រាជធានីភ្នំពេញ ៖ ជនសង្ស័យជាប្តីម្នាក់ ដែលបានធ្វើសកម្មភាព រឹត និងច្របាច់កសម្លាប់ប្រពន្ធខ្លួនឯង ដោយសារភ្លើងប្រចណ្ឌ នៅស្រុកកៀនស្វាយ ខេត្តកណ្តាល បានរត់គេចខ្លួនអស់រយៈពេល ៨ថ្ងៃនោះ នៅពេលនេះ បានចូលខ្លួនសារភាព ហើយត្រូវបានកម្លាំងនគរបាលឃាត់ខ្លួនហើយ ។
ការឃាត់ខ្លួននេះ បានធ្វើឡើងកាលពីវេលាម៉ោង០៨យប់ថ្ងៃទី០២ ខែវិច្ឆិកា ឆ្នាំ២០២៦ នៅប៉ុស្តិ៍នគរបាលរដ្ឋបាលក្បាលកោះ ខណ្ឌច្បារអំពៅ រាជធានីភ្នំពេញ ។
ជនសង្ស័យមានឈ្មោះ អ៊ឹម អេង អាយុ ៤៩ឆ្នាំ មុខរបររត់ម៉ូតូកង់បី និងជាជាងម៉ាស៊ីនត្រជាក់ មានស្រុកកំណើតនៅឃុំកងតាណឹង ស្រុកកងមាស ខេត្តកំពង់ចាម។ ចំណែកជនរងគ្រោះជាប្រពន្ធ មានឈ្មោះ លី សីហា អាយុ ៤០ឆ្នាំ មុខរបរជាកម្មការិនី ស្នាក់នៅផ្ទះកើតហេតុ ស្ថិតក្នុងភូមិកណ្តាល ឃុំបន្ទាយដែក ស្រុកកៀនស្វាយ ខេត្តកណ្តាល ។
តាមការបញ្ជាក់ពីសមត្ថកិច្ចបានអោយដឹងថា ករណីឃាតកម្មនេះបានកើតឡើងកាលពីវេលាម៉ោង ៥និង០៥ នាទីព្រឹក ថ្ងៃទី២៥ ខែតុលា ឆ្នាំ២០២៦។ មុនពេលកើតហេតុ កាលពីថ្ងៃទី២៤ ខែតុលា ជនរងគ្រោះបានចេញទៅផឹកស្រា ស្រវឹង រួចត្រឡប់មកផ្ទះវិញ។ ពេលនោះ ជនសង្ស័យជាប្តីបានសួររកទូរសព្ទ ដើម្បីភ្ជាប់កម្មវិធី (App) រត់កង់បី ប៉ុន្តែប្រពន្ធបានឆ្លើយថា បោះចោលបាត់ហើយ រួចក៏ចូលដេក ។ លុះដល់ម៉ោងជាង ៥ព្រឹក ថ្ងៃទី២៥ ខែតុលា ដោយសារកំហឹង និងចិត្តប្រចណ្ឌ ដែលតែងតែមានកន្លងមក ជនសង្ស័យក៏បានយកខ្សែក្រណាត់ពណ៌ប្រផេះ (មានរុំ កងដែក) មកធ្វើសកម្មភាពរឹត និងច្របាច់កប្រពន្ធរហូតដល់ស្លាប់បាត់បង់ជីវិតនៅនឹងកន្លែង រួចជិះម៉ូតូកង់បីគេចខ្លួនបាត់តែម្តង។
តាមប្រភពពីសាច់ញាតិ និងអ្នកជិតខាងបានឱ្យដឹងថា កន្លងមក ជនសង្ស័យជាប្តី តែងតែមានចិត្តប្រចណ្ឌ និងឈ្លោះប្រកែកជាមួយជនរងគ្រោះជាញឹកញាប់ ប៉ុន្តែមិននឹកស្មានថា កើតមានឈានដល់អំពើឃាតកម្មបែបនេះសោះ ។
បច្ចុប្បន្ន ជនសង្ស័យ ត្រូវបានសមត្ថកិច្ចនគរបាលប៉ុស្តិ៍ក្បាលកោះ ប្រគល់ជូនសមត្ថកិច្ចនគរបាលស្រុកកៀនស្វាយ ខេត្តកណ្តាល ដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ