងមានចំនួន៣ ។ រាជធានីហរិហរាល័យនេះគឺជារាជធានីដើមដំបូងនៃសម័យមហានគរ ។
ប្រាសាទបាគង ប្រាសាទព្រះគោ និងប្រាសាទលលៃ ស្ថិតនៅតំបន់រលួស ស្រុកប្រាសាទបាគង ខេត្តសៀមរាប ។ បើតាមវិទ្យាស្ថានមនុស្សសាស្ត្រ និងវិទ្យាសាស្ត្រសង្គម ប្រាសាទទាំង៣នេះគឺជាសំណង់សាសនា និងស្ថាបត្យកម្មដ៏សំខាន់នៃរាជធានីហរិហរាល័យ ដែលជាមជ្ឈមណ្ឌលនយោបាយ និងសាសនាដ៏រុងរឿងមួយរបស់អាណាចក្រខ្មែរនាសតវត្សរ៍ទី៩ មុនពេលព្រះបាទយសោវរ្ម័នទី១ ផ្លាស់ប្តូររាជធានីទៅតំបន់អង្គរ ។
បើតាមអាជ្ញាធរជាតិអប្សរា ប្រាសាទបាគង ប្រាសាទព្រះគោ ប្រាសាទលលៃ រួមនិងប្រាសាទ ផ្សេងៗទៀតដែលនៅក្បែរនោះ សុទ្ធសឹងស្ថិតនៅក្នុងរាជធានីហរិហរាល័យ ដែលជាអតីតរាជធានីដើមសម័យអង្គរ ។
ប្រាសាទបាគង គឺជាប្រាសាទភ្នំ សង់លើខឿនបីជាន់ ក្នុងរាជកាលព្រះបាទ ឥន្ទ្រវរ្ម័នទី១ ។ ក្រៅពីសំណង់ប្រាសាទថ្មភក់នៅកណ្តាល ជុំវិញក៏មានប្រាង្គឥដ្ឋមួយចំនួន ។ តាមរយៈការយកចិត្តទុកដាក់លើការងារអភិរក្ស និងជួសជុលឡើងវិញដោយអាជ្ញាធរជាតិអប្សរា ប្រាសាទកណ្តាល ក៏ដូចជាប្រាង្គឥដ្ឋមួយចំនួន បានឈររឹងមាំឡើងវិញ សម្រាប់ការទស្សនា ការសិក្សា និងស្រាវជ្រាវ ។
ប្រាសាទបាគង ត្រូវបានចាត់ជាប្រាសាទមួយដ៏មានការទាក់ទាញពីភ្ញៀវទេសចរនៅតំបន់រលួស ។ ក្រៅពីប្រាសាទ ក៏មានទីតាំងសិប្បកម្មស្បែក ចម្លាក់ថ្ម កុលាលភាជន៍ និងទេសភាពវប្បធម៌ជុំវិញសហគមន៍ ដែលទេសចរបានចូលទស្សនាជាហូរហែមិនដាច់ ។
ប្រាសាទបាគង កសាងក្នុងរជ្ជកាលព្រះបាទឥន្ទ្រវរ្ម័នទី១ នៅឆ្នាំ៨៨១ ។ ប្រាសាទនេះជាប្រាសាទភ្នំដ៏សំខាន់មួយ ដែលមានសំណង់ជាពីរ៉ាមីតប្រាំថ្នាក់ ។
ចណែកប្រាសាទព្រះគោ កសាងក្នុងរជ្ជកាលព្រះបាទឥន្ទ្រវរ្ម័នទី១ និងឧទ្ទិសដល់បុព្វបុរស នៅឆ្នាំ៨៧៩ ។ ប្រាសាទនេះមានប្រាង្គឥដ្ឋចំនួនប្រាំមួយ ។
ចំណែកប្រាសាទលលៃ កសាងក្នុងរជ្ជកាលព្រះបាទយសោវរ្ម័នទី១ នៅឆ្នាំ៨៩៣ នៃគ្រឹស្តសករាជ ដើម្បីឧទ្ទិសដល់បុព្វបុរស ។ ប្រាសាទនេះមានប្រាង្គឥដ្ឋចំនួនបួន ដែលស្ថិតនៅកណ្ដាលបារាយណ៍ឥន្ទ្រតដាក ៕
ចែករំលែកព័តមាននេះ