ស្រុកភ្នំព្រឹកទើបទទួលបានក្រុមហ៊ុន«នាគនាំសំណាង»វិនិយោគ«កន្ទុយលេខ»តែអាជ្ញាធរអត់បានដឹង និងកំពុងស្វែងរកទីតាំង
- បាត់ដំបង
ខេត្តបាត់ដំបង ៖ នាគនាំសំណាង ឬនាគនាំទុក្ខដល់ប្រជាពលរដ្ឋស្រុកភ្នំព្រឹក? បោះពុម្ភសញ្ញារូបនាគគួរឲ្យខ្លាចនៅលើអាវយឺតពណ៌ក្រហមឆេះ ភ្ជាប់ដោយអក្សរមួយឃ្លានៅខាងក្រោមរូបនាគ៖«នាគនាំសំណាង»ផ្ដល់ឲ្យបុគ្គលិកពាក់ជិះម៉ូតូបង្ហាញមហាជនជាសាធារណៈ ។
ប៉ុន្តែទំនងពុំមាននរណាម្នាក់បានយល់ពីអត្ថន័យនៃឡូហ្គោ«នាគនាំសំណាង»នេះទេ លើកលែងតែអ្នកនិយមចាក់កន្ទុយលេខ(ឆ្នោត)ប៉ុណ្ណោះ ទើបដឹងថា «នាគនាំសំណាង» ជាក្រុមហ៊ុន«ឆ្នោតយួន» ។ បើតាមប្រភពព័ត៌មាន ក្រុមហ៊ុន «នាគនាំសំណាង» ដែលគេអះអាងថា ជាក្រុមហ៊ុន «ឆ្នោតយួន» នេះ ទើបលេចមុខបើកទីតាំងលក់ «ឆ្នោតយួន» នៅក្នុងស្រុកភ្នំព្រឹកទេ ប៉ុន្តែបុគ្គលិកល្បែងឆ្នោត បានបង្ហាញខ្លួនយ៉ាងគគ្លើននៅតាមទីសាធារណៈតាមរយៈពាក់អាវដែលមានឡូហ្គោសញ្ញារូបនាគភ្ជាប់ដោយអក្សរ «នាគនាំសំណាង» ។ គេមិនដឹងថា វត្តមាន «នាគនាំសំណាង» បង្ហាញខ្លួននៅក្នុងស្រុកភ្នំព្រឹកជាស្រុកមួយជាប់ព្រំដែនខ្មៃរ-ថៃមួយនេះ តើអាជ្ញាធរស្រុក និងសមត្ថកិច្ច បានដឹងដែរឬអត់នោះទេ?
បើតាមអធិការស្រុកភ្នំព្រឹក លោក សំ វីរៈ បានផ្ដល់ចម្លើយមកថា រដ្ឋបាលស្រុក ក៏ដូចសមត្ថកិច្ចរបស់លោកមិនបានដឹងថា មានក្រុមហ៊ុន«ឆ្នោតយួន» ដែលមានឈ្មោះ«នាគនាំសំណាងនេះ» ចូលមកលួចបើកទីតាំងនៅក្នុងស្រុកភ្នំព្រឹកនេះទេ ។ ហើយពេលនេះ មន្ត្រីជំនាញ និងមន្ត្រីមូលដ្ឋាន កំពុងធ្វើការស្រាវជ្រាវស្វែងរកទីតាំងក្រុមហ៊ុនឆ្នោត«នាគនាំសំណាង» នេះហើយ ។
លោកបានសន្យាថា បើរកឃើញថា «នាគនាំសំណាង»នេះ មានទីតាំងនៅក្នុងស្រុកភ្នំព្រឹកមែន លោកនឹងបង្ក្រាបចាត់ការនីតិវិធីហើយ ។ ក្រោយពីបែកធ្លាយព័ត៌មាននតាមបណ្ដាញសង្គមដែលនិយាយពីវត្តមាន «នាគនាំសំណាង» បង្ហាញខ្លួននៅស្រុកភ្នំព្រឹក ដែលជាក្រុមហ៊ុនលក់ «ឆ្នោតយួន» កាលពីថ្ងៃទី០២ វិច្ឆិកា មានបុរសម្នាក់ (សុំលាក់ឈ្មោះ) បានទូរស័ព្ទមកបំភ្លឺប្រាប់កោះសន្តិភាពដោយសារភាពថា «នាគនាំសំណាង» ជាក្រុមហ៊ុនលក់ «ឆ្នោត» ហើយលោកជាអ្នកគ្រប់គ្រង ។
បុរសនោះនិយាយថា ខ្លួនទើបចេញរកស៊ីលើកដំបូង វាយលុកស្រុកភ្នំព្រឹក ហើយទើបបានរយៈពេលប្រហែលមួយសប្ដាហ៍ប៉ុណ្ណោះ ។ សំណួរកោះសន្តិភាព៖ តើក្រុមហ៊ុនមានដាក់ទីតាំងទេ នៅស្រុកភ្នំព្រឹក ? អ្នកគ្រប់គ្រង «នាគនាំសំណាង» ដំបូងប្រាប់ថា «មាន» ប៉ុន្តែក្រោយបិទទូរស័ព្ទមួយរយៈ លុះពេលទូរស័ព្ទមកប្រាប់ម្ដងទៀត បែរជាបញ្ជាក់ប្រាប់ថា «អត់មានទេ» ។ ពេលនេះ រកទីតាំងដាក់មិនទាន់បានទេ មានតែចល័តធ្វើការសិន» ។
បើទោះជាអ្នកគ្រប់គ្រង «នាគនាំសំណាង» ដែលជាក្រុមហ៊ុនលក់ «ឆ្នោតយួន»មួយនេះ អះអាងថា ក្រុមហ៊ុនខ្លួន ទើបចូលវាយលុកក្នុងទីផ្សារនៅស្រុកជាយដែនខាងលើនេះ ទើបបានប្រហែលមួយសប្ដាហ៍ បុគ្គលិកធ្វើការចល័តមិនទាន់រកទីតាំងបានក្ដី ប៉ុន្តែប្រភពច្បាស់ការពីស្រុកភ្នំព្រឹកបានផ្ដល់ព័ត៌មានថា អ្នកគ្រប់គ្រង «នាគនាំសំណាង» ម្នាក់នេះ និយាយ«កុហក់» ។
ប្រភពបានស្រាតខោក្រុមហ៊ុននេះបង្ហាញជាសាធារណៈយ៉ាងច្បាស់ក្រឡែតថា ទីតាំង«នាគនាំសំណាង»បានសំងំបន្លំខ្លួន ក្រោមស្លាកវេរលុយមួយកន្លែងនៅម្ដុំផ្សារ «ហេងថេងពេជ្រចិន្តា» ដែលស្ថិតក្នុងឃុំពេជ្រចិន្តា ស្រុកភ្នំព្រឹក ។ លោក សំ វីរៈ អធិការស្រុកភ្នំព្រឹក បានបញ្ជាក់ប្រាប់កោះសន្តិភាពថា ទាំងលោកអភិបាលស្រុក និងកម្លាំងជំនាញរបស់លោក បានដឹងនិងកំពុងបញ្ជាឲ្យមន្ត្រីមូលដ្ឋាន ធ្វើការស្រាវជ្រាវស្វែងរកទៅតាំង «នាគនាំសំណាង»នេះហើយ ដើម្បីចាត់ការតាមច្បាប់ ។
គេមិនដឹងថា តើប្រជាពលរដ្ឋនៅស្រុកភ្នំព្រឹក អាចមានសំណាងពី «នាគនាំសំណាង»នេះ ឬជួបទុក្ខកាន់តែធ្ងន់នោះទេ នៅពេលនេះ ? ខណៈតាមព្រំដែនកំពុងត្រូវបានបិទគ្មានសេដ្ឋកិច្ចចេញ-ចូល ។ កម្លាំងយោធានៃភាគីទាំង០២ មើលមុខគ្នាមិនចំ សង្គ្រឿតធ្មេញដាក់គ្នារាល់ថ្ងៃ ។
រីឯទីផ្សារកសិផលក្នុងស្រុក ម្ដងមុជម្ដងងើបមិនទៀងទាត់ ឥឡូវបែរជាលេចវត្តមានក្រុមហ៊ុន «ឆ្នោតយូន» វាយលុកចូលក្នុងស្រុកនេះទៀត មិនដឹងថា តើសំណាងអ្នកស្រុកជាប់ជាយដែនមួយនេះ លិច ឬអណ្ដែតទេពេលនេះ ៕
ចែករំលែកព័តមាននេះ