ទីក្រុងកៀវ៖ មនុស្សយ៉ាងតិច៣១នាក់បានស្លាប់នៅពេលយោធារុស្ស៊ីទម្លាក់គ្រាប់ទៅលើសាលារៀនមួយកន្លែងដែលប្រើប្រាស់សម្រាប់ចែកចាយជំនួយនៅក្នុងភូមិក្បែរខ្សែត្រៀមមុខនៃតំបន់ហ្សាប៉ូរីហ្សៀ។ នេះបើយោងតាមការអះអាងរបស់មន្ត្រីថ្នាក់តំបន់ម្នាក់។ លោកមីខាយឡូ សេមីឃីន (Mykhailo Semikin) ជាអនុប្រធានយោធាប្រចាំតំបន់ហ្សាប៉ូរីហ្សៀ ថ្លែងថាមនុស្ស៥នាក់ក៏រងរបួសនៅក្នុងហេតុការណ៍នោះផងដែរ។
នេះមិនទាន់គិតដល់មនុស្សជិត៥០នាក់ទៀតថែលបាត់ខ្លួនក្រោយការវាយប្រហារទៅលើភូមិកូមីស៊ូវ៉ាខា (Komyshuvakha)។ សមាជិក២នាក់នៃក្រុមអ្នកជួយសង្គ្រោះ និងនគរបាល៤នាក់ស្ថិតនៅក្នុងចំណោមអ្នកស្លាប់។ រុស្ស៊ីបានវាយប្រហារផ្ទួនៗទៅលើទីតាំងដដែល។ លោកហ្សេឡិនស្គីកាលពីមុននោះនិយាយថាយោធារុស្ស៊ីមុនដំបូងទម្លាក់គ្រាប់បែកទៅលើសាលារៀនដែលប្រើប្រាស់សម្រាប់ជាទីជម្រក និងចែកចាយជំនួយមនុស្សធម៌ប្រចាំថ្ងៃ។
សាលារៀននោះមិនមានកូនសិស្សរៀនទេ។ លោកថ្លែងថារុស្ស៊ីវាយប្រហារលើកទីមួយនៅពេលមនុស្សធ្វើដំណើរទៅដល់ទីនោះបានបន្តិច។ ពេលនោះពួកគេទម្លាក់គ្រាប់បែកមួយចំនួន។ បន្ទាប់មក មានការវាយប្រហារលើកទី២ដោយទម្លាក់គ្រាប់បែកជាច្រើនគ្រាប់ទៀត លើកនេះពួកគេទម្លាក់លើទីជម្រកតែម្ដង។ លោកចាត់ទុកថានេះជាការវាយប្រហារបែបភេរវកម្ម។ ហ្សេឡិនស្គីថ្លែងបន្តទៀតថារុស្ស៊ីមិនមែនមិនដឹងនោះទេថាប្រជាជនប្រមូលផ្ដុំគ្នានៅទីនោះជារៀងរាល់សប្ដាហ៍ដើម្បីទទួលយកកញ្ចប់ជំនួយមនុស្សធម៌។
ទោះជាយ៉ាងណាក្ដី បើគេស្ដាប់ការបកស្រាយពីខាងក្រសួងការពារជាតិរុស្ស៊ីផ្ទុយពីនេះ។ ក្រសួងអះអាងថាការវាយប្រហារនោះត្រូវចំកងអង្គភាពយោធាអ៊ុយក្រែននៅក្នុងតំបន់នានាជុំវិញភូមិកូមីស៊ូវ៉ាខា (Komyshuvakha) និងទីតាំង២កន្លែងទៀតនៅហ្សាប៉ូរីហ្សៀ។ ក្រសួងចេញសេចក្ដីប្រកាសមួយនៅថ្ងៃនេះថាយោធាអ៊ុយក្រែន២៥នាក់បានស្លាប់ យានជំនិះ១៥គ្រឿង និងស្ថានីយធ្វើសង្គ្រាមអេឡិចត្រូនិចត្រូវបានកម្ទេច៕ ប្រភព៖ Reuters
ចែករំលែកព័តមាននេះ