ទីក្រុងហាណូយ ៖ ប្រទេសវៀតណាមបានទទួលស្វាគមន៍ភ្ញៀទេសចរអន្តរជាតិចំនួន ១៩,៥ លាននាក់ នៅក្នុងរយៈពេល១០ខែ នៃឆ្នាំ ២០២៦ ដែលជាការកើនឡើង ១៣,៨% បើធៀបនឹងរយៈពេលដូចគ្នា កាលពីឆ្នាំមុន។ នេះបើតាមការចេញផ្សាយពី Vietnam Express (VnExpress) នៅថ្ងៃទី៣ ខែវិច្ឆិកា។
យោងតាមទិន្នន័យពីអគ្គនាយកដ្ឋានស្ថិតិជាតិវៀតណាមបានបង្ហាញថា ប្រទេសចិននៅតែជាទីផ្សារប្រភពធំជាងគេបំផុតរបស់វៀតណាម ដោយមានភ្ញៀវចំនួន ៤,៣ លាននាក់ ស្មើនឹងប្រហែល ២២% នៃចំនួនសរុប។ កូរ៉េខាងត្បូងឈរនៅលេខរៀងទី ២ ដោយមាន ប្រហែល ៣,៣ លាននាក់ ឬ ១៧,៣%។ រុស្ស៊ីនៅលេខរៀងទី ៣ ចំនួន ១,២ លាននាក់ បន្ទាប់មកគឺ កោះតៃវ៉ាន់ចំនួន ១,០៧ លាននាក់ និងសហរដ្ឋអាមេរិកចំនួន ៨០៨ ០០០ នាក់ ។ ចំណែកប្រទេសផ្សេងទៀតស្ថិតក្នុងចំណោម ១០ ប្រទេសកំពូល រួមមាន កម្ពុជា ៧៨៧ ០០០ នាក់, ជប៉ុន ៧៥៧ ០០០ នាក់, ឥណ្ឌា ៧៤៤ ០០០ នាក់, ហ្វីលីពីន ៥៧៩ ០០០ នាក់ និងអូស្ត្រាលី ៥៤២ ០០០ នាក់។
ការិយាល័យស្ថិតិទូទៅរាយការណ៍ថា ប្រទេសវៀតណាម នៅតែបន្តជាជម្រើសដ៏ពេញនិយមសម្រាប់អ្នកទេសចរអន្តរជាតិ ដោយសារសុវត្ថិភាព គោលនយោបាយទិដ្ឋាការអំណោយផល កិច្ចខិតខំប្រឹងប្រែងផ្សព្វផ្សាយទេសចរណ៍ដ៏ខ្លាំងក្លា និងជម្រើសនៃបទពិសោធន៍ទេសចរណ៍ដ៏សម្បូរបែប។
នៅក្នុងខែតុលា ចំនួនភ្ញៀវទេសចរអន្តរជាតិមកកាន់វៀតណាមកើនឡើងដល់ ១,៨៥ លាននាក់ ដែលជាការកើនឡើង ៤,៩% ធៀបនឹងខែមុន និងកើនឡើង ៧% បើធៀបនឹងរយៈពេលដូចគ្នា កាលពីឆ្នាំមុន។ ឧស្សាហកម្មទេសចរណ៍បានកំណត់ថា កំណើនភ្ញៀវទេសចរក្នុងខែតុលាមួយផ្នែក មកពីការប្រគុំតន្ត្រីចំនួន២ដងរបស់ក្រុមចម្រៀងកូរ៉េខាងត្បូង BigBang នៅទីក្រុងហាណូយ កាលពីថ្ងៃទី២៤-២៥ ខែតុលា។
គួរបញ្ជាក់ដែរថា ប្រទេសវៀតណាមបានដាក់គោលដៅទាក់ទាញភ្ញៀវទេសចរអន្តរជាតិឱ្យបានរហូតដល់ ២៥ លាននាក់ នៅចុងឆ្នាំនេះ៕
ចែករំលែកព័តមាននេះ